ജര്‍മ്മനിയിലെ വിവിധ ഹോട്ടലുകളില്‍ ഷെഫ് തസ്തികയിലുള്ള 20 ഒഴിവുകളിലേക്ക് സംസ്ഥാന സര്‍ക്കാര്‍ സ്ഥാപനമായ നോര്‍ക്ക റൂട്ട്‌സ് റിക്രൂട്ട്മെന്റ് സംഘടിപ്പിക്കുന്നു. താല്പര്യമുള്ള ഉദ്യോഗാര്‍ത്ഥികള്‍ക്ക് 2026 ജൂണ്‍ 20 വരെ അപേക്ഷിക്കാം.

യോഗ്യതകള്‍:
വിദ്യാഭ്യാസ യോഗ്യത: ഹോട്ടല്‍ മാനേജ്മെന്റ്, ഹോട്ടല്‍ മാനേജ്മെന്റ് & കാറ്ററിംഗ് ടെക്‌നോളജി അല്ലെങ്കില്‍ കാറ്ററിംഗ് & ഷെഫ് മേഖലയില്‍ ബിരുദം (മൂന്ന് അല്ലെങ്കില്‍ നാല് വര്‍ഷത്തെ കോഴ്‌സ്). പ്രായപരിധി: 2026 മെയ് 31-നകം 35 വയസ്സ് കവിയരുത്. മറ്റ് നിബന്ധനകള്‍: നിലവില്‍ ഇന്ത്യയില്‍ താമസിക്കുന്നവര്‍ക്ക് മാത്രമേ അപേക്ഷിക്കാന്‍ അര്‍ഹതയുള്ളൂ. നേരത്തെ അപേക്ഷിച്ചവര്‍ വീണ്ടും അപേക്ഷിക്കേണ്ടതില്ല.

ഭാഷാ യോഗ്യത:
അപേക്ഷ സമര്‍പ്പിക്കുന്നതിന് ജര്‍മ്മന്‍ ഭാഷാ യോഗ്യത അനിവാര്യമല്ല. എങ്കിലും, ജര്‍മ്മന്‍ ഭാഷാ പരിജ്ഞാനമുള്ളവര്‍ക്ക് (A1, A2, B1, B2 തലങ്ങള്‍) മുന്‍ഗണന ലഭിക്കും. തിരഞ്ഞെടുക്കപ്പെടുന്ന ഉദ്യോഗാര്‍ത്ഥികള്‍ ജര്‍മ്മനിയിലേക്ക് പോകുന്നതിന് മുന്‍പായി ബി-വണ്‍ (B1) തലം വരെയുള്ള ജര്‍മ്മന്‍ ഭാഷാ പഠനം പൂര്‍ത്തിയാക്കാന്‍ തയ്യാറായിരിക്കണം.

പദ്ധതിയുടെ പ്രത്യേകതകള്‍:
ബി-വണ്‍ വരെയുള്ള ജര്‍മ്മന്‍ ഭാഷാ പരിശീലനം, യോഗ്യതകള്‍ അംഗീകരിക്കുന്നതിനുള്ള നടപടിക്രമങ്ങള്‍, വിസ പ്രോസസ്സിംഗ്, ജോബ് മാച്ചിംഗ്, അഭിമുഖങ്ങള്‍, ജര്‍മ്മനിയിലെത്തിയ ശേഷമുള്ള ഇന്റഗ്രേഷന്‍, താമസ സൗകര്യം, കുടുംബാംഗങ്ങളെ കൊണ്ടുപോകുന്നതിനുള്ള സഹായം എന്നിവ ഈ പദ്ധതി വഴി ലഭിക്കും. ജര്‍മ്മന്‍ സര്‍ക്കാരിന്റെ 'ഹാന്‍ഡ് ഇന്‍ ഹാന്‍ഡ് ഫോര്‍ ഇന്റര്‍നാഷണല്‍ ടാലന്റ്‌സ്' (HiH) പ്രോഗ്രാമിന്റെ ഭാഗമായി ഇന്‍ഡോ-ജര്‍മ്മന്‍ ചേംബര്‍ ഓഫ് കൊമേഴ്സുമായി സഹകരിച്ചാണ് ഈ റിക്രൂട്ട്മെന്റ് നടപ്പിലാക്കുന്നത്.

അപേക്ഷിക്കുന്ന വിധം:
വിശദമായ ബയോഡാറ്റ , വിദ്യാഭ്യാസം, പ്രവൃത്തിപരിചയം, പാസ്സ്‌പോര്‍ട്ട്, ഭാഷാ യോഗ്യത എന്നിവയുടെ പകര്‍പ്പുകള്‍ സഹിതം നോര്‍ക്ക റൂട്ട്‌സിന്റെ ഔദ്യോഗിക വെബ്‌സൈറ്റായ www.norkaroots.kerala.gov.in hഴി അപേക്ഷിക്കാം.

കൂടുതല്‍ വിവരങ്ങള്‍ക്ക്: നോര്‍ക്ക റിക്രൂട്ട്മെന്റ് വിഭാഗം: 0471-2770536, 539, 540, 577 (ഓഫീസ് സമയങ്ങളില്‍ മാത്രം). നോര്‍ക്ക ഗ്ലോബല്‍ കോണ്‍ടാക്റ്റ് സെന്റര്‍ (24 മണിക്കൂര്‍): 1800 425 3939 (ഇന്ത്യയില്‍ നിന്ന്), +91-8802 012 345 (വിദേശത്തുനിന്ന് - മിസ്ഡ് കോള്‍ സര്‍വീസ്).