റിയാദ്: കേന്ദ്ര ഹജ്ജ് കമ്മിറ്റി കഴിഞ്ഞ വര്‍ഷം മുതല്‍ ആരംഭിച്ച 20 ദിവസത്തെ ഹ്രസ്വകാല ഹജ്ജ് പാക്കേജില്‍ വിദേശ ഇന്ത്യക്കാര്‍ക്കായി (എന്‍.ആര്‍.ഐ) പ്രത്യേക സീറ്റ് സംവരണം ഏര്‍പ്പെടുത്തണമെന്ന് ഐ.സി.എഫ് ആവശ്യപ്പെട്ടു. ഹജ്ജ് തീര്‍ഥാടകരുടെ മാറിക്കൊണ്ടിരിക്കുന്ന സാഹചര്യങ്ങള്‍ പരിഗണിച്ച് നടപ്പിലാക്കിയ ഈ പാക്കേജ് കാലോചിതമായ നടപടിയാണെന്ന് സംഘടന വിലയിരുത്തി.
ലോകത്തിന്റെ വിവിധ ഭാഗങ്ങളില്‍ ജോലി ചെയ്യുന്ന ഇന്ത്യന്‍ പ്രവാസികള്‍ക്ക് ഈ പദ്ധതി ഏറെ സൗകര്യപ്രദമാണ്. നിലവിലുള്ള സാധാരണ ഹജ്ജ് പാക്കേജുകള്‍ക്ക് കൂടുതല്‍ ദിവസങ്ങള്‍ ആവശ്യമായി വരുമ്പോള്‍, പുതുതായി അവതരിപ്പിച്ച ഹ്രസ്വകാല പാക്കേജ് പ്രവാസികള്‍ക്ക് ഏറെ പ്രായോഗികമാണ്. വിദേശ രാജ്യങ്ങളിലെ ഹജ്ജ് ക്വാട്ടാ സംവിധാനങ്ങളും പ്രാദേശിക നിയമങ്ങളും കാരണം, പ്രവാസികള്‍ക്ക് അവര്‍ താമസിക്കുന്ന രാജ്യങ്ങളില്‍ നിന്ന് ഹജ്ജ് നിര്‍വഹിക്കാന്‍ പലപ്പോഴും സാധിക്കാറില്ല. അതിനാല്‍ ഇന്ത്യ വഴിയാണ് ഇവര്‍ ഹജ്ജ് യാത്ര നടത്തേണ്ടിവരുന്നത്. ദീര്‍ഘകാല പാക്കേജുകള്‍ ഇത്തരക്കാര്‍ക്ക് ജോലിയിലും മറ്റും വലിയ ബുദ്ധിമുട്ടുകള്‍ സൃഷ്ടിക്കുന്നുണ്ട്.
ഈ സാഹചര്യത്തില്‍, ഹ്രസ്വകാല ഹജ്ജ് പാക്കേജില്‍ പ്രവാസികള്‍ക്കായി പ്രത്യേക ക്വാട്ട ഏര്‍പ്പെടുത്തണമെന്ന് ഐ.സി.എഫ് ആവശ്യപ്പെട്ടു. ലഭ്യമായ സീറ്റുകളില്‍ പരമാവധി 50 ശതമാനം വരെ അര്‍ഹരായ പ്രവാസി അപേക്ഷകര്‍ക്കായി നീക്കിവെക്കണമെന്ന് ആവശ്യപ്പെട്ട് കേന്ദ്ര ന്യൂനപക്ഷകാര്യ മന്ത്രാലയത്തിനും കേന്ദ്ര ഹജ്ജ് കമ്മിറ്റിക്കും ഐ.സി.എഫ് കത്തയച്ചു.
Related News
