ലോസ് ഏഞ്ചല്‍സ്: കാലിഫോര്‍ണിയയിലെ എഡ്വേര്‍ഡ്സ് എയര്‍ഫോഴ്സ് ബേസില്‍ നിന്ന് പറന്നുയര്‍ന്നതിന് പിന്നാലെ യുഎസ് വ്യോമസേനയുടെ ബി-52 സ്ട്രാറ്റോഫോര്‍ട്ടസ് ബോംബര്‍ വിമാനം തകര്‍ന്നു. അപകടത്തില്‍ വിമാനത്തിലുണ്ടായിരുന്ന എട്ടുപേരും മരിച്ചതായാണ് പ്രാഥമിക നിഗമനം.
തിങ്കളാഴ്ച പ്രാദേശിക സമയം രാവിലെ 11:20-ഓടെയാണ് അപകടം നടന്നത്. ലോസ് ഏഞ്ചല്‍സിന് ഏകദേശം 100 മൈല്‍ വടക്കുമാറി സ്ഥിതി ചെയ്യുന്ന എഡ്വേര്‍ഡ്സ് എയര്‍ഫോഴ്സ് ബേസില്‍ നിന്ന് പറന്നുയര്‍ന്ന ഉടന്‍ തന്നെ വിമാനം തകര്‍ന്നു വീഴുകയായിരുന്നു. അപകടത്തില്‍ ആരും അതിജീവിക്കാന്‍ സാധ്യതയില്ലെന്ന് വ്യോമസേന പ്രസ്താവനയില്‍ അറിയിച്ചു. സംഭവസ്ഥലത്തുനിന്നുള്ള ദൃശ്യങ്ങളില്‍ വിമാനം പൂര്‍ണ്ണമായും തകര്‍ന്നടിഞ്ഞതായി കാണാം. അപകടത്തെത്തുടര്‍ന്ന് മരുഭൂമിയില്‍ വലിയ തോതില്‍ തീയും പുകയും ഉയര്‍ന്നു. എമര്‍ജന്‍സി സംഘങ്ങള്‍ സ്ഥലത്തെത്തി രക്ഷാപ്രവര്‍ത്തനങ്ങള്‍ നടത്തിവരികയാണ്.
വിമാനത്തിലുണ്ടായിരുന്ന ക്രൂ അംഗങ്ങളെക്കുറിച്ചുള്ള വിവരങ്ങളോ, വിമാനത്തില്‍ ആയുധങ്ങള്‍ ഉണ്ടായിരുന്നോ എന്നോ ഉള്ള കാര്യത്തില്‍ വ്യോമസേന ഔദ്യോഗികമായി പ്രതികരിച്ചിട്ടില്ല. അപകടത്തെത്തുടര്‍ന്ന് എഡ്വേര്‍ഡ്സ് എയര്‍ഫോഴ്സ് ബേസിലെ വ്യോമയാന പ്രവര്‍ത്തനങ്ങള്‍ താല്‍ക്കാലികമായി നിര്‍ത്തിവെച്ചു. സന്ദര്‍ശകര്‍ക്ക് നിയന്ത്രണവും ഏര്‍പ്പെടുത്തിയിട്ടുണ്ട്.
പറന്നുയര്‍ന്ന ഉടന്‍ വിമാനം തകര്‍ന്നത് വിമാനത്തിന്റെ നിയന്ത്രണ സംവിധാനത്തിലുണ്ടായ തകരാറാകാന്‍ സാധ്യതയുണ്ടെന്ന് വ്യോമയാന സുരക്ഷാ വിദഗ്ധന്‍ ജെഫ് ഗസെറ്റി പറഞ്ഞു. എന്‍ജിന്‍ തകരാറോ, പരീക്ഷണാര്‍ത്ഥം വിമാനത്തില്‍ ഉണ്ടായിരുന്ന ഉപകരണങ്ങളിലുണ്ടായ സാങ്കേതിക പ്രശ്‌നങ്ങളോ ആയിരിക്കാം അപകടകാരണമെന്നും അദ്ദേഹം കൂട്ടിച്ചേര്‍ത്തു.
1955-ല്‍ സേനയുടെ ഭാഗമായ ബി-52 ബോംബര്‍ അമേരിക്കന്‍ വ്യോമസേനയുടെ കരുത്തുറ്റ വിമാനങ്ങളിലൊന്നാണ്. ആണവ-സാമ്പ്രദായിക ആയുധങ്ങള്‍ വഹിക്കാന്‍ ശേഷിയുള്ള ഈ വിമാനം വിയറ്റ്‌നാം യുദ്ധം മുതല്‍ ഇറാനുമായി ബന്ധപ്പെട്ട സമീപകാല പ്രവര്‍ത്തനങ്ങള്‍ വരെ പല ഘട്ടങ്ങളിലും ഉപയോഗിച്ചിട്ടുണ്ട്. സംഭവത്തില്‍ സമഗ്രമായ സൈനിക അന്വേഷണം ആരംഭിച്ചിട്ടുണ്ട്.
.jpg)
Related News
