റിയാദ്: 2026-ലെ ഐക്യരാഷ്ട്രസഭയുടെ പബ്ലിക് സര്‍വീസ് അവാര്‍ഡ് സൗദി ഡാറ്റ ആന്‍ഡ് ആര്‍ട്ടിഫിഷ്യല്‍ ഇന്റലിജന്‍സ് അതോറിറ്റിക്ക് (SDAIA). അതോറിറ്റിയുടെ കീഴിലുള്ള 'നാഷണല്‍ ഡാറ്റ ബാങ്ക്', 'എസ്തിഷ്‌റാഫ്' (Estishraf) എന്നീ ഡിജിറ്റല്‍ പ്ലാറ്റ്ഫോമുകളെ മുന്‍നിര്‍ത്തിയാണ് ഈ അന്താരാഷ്ട്ര അംഗീകാരം. ഇന്നലെയാണ് യുഎന്‍ ഈ വിവരം ഔദ്യോഗികമായി അറിയിച്ചത്.

ലോകമെമ്പാടുമുള്ള 62 രാജ്യങ്ങളില്‍ നിന്നായി 700-ലധികം പദ്ധതികളെ പിന്തള്ളിയാണ് സൗദി അതോറിറ്റി ഈ നേട്ടം കൈവരിച്ചത്. സര്‍ക്കാര്‍ മേഖലയിലെ മികവിനും നൂതനമായ പ്രവര്‍ത്തനങ്ങള്‍ക്കും നല്‍കുന്ന ഏറ്റവും ഉയര്‍ന്ന അന്താരാഷ്ട്ര പുരസ്‌കാരമാണിത്. പൊതുസേവനങ്ങള്‍ മെച്ചപ്പെടുത്തുന്നതിലും സര്‍ക്കാര്‍ സംവിധാനങ്ങളുടെ കാര്യക്ഷമത വര്‍ദ്ധിപ്പിക്കുന്നതിലും മികച്ച സംഭാവനകള്‍ നല്‍കുന്ന പദ്ധതികള്‍ക്കാണ് യുഎന്‍ ഈ അവാര്‍ഡ് നല്‍കുന്നത്.

സൗദിയുടെ ആര്‍ട്ടിഫിഷ്യല്‍ ഇന്റലിജന്‍സ് വര്‍ഷമായ 2026-ല്‍ ലഭിച്ച ഈ അംഗീകാരം സൗദി അറേബ്യയുടെ സാങ്കേതിക മുന്നേറ്റത്തിലെ മറ്റൊരു നാഴികക്കല്ലാണ്.

നാഷണല്‍ ഡാറ്റ ബാങ്ക്: രാജ്യത്തെ വിവിധ സര്‍ക്കാര്‍ സ്ഥാപനങ്ങള്‍ തമ്മില്‍ സുഗമമായി വിവരങ്ങള്‍ പങ്കുവെക്കുന്നതിനും ഡാറ്റയുടെ ഗുണനിലവാരം ഉറപ്പുവരുത്തുന്നതിനും സഹായിക്കുന്ന പ്രധാന സംവിധാനമാണിത്. ഡിജിറ്റല്‍ സമ്പദ്വ്യവസ്ഥയെ ശക്തിപ്പെടുത്തുന്നതിലും കൃത്യമായ തീരുമാനങ്ങള്‍ കൈക്കൊള്ളുന്നതിലും ഈ പ്ലാറ്റ്ഫോം നിര്‍ണ്ണായക പങ്കുവഹിക്കുന്നു.

എസ്തിഷ്‌റാഫ്: ആര്‍ട്ടിഫിഷ്യല്‍ ഇന്റലിജന്‍സും ഡാറ്റാ അനലിറ്റിക്‌സും ഉപയോഗിച്ച് ഭാവിയിലെ വെല്ലുവിളികളെ മുന്‍കൂട്ടി കണ്ട് തീരുമാനങ്ങളെടുക്കാന്‍ സഹായിക്കുന്ന നൂതന സംവിധാനമാണിത്. സര്‍ക്കാരിന്റെ ആസൂത്രണ മികവും നയരൂപീകരണവും വര്‍ദ്ധിപ്പിക്കാന്‍ ഇത് സഹായിക്കുന്നു.

സൗദി കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരന്റെ നേതൃത്വത്തില്‍ സഡായക്ക് ലഭിച്ചുകൊണ്ടിരിക്കുന്ന നിരന്തരമായ പിന്തുണയാണ് ഈ ആഗോള നേട്ടത്തിന് പിന്നിലെന്ന് അതോറിറ്റി അറിയിച്ചു. സാങ്കേതികവിദ്യയില്‍ അധിഷ്ഠിതമായ ലോകത്തെ മുന്‍നിര സമ്പദ്വ്യവസ്ഥയായി സൗദിയെ മാറ്റുകയെന്ന ലക്ഷ്യത്തിലേക്കുള്ള വലിയ ചുവടുവെപ്പാണിത്. ജോര്‍ജിയയിലെ ടിബിലിസിയില്‍ നടക്കുന്ന യുഎന്‍ പബ്ലിക് സര്‍വീസ് ഫോറത്തിന്റെ ഭാഗമായി ജൂണ്‍ 25-ന് നടക്കുന്ന ഔദ്യോഗിക ചടങ്ങില്‍ സഡായ പുരസ്‌കാരം ഏറ്റുവാങ്ങും.