ലണ്ടന്‍: യൂറോപ്പിലുടനീളം അനുഭവപ്പെടുന്ന അതിശക്തമായ ഉഷ്ണതരംഗം ജനജീവിതത്തെ സാരമായി ബാധിക്കുന്നു. 1967-ലെ ഹീറ്റ്വേവിനുശേഷം യുകെയില്‍ ജൂണില്‍ രേഖപ്പെടുത്തുന്ന ഏറ്റവും ഉയര്‍ന്ന ചൂടാണ് ഇന്ന് അനുഭവപ്പെട്ടത്. വെസ്റ്റ് സസെക്‌സിലെ വിഗോണ്‍ഹോള്‍ട്ടില്‍ 35.8 ഡിഗ്രി സെല്‍ഷ്യസ് ചൂട് രേഖപ്പെടുത്തി. സര്‍റേയില്‍ 35.7 ഡിഗ്രി സെല്‍ഷ്യസ് ചൂട് രേഖപ്പെടുത്തിയതിന് പിന്നാലെയാണിത്. സതാംപ്ടണിലെ 35.6 ഡിഗ്രി സെല്‍ഷ്യസ് എന്ന മുന്‍ റെക്കോര്‍ഡാണ് ഇതോടെ പഴങ്കഥയായത്.

സ്‌കോട്ട്‌ലന്‍ഡിലും ഈ വര്‍ഷത്തെ ഏറ്റവും ചൂടേറിയ ദിവസമാണ് കടന്നുപോയത്. ചൊവ്വാഴ്ച അബര്‍ഡീനിലെ ഡൈസില്‍ 29.4 ഡിഗ്രി സെല്‍ഷ്യസ് ചൂട് രേഖപ്പെടുത്തി. ഫൈവി കാസില്‍, അബോയിന്‍, ലൂച്ചാര്‍സ്, എഡിന്‍ബര്‍ഗ് എന്നിവിടങ്ങളിലും ഉയര്‍ന്ന താപനില രേഖപ്പെടുത്തി.

യൂറോപ്പിലാകെ കനത്ത ചൂട്
മെയിന്‍ലാന്‍ഡ് സ്‌പെയിനില്‍ 1950-ന് ശേഷമുള്ള ഏറ്റവും ഉയര്‍ന്ന ജൂണ്‍ മാസത്തെ ശരാശരി താപനിലയാണ് രേഖപ്പെടുത്തിയത്. ബില്‍ബാവോയില്‍ താപനില 39 ഡിഗ്രി സെല്‍ഷ്യസിന് മുകളിലെത്തി. യൂറോപ്പില്‍ ഏകദേശം 94 ദശലക്ഷം ആളുകള്‍ 35 ഡിഗ്രി സെല്‍ഷ്യസിന് മുകളിലുള്ള ചൂടാണ് അനുഭവിക്കുന്നത്. 350 ദശലക്ഷത്തിലധികം ആളുകള്‍ 30 ഡിഗ്രി സെല്‍ഷ്യസിന് മുകളിലുള്ള താപനിലയെ അഭിമുഖീകരിക്കുന്നതായി എഎഫ്പി റിപ്പോര്‍ട്ട് ചെയ്യുന്നു. ഫ്രാന്‍സിലും സ്‌പെയിനിലുമാണ് സ്ഥിതി ഏറ്റവും ഗുരുതരം.

ആരോഗ്യ സംവിധാനങ്ങള്‍ ശക്തിപ്പെടുത്തണം: ലോകാരോഗ്യ സംഘടന
യൂറോപ്പിലെ ഉഷ്ണതരംഗം ജനങ്ങളുടെ ആരോഗ്യത്തിന് ഭീഷണിയാണെന്ന് ലോകാരോഗ്യ സംഘടന (WHO) മേധാവി ടെഡ്രോസ് അദാനോം ഗെബ്രിയേസസ് മുന്നറിയിപ്പ് നല്‍കി. ആഗോള ശരാശരിയേക്കാള്‍ ഇരട്ടി വേഗതയിലാണ് യൂറോപ്പിലെ താപനില ഉയരുന്നത്. കാലാവസ്ഥാ വ്യതിയാനത്തെ നേരിടാന്‍ ആരോഗ്യ സംവിധാനങ്ങള്‍ ശക്തിപ്പെടുത്തണമെന്നും അദ്ദേഹം ആവശ്യപ്പെട്ടു.

നിയമങ്ങള്‍ ലംഘിക്കപ്പെടുന്നു
ഇറ്റലിയിലെ ലാസിയോ മേഖലയില്‍ കനത്ത ചൂടിനെത്തുടര്‍ന്ന് ഉച്ചയ്ക്ക് 12.30 മുതല്‍ 4 മണി വരെ നിര്‍മ്മാണ തൊഴിലാളികള്‍ക്കും ഡെലിവറി ജീവനക്കാര്‍ക്കും ജോലി ചെയ്യുന്നതിന് വിലക്കേര്‍പ്പെടുത്തിയിരുന്നു. റോമില്‍ 16 നഗരങ്ങളില്‍ റെഡ് അലര്‍ട്ട് പ്രഖ്യാപിച്ചിരുന്നു. എന്നാല്‍, ഈ ഉത്തരവ് പലയിടത്തും ലംഘിക്കപ്പെടുന്നതായാണ് റിപ്പോര്‍ട്ട്. ഉപജീവനമാര്‍ഗ്ഗത്തിനായി പലരും കടുത്ത ചൂടിലും ജോലി തുടരാന്‍ നിര്‍ബന്ധിതരാകുന്നു.

റോമിലെ റെയില്‍വേ സ്റ്റേഷന് സമീപം 80 ഡിഗ്രി സെല്‍ഷ്യസ് വരെ ഉപരിതല താപനില അനുഭവപ്പെട്ടതായി ഗ്രീന്‍പീസ് പ്രവര്‍ത്തകര്‍ ചൂണ്ടിക്കാട്ടുന്നു. മനുഷ്യശരീരത്തിന് താങ്ങാവുന്നതിലും അപ്പുറമാണ് ഈ ചൂടെന്നും, ഏറ്റവും ദുര്‍ബലരായ വിഭാഗത്തെയാണ് കാലാവസ്ഥാ വ്യതിയാനം ഏറ്റവും കൂടുതല്‍ ബാധിക്കുന്നതെന്നും ഗ്രീന്‍പീസ് പ്രവര്‍ത്തക സിമോന അബ്ബേറ്റ് പറഞ്ഞു.