തിരുവനന്തപുരം: കേരള ബജറ്റിലെ ഏറ്റവും പ്രധാനപ്പെട്ട സ്വപ്നപദ്ധതികളിലൊന്നാണ് 'മിഷന് സമുദ്ര'. കേരളത്തെ ഒരു ആഗോള മാരിടൈം (കടല്ത്തീര) സാമ്പത്തിക കേന്ദ്രമാക്കി മാറ്റുക എന്നതാണ് ഈ പദ്ധതിയുടെ ലക്ഷ്യം. ഇതിനായി 400 കോടി രൂപയാണ് ബജറ്റില് വകയിരുത്തിയിരിക്കുന്നത്. കേരളത്തിന്റെ 600 കിലോമീറ്ററോളം വരുന്ന തീരപ്രദേശത്തെയും തുറമുഖങ്ങളെയും റോഡ്, റെയില്, ഉള്നാടന് ജലപാതകള് എന്നിവയുമായി ബന്ധിപ്പിച്ച് ഒരു ഏകീകൃത 'മാരിടൈം സമ്പദ്വ്യവസ്ഥ' രൂപപ്പെടുത്തുകയാണ് ലക്ഷ്യം..
വിഴിഞ്ഞം അന്താരാഷ്ട്ര തുറമുഖത്തെ മുഖ്യ കേന്ദ്രമാക്കി, അഴീക്കല്, ബേപ്പൂര് തുടങ്ങിയ പ്രധാന തുറമുഖങ്ങളെയും മറ്റ് ചെറിയ തുറമുഖങ്ങളെയും വികസിപ്പിക്കും. വിഴിഞ്ഞത്തെ ഇന്ത്യയിലെ ആദ്യത്തെ 'ഗ്രീന് ബങ്കറിങ്' തുറമുഖമാക്കി മാറ്റും. തുറമുഖങ്ങളോട് ചേര്ന്ന് സ്റ്റഫിങ് സെന്ററുകളും ഡ്രൈ പോര്ട്ടുകളും വികസിപ്പിക്കും. മദര്ഷിപ്പുകള് നിര്മ്മിക്കാന് ശേഷിയുള്ള കപ്പല് നിര്മ്മാണ കേന്ദ്രങ്ങളും ഇതിന്റെ ഭാഗമായി സ്ഥാപിക്കും.
കേരളത്തിന്റെ സമുദ്രയാത്രാ ചരിത്രം, കപ്പല് നിര്മ്മാണ പാരമ്പര്യം, വാണിജ്യ പൈതൃകം എന്നിവ സംരക്ഷിക്കുന്നതിനായി 50 കോടി രൂപ ചെലവില് ഒരു അന്താരാഷ്ട്ര മാരിടൈം മ്യൂസിയവും സ്ഥാപിക്കും.
ഈ പദ്ധതിയിലൂടെ തീരദേശ മേഖലയിലുണ്ടാകുന്ന തൊഴിലവസരങ്ങളില് തീരപ്രദേശവാസികള്ക്ക് പ്രത്യേക സംവരണം ഉറപ്പാക്കും. തുറമുഖങ്ങളെയും അടിസ്ഥാന സൗകര്യങ്ങളെയും ബന്ധിപ്പിച്ച് ഗ്രീന്ഫീല്ഡ് നഗരങ്ങള് വികസിപ്പിക്കുന്നത് വഴി സംസ്ഥാനത്തെ ഒരു സമ്പൂര്ണ്ണ 'പോര്ട്ട് സിറ്റി'യായി മാറ്റാനാണ് സര്ക്കാര് ലക്ഷ്യമിടുന്നത്. കടല് വിഭവങ്ങളെയും തുറമുഖ സൗകര്യങ്ങളെയും പരമാവധി പ്രയോജനപ്പെടുത്തി കേരളത്തിന്റെ വ്യവസായ-വാണിജ്യ മേഖലയില് വലിയ കുതിച്ചുചാട്ടം ഉണ്ടാക്കുക എന്നതാണ് 'മിഷന് സമുദ്ര'യിലൂടെ സര്ക്കാര് വിഭാവനം ചെയ്യുന്നത്.
Related News
