ജിദ്ദ: ജിദ്ദയില്‍ നിയമവിരുദ്ധമായി പ്രവര്‍ത്തിച്ചുവന്ന 12 കുടിവെള്ള ബോട്ടിലിംഗ് പ്ലാന്റുകള്‍ വാണിജ്യ മന്ത്രാലയം അടച്ചുപൂട്ടി. ഗുരുതരമായ നിയമലംഘനങ്ങള്‍ കണ്ടെത്തിയതിനെത്തുടര്‍ന്നാണ് നടപടി. പ്ലാന്റുകള്‍ ഉടന്‍ തന്നെ അധികൃതര്‍ സീല്‍ ചെയ്യുകയും, ഇതില്‍ ഉള്‍പ്പെട്ടവരെ അറസ്റ്റ് ചെയ്ത് തുടര്‍നടപടികള്‍ക്കായി സുരക്ഷാ ഏജന്‍സികള്‍ക്ക് കൈമാറുകയും ചെയ്തു. ഇവര്‍ക്കെതിരെ കര്‍ശനമായ ശിക്ഷാനടപടികള്‍ സ്വീകരിക്കുമെന്ന് അധികൃതര്‍ അറിയിച്ചു.
എട്ട് സര്‍ക്കാര്‍ ഏജന്‍സികളുമായി സഹകരിച്ച് നടത്തിയ പരിശോധനയിലാണ് പൊതുജനാരോഗ്യത്തിന് വലിയ ഭീഷണിയാകുന്ന തരത്തിലുള്ള ഗുരുതരമായ ക്രമക്കേടുകള്‍ കണ്ടെത്തിയത്. അജ്ഞാത ഉറവിടങ്ങളില്‍ നിന്നുള്ള വെള്ളം ഉപയോഗിക്കുക, പൊതു കുടിവെള്ള ശൃംഖലയില്‍ നിന്ന് അനുവാദമില്ലാതെ വെള്ളം ശേഖരിക്കുക, ലൈസന്‍സുള്ള സ്ഥാപനങ്ങളുടെ പേരിലുള്ള കുപ്പികളില്‍ നിയമവിരുദ്ധമായി വെള്ളം നിറച്ച് വില്‍ക്കുക തുടങ്ങിയവയാണ് പ്രധാന ലംഘനങ്ങള്‍.
കുടിവെള്ള വില്‍പ്പനയുടെയും ചില്ലറ വ്യാപാരത്തിന്റെയും പേരില്‍ ലൈസന്‍സ് നേടിയ ശേഷം, അതിന്റെ മറവില്‍ വലിയ തോതിലുള്ള ഉല്‍പ്പാദന-വിതരണ ശൃംഖലകള്‍ ഇവര്‍ നടത്തിയിരുന്നതായും അന്വേഷണത്തില്‍ വ്യക്തമായി. ആരോഗ്യ മാനദണ്ഡങ്ങളൊന്നും പാലിക്കാതെയാണ് ഈ പ്ലാന്റുകള്‍ പ്രവര്‍ത്തിച്ചിരുന്നത്.
വാണിജ്യപരമായ ഒളിച്ചുകളികള്‍, ലൈസന്‍സില്ലാതെ പ്രവര്‍ത്തിക്കല്‍, നികുതി ഇന്‍വോയ്സുകള്‍ നല്‍കാതിരിക്കല്‍, തൊഴില്‍ നിയമങ്ങളുടെ ലംഘനം, ജലവിതരണ ശൃംഖലയുമായി ബന്ധപ്പെട്ട ചട്ടങ്ങളുടെ ലംഘനം തുടങ്ങിയ ഒട്ടനവധി കുറ്റകൃത്യങ്ങളും പരിശോധനയില്‍ കണ്ടെത്തിയിട്ടുണ്ട്.
Related News
