ജിദ്ദ: പൊന്നാനി മണ്ഡലം മുസ്ലിം ലീഗ് ജനറല്‍ സെക്രട്ടറിയും മുന്‍ എം.എസ്.എഫ് സംസ്ഥാന നേതാവുമായിരുന്ന സി.എം. യൂസഫ് സാഹിബിന്റെ നിര്യാണത്തില്‍ ജിദ്ദ പൊന്നാനി മണ്ഡലം കെ.എം.സി.സി അനുസ്മരണവും പ്രാര്‍ത്ഥനാ സദസ്സും സംഘടിപ്പിച്ചു. വിദ്യാര്‍ത്ഥി രാഷ്ട്രീയം മുതല്‍ സംഘടനയ്ക്ക് വേണ്ടി നിരവധി ത്യാഗങ്ങള്‍ സഹിച്ച നേതാവായിരുന്നു സി.എം. യൂസഫ് സാഹിബെന്ന് യോഗം അനുസ്മരിച്ചു. 'പാര്‍ട്ടി പ്രവര്‍ത്തകര്‍ക്ക് എല്ലാകാലത്തും എന്റെ വാതിലുകള്‍ തുറന്നിട്ടിരിക്കുകയാണ്' എന്ന് ആവേശത്തോടെ പറയുകയും പ്രവര്‍ത്തിക്കുകയും ചെയ്ത അദ്ദേഹം, അനന്തപുരിയില്‍ എത്തുന്ന ഏത് ലീഗ് പ്രവര്‍ത്തകനും എന്നും വലിയൊരു ആശ്രയമായിരുന്നു.
എം.എസ്.എഫ് എന്ന വിദ്യാര്‍ത്ഥി പ്രസ്ഥാനത്തിലൂടെ പൊതുരംഗത്തേക്ക് കടന്നുവന്ന് ജില്ലാതലത്തില്‍ കരുത്തുറ്റ നേതൃത്വമായി വളര്‍ന്ന അദ്ദേഹം, പിന്നീട് യൂത്ത് ലീഗിന്റെ അമരക്കാരനായും മന്ത്രിമാരുടെ പേഴ്‌സണല്‍ സ്റ്റാഫിലെ വിശ്വസ്തനായും തിളങ്ങി. ഏല്‍പ്പിച്ച ഉത്തരവാദിത്തങ്ങളിലൊക്കെയും നിഷ്‌കളങ്കമായ കര്‍മ്മകുശലതയും ദീര്‍ഘവീക്ഷണവും അടയാളപ്പെടുത്തിയ ഒരു യഥാര്‍ത്ഥ ജനനായകനായിരുന്നു യൂസഫ് സാഹിബ്. പദവികളുടെ വലിപ്പമല്ല, മറിച്ച് ചെയ്യുന്ന പ്രവര്‍ത്തികളുടെ ആത്മാര്‍ത്ഥതയാണ് ഒരാളെ ജനപ്രിയനാക്കുന്നതെന്ന് സ്വന്തം ജീവിതം കൊണ്ട് അദ്ദേഹം തെളിയിച്ചതായി അനുസ്മരണ യോഗത്തില്‍ പങ്കെടുത്തവര്‍ പറഞ്ഞു.
ഷറഫിയ ജില്ലാ കെ.എം.സി.സി ഓഫീസില്‍ നടന്ന ചടങ്ങില്‍ നാഷണല്‍ കെ.എം.സി.സി സെക്രട്ടറി നാസര്‍ വെളിയംകോട് അധ്യക്ഷത വഹിച്ചു. ടി.എം.എ റഊഫ് ഉദ്ഘാടനം ചെയ്തു. കെ.എം.സി.സിയുടെയും പൊതുരംഗത്തെയും പ്രമുഖ നേതാക്കളായ നിസാം മമ്പാട് (നാഷണല്‍ കമ്മിറ്റി വൈസ് പ്രസിഡന്റ്), ലത്തീഫ് മുസ്ലിയാരങ്ങാടി (ജിദ്ദ കെ.എം.സി.സി സെന്‍ട്രല്‍ കമ്മിറ്റി സെക്രട്ടറി), നാണി മാസ്റ്റര്‍ (മലപ്പുറം ജില്ലാ കെ.എം.സി.സി ജനറല്‍ സെക്രട്ടറി), അബ്ദുള്ള ഹിറ്റാച്ചി (കാസര്‍കോട് ജില്ലാ പ്രസിഡന്റ്), മുജീബ് പാങ്ങ് (അനീക്കസ് സെക്രട്ടറി), മുസ്തഫ (തിരൂര്‍ മണ്ഡലം സെക്രട്ടറി), മജീദ് കൂട്ടീരി (മുന്‍ മലപ്പുറം ജില്ലാ കെ.എം.സി.സി ജനറല്‍ സെക്രട്ടറി), മുഹമ്മദലി മുസ്ലിയാര്‍ (പെരിന്തല്‍മണ്ണ മണ്ഡലം കെ.എം.സി.സി പ്രസിഡന്റ്), അഷറഫ് മുല്ലപ്പള്ളി (മലപ്പുറം ജില്ലാ കെ.എം.സി.സി വൈസ് പ്രസിഡന്റ്), ഹംദാന്‍ബാബു കോട്ടക്കല്‍ (കോട്ടക്കല്‍ മണ്ഡലം ജനറല്‍ സെക്രട്ടറി), റഹ്‌മത്തലി (കൊണ്ടോട്ടി മണ്ഡലം കമ്മിറ്റി വൈസ് പ്രസിഡന്റ്), യാസിദ് തിരൂര്‍ (ജില്ലാ കെ.എം.സി.സി സെക്രട്ടറി), മജീദ് കള്ളീയില്‍ (ജില്ലാ കെ.എം.സി.സി സെക്രട്ടറി), ബേബി നീലാമ്പ്ര (ജില്ലാ കെ.എം.സി.സി ചെയര്‍മാന്‍), മുജീബ് മുതുവല്ലൂര്‍, ജംഷി കാരി, നാസര്‍ കാട്ടിപ്പരുത്തി, സി.സി റസാഖ് എന്നിവര്‍ അനുസ്മരണ പ്രഭാഷണം നടത്തി. സലീം ഗ്ലോബ് സ്വാഗതവും ഫത്താഹ് താനൂര്‍ നന്ദിയും പറഞ്ഞു.
Related News
