ന്യൂഡല്‍ഹി: മധ്യപ്രദേശില്‍ നിന്നുള്ള രാജ്യസഭാ സ്ഥാനാര്‍ത്ഥി മീനാക്ഷി നടരാജന്റെ നാമനിര്‍ദ്ദേശ പത്രിക തള്ളിയ സംഭവത്തില്‍ ബിജെപിയും തെരഞ്ഞെടുപ്പ് കമ്മീഷനും ഒത്തുകളിക്കുകയാണെന്ന് കോണ്‍ഗ്രസ് ആരോപിച്ചു. 'സീറ്റ് ചോരണം' (സീറ്റ് കവര്‍ച്ച) നടന്നുവെന്ന് ആരോപിച്ച കോണ്‍ഗ്രസ്, പത്രിക തള്ളിയ നടപടി തികച്ചും അയുക്തികവും പക്ഷപാതപരവുമാണെന്ന് വാര്‍ത്താസമ്മേളനത്തില്‍ പറഞ്ഞു.
താന്‍ ഫോം 26 കൃത്യമായി പൂരിപ്പിച്ചിരുന്നുവെന്നും, സ്വകാര്യ പരാതികളെക്കുറിച്ച് വിവരങ്ങള്‍ നല്‍കാന്‍ അതില്‍ കോളമില്ലെന്നും മീനാക്ഷി നടരാജന് വ്യക്തമാക്കി. തനിക്കെതിരെ ക്രിമിനല്‍ കേസുകളൊന്നും നിലവിലില്ല. ഹൈദരാബാദില്‍ രജിസ്റ്റര്‍ ചെയ്‌തെന്ന് പറയപ്പെടുന്ന കേസില്‍ കോടതി ഇതുവരെ കേസെടുത്തിട്ടില്ല. അതിനാല്‍ വെളിപ്പെടുത്തേണ്ട കാര്യമില്ല. ബിജെപിക്ക് ഭൂരിപക്ഷമില്ലാത്ത മൂന്നാമത്തെ സീറ്റ് കവര്‍ന്നെടുക്കാന്‍ തെരഞ്ഞെടുപ്പ് കമ്മീഷനെ ഉപയോഗിക്കുകയായിരുന്നുവെന്നും അവര്‍ കൂട്ടിച്ചേര്‍ത്തു.
ഇന്ത്യന്‍ രാഷ്ട്രീയ ചരിത്രത്തില്‍ ആദ്യമായാണ് ഇത്തരമൊരു സംഭവം നടക്കുന്നത്. ബിജെപിയുടെ തന്ത്രങ്ങളെ ഭയന്നാണ് അവര്‍ ഇത്തരം നടപടികളിലേക്ക് നീങ്ങിയതെന്ന് മധ്യപ്രദേശ് കോണ്‍ഗ്രസ് അധ്യക്ഷന്‍ ജിതു പട്വാരി പറഞ്ഞു. രാജ്യത്ത് നിലവിലുള്ളത് 'തെരഞ്ഞെടുപ്പ് ഏകാധിപത്യ'മാണെന്ന് കോണ്‍ഗ്രസ് നിയമസഭാ കക്ഷി നേതാവ് ഉമങ് സിംഗാര്‍ ആരോപിച്ചു.
സുപ്രീം കോടതിയില്‍ തിരിച്ചടി
നാമനിര്‍ദ്ദേശ പത്രിക തള്ളിയതിനെതിരെ മീനാക്ഷി നടരാജന് നല്‍കിയ ഹര്‍ജി സുപ്രീം കോടതി തള്ളി. ജസ്റ്റിസുമാരായ പ്രശാന്ത് കുമാര്‍ മിശ്ര, എ.എസ്. ചന്ദ്രൂര്‍കര്‍ എന്നിവരടങ്ങിയ ബെഞ്ചാണ് ഹര്‍ജി പരിഗണിക്കാന്‍ വിസമ്മതിച്ചത്. തെരഞ്ഞെടുപ്പ് ട്രൈബ്യൂണലില്‍ തെരഞ്ഞെടുപ്പ് ഹര്‍ജിയായി ഇക്കാര്യം ഉന്നയിക്കാന്‍ കോടതി നിര്‍ദ്ദേശിച്ചു.
വാദം കേള്‍ക്കുന്നതിനിടെ, മീനാക്ഷി നടരാജന് വേണ്ടി ഹാജരായ മുതിര്‍ന്ന അഭിഭാഷകന്‍ ഡോ. അഭിഷേക് മനു സിംഗ്വി വാദിച്ചത് ഇപ്രകാരമാണ്: 'നിയമപ്രകാരം കോടതി കേസെടുക്കുന്നതിന് മുന്‍പ് തന്നെ ക്രിമിനല്‍ കേസ് എന്ന് കണക്കാക്കാനാവില്ല. പുതിയ നിയമപ്രകാരം പ്രതിയെ കേള്‍ക്കാതെ കേസെടുക്കാന്‍ പാടില്ല. അങ്ങനെയൊന്ന് നടന്നിട്ടില്ലാത്ത സ്ഥിതിക്ക് പത്രികയില്‍ ഇത് രേഖപ്പെടുത്തേണ്ടതില്ല.' എന്നാല്‍ ഈ വാദങ്ങള്‍ കോടതി അംഗീകരിച്ചില്ല.
നേരത്തെ, മധ്യപ്രദേശ് നിയമസഭാ പ്രിന്‍സിപ്പല്‍ സെക്രട്ടറി കൂടിയായ റിട്ടേണിംഗ് ഓഫീസര്‍ ജൂണ്‍ 9-നാണ് മീനാക്ഷി നടരാജന്റെ പത്രിക തള്ളിയത്. പിന്നാലെ, ബിജെപി സ്ഥാനാര്‍ത്ഥികളായ തരുണ്‍ ചുഗ്, രജനീഷ് അഗര്‍വാള്‍, മഹേഷ് കേവത് എന്നിവരെ എതിരില്ലാതെ തെരഞ്ഞെടുക്കപ്പെട്ടതായും പ്രഖ്യാപിച്ചു.
.jpg)
Related News
