റിയാദ്: സൗദി അറേബ്യയുടെ നേതൃത്വത്തിലുള്ള 'കോണ്‍ജോയിന്‍ഡ് ട്വിന്‍സ് സെപ്പറേഷന്‍ പ്രോഗ്രാമി'ന്റെ (SCTP) ഭാഗമായി, ഒട്ടിപ്പിറന്ന ഫിലിപ്പീന്‍സ് ഇരട്ടകളായ ഒലിവിയ, ജിയാന മാനുവല്‍ എന്നിവരെ ആറ് മണിക്കൂര്‍ നീണ്ട സങ്കീര്‍ണ്ണമായ ശസ്ത്രക്രിയയിലൂടെ വിജയകരമായി വേര്‍പെടുത്തി. റിയാദിലെ കിംഗ് അബ്ദുല്‍ അസീസ് മെഡിക്കല്‍ സിറ്റിയിലെ കിംഗ് അബ്ദുള്ള സ്‌പെഷ്യലൈസ്ഡ് ചില്‍ഡ്രന്‍സ് ഹോസ്പിറ്റലില്‍ വെച്ചാണ് ശസ്ത്രക്രിയ നടന്നത്. 22 പേരടങ്ങുന്ന വിദഗ്ധ മെഡിക്കല്‍ സംഘമാണ് ശസ്ത്രക്രിയയ്ക്ക് നേതൃത്വം നല്‍കിയത്.

രണ്ട് വയസ്സും രണ്ട് മാസവും പ്രായമുള്ള ഇരട്ടകള്‍ക്ക് നെഞ്ചിലും വയറിലുമായിരുന്നു ഒട്ടിപ്പിറന്ന അവസ്ഥയുണ്ടായിരുന്നത്. കരള്‍ പങ്കുവെച്ചിരുന്ന ഇവര്‍ക്ക് കുടലിന്റെ ഭാഗങ്ങളും ഒന്നുചേര്‍ന്ന അവസ്ഥയിലായിരുന്നു. കൂടാതെ, ഇരട്ടകളില്‍ ഒരാള്‍ക്ക് ജന്മനായുള്ള ഹൃദയത്തകരാറുകള്‍ കൂടി ഉണ്ടായിരുന്നത് ശസ്ത്രക്രിയയെ അതീവ സങ്കീര്‍ണ്ണമാക്കിയിരുന്നു.

ശസ്ത്രക്രിയയ്ക്ക് ശേഷം കുട്ടികള്‍ മെഡിക്കല്‍ നിരീക്ഷണത്തിലായിരിക്കും. ജിയാനയ്ക്ക് വരും ദിവസങ്ങളില്‍ ഹൃദയവുമായി ബന്ധപ്പെട്ട മറ്റൊരു ശസ്ത്രക്രിയ കൂടി നടത്തേണ്ടതുണ്ട്. ഇതിനുശേഷമേ കുടുംബത്തോടൊപ്പം ഇവര്‍ക്ക് ഫിലിപ്പീന്‍സിലേക്ക് മടങ്ങാന്‍ സാധിക്കുകയുള്ളൂ.

1990-ല്‍ ആരംഭിച്ച സൗദി അറേബ്യയുടെ ഈ പ്രോഗ്രാമിന് കീഴില്‍ നടത്തുന്ന 72-ാമത്തെ ശസ്ത്രക്രിയയാണിത്. ഫിലിപ്പീന്‍സില്‍ നിന്നുള്ള നാലാമത്തെ ഇരട്ടകളാണ് ഒലിവിയയും ജിയാനയും. ഇതുവരെ 28 രാജ്യങ്ങളില്‍ നിന്നായി 158 ഇരട്ടകള്‍ക്ക് ഈ പദ്ധതിയിലൂടെ സൗദി അറേബ്യ സൗജന്യ ചികിത്സയും ശസ്ത്രക്രിയയും നല്‍കിയിട്ടുണ്ട്. സൗദി വിഷന്‍ 2030-ന്റെ ഭാഗമായി ആരോഗ്യമേഖലയില്‍ രാജ്യം കൈവരിച്ച വലിയൊരു നേട്ടമാണിതെന്ന് അധികൃതര്‍ അറിയിച്ചു.

മക്കള്‍ക്ക് സാധാരണ ജീവിതം നയിക്കാന്‍ അവസരമൊരുക്കിയ സൗദി ഭരണാധികാരികള്‍ക്കും ഡോക്ടര്‍മാര്‍ക്കും കുട്ടികളുടെ മാതാവായ ജിനലിന്‍ മാനുവല്‍ നന്ദി അറിയിച്ചു.