കാണ്പൂര്- അഞ്ചുലക്ഷം രൂപ വിലമതിക്കുന്ന സ്വര്ണ്ണമാലക്ക് വേണ്ടി കമ്പ്യൂട്ടര് കോച്ചിംഗ് സെന്റര് ഉടമയായ പ്രകാശ് ചന്ദ്ര ഗുപ്തയെ ഉറ്റസുഹൃത്ത് മോഹിത് ദ്വിവേദി കൊലപ്പെടുത്തി. യൂട്യൂബ് നോക്കി കൃത്യമായി ആസൂത്രണം ചെയ്ത്, ബുര്ഖയും ധരിച്ചാണ് മോഹിത് കൊലപാതകം നടത്തിയത്. എന്നാല് സിസിടിവി ദൃശ്യങ്ങളില് പതിഞ്ഞ ഇയാളുടെ പുരുഷന്മാരുടേതിന് സമാനമായ നടത്തമാണ് പോലീസിന് സംശയമുണ്ടാക്കിയതും ഒടുവില് പ്രതിയെ കുടുക്കിയതും. കാണ്പൂരിലാണ് 18 വര്ഷത്തെ ദീര്ഘകാല സൗഹൃദം കൊലപാതകത്തില് കലാശിച്ച ഈ ഞെട്ടിക്കുന്ന സംഭവം നടന്നത്.
മെയ് 31-ന് ഐപിഎല് ഫൈനല് നടക്കുന്ന രാത്രിയിലാണ് മോഹിത് തന്റെ ക്രൂരമായ പ്ലാന് നടപ്പാക്കിയത്. മത്സരം കാണാനായി പ്രകാശ് രാത്രി കോച്ചിംഗ് ഇന്സ്റ്റിറ്റ്യൂട്ടില് തന്നെ ഉണ്ടാകുമെന്ന് മനസ്സിലാക്കിയ പ്രതി, തന്റെ മുഖം മറയ്ക്കാന് ബുര്ഖയും സ്ത്രീകളുടെ ചെരുപ്പും ധരിച്ചാണ് അവിടെയെത്തിയത്. ലഹരിയിലായിരുന്ന പ്രകാശിന്റെ കഴുത്തിലെ കനത്ത സ്വര്ണ്ണമാല തട്ടിയെടുക്കാന് ശ്രമിക്കുന്നതിനിടെ ഇരുവരും തമ്മില് കടുത്ത കൈയാങ്കളിയുണ്ടായി. ഇതിനിടയില് മോഹിത് ശക്തമായി തള്ളിയതിനെ തുടര്ന്ന് നിലത്തുവീണ പ്രകാശിന് തലയ്ക്ക് ഗുരുതരമായി പരിക്കേല്ക്കുകയും രക്തം വാര്ന്ന് മരണപ്പെടുകയുമായിരുന്നു. തുടര്ന്ന് സ്വര്ണ്ണമാലയും ബ്രേസ്ലെറ്റുമായി പ്രതി അവിടെനിന്ന് രക്ഷപ്പെട്ടു.
പിറ്റേന്ന് രാവിലെയാണ് പ്രകാശിന്റെ മൃതദേഹം രക്തത്തില് കുളിച്ച നിലയില് ബന്ധുക്കള് കണ്ടെത്തിയത്. ആദ്യം ഇതൊരു സാധാരണ അപകട മരണമാണെന്ന് പോലീസ് കരുതിയെങ്കിലും, ശരീരത്തിലുണ്ടായിരുന്ന സ്വര്ണ്ണാഭരണങ്ങള് കാണാതായത് കൊലപാതകമാണെന്ന സംശയത്തിലേക്ക് വഴിമാറ്റി. തുടര്ന്ന് സീനിയര് പോലീസ് ഉദ്യോഗസ്ഥനായ രഘുബീര് ലാലിന്റെ നേതൃത്വത്തില് പ്രദേശത്തെ സിസിടിവി ദൃശ്യങ്ങള് പരിശോധിച്ചപ്പോഴാണ് ബുര്ഖ ധരിച്ച രൂപം ശ്രദ്ധയില്പ്പെട്ടത്. പര്ദ്ദയ്ക്കുള്ളിലെ വ്യക്തിയുടെ പുരുഷത്വമുള്ള നടത്തം പോലീസിന് ശക്തമായ സൂചന നല്കി. നൂറിലധികം സിസിടിവി ക്യാമറകള് പിന്തുടര്ന്ന് നടത്തിയ അന്വേഷണത്തിലാണ് മോഹിതിലേക്ക് പോലീസ് എത്തിയത്.
തന്റെ ബുദ്ധിപരമായ പ്ലാനില് ആര്ക്കും സംശയം തോന്നില്ലെന്ന അമിത ആത്മവിശ്വാസത്തിലായിരുന്നു മോഹിത്. കൊലപാതകത്തിന് ശേഷം ഒന്നുമറിയാത്തതുപോലെ ഇയാള് പ്രകാശിന്റെ വീട്ടുകാരെ ആശ്വസിപ്പിക്കാനും പോലീസുകാരുമായി സംസാരിക്കാനും എത്തിയിരുന്നു. തൊട്ടടുത്ത ദിവസം അധ്യാപക യോഗ്യതാ പരീക്ഷ എഴുതുകയും ലഖ്നൗവിലേക്ക് യാത്ര ചെയ്യുകയും ചെയ്തു. എന്നാല് പോലീസിന്റെ കൃത്യമായ അന്വേഷണത്തില് പ്രതി അഴിക്കുള്ളിലായി. അത്യാഗ്രഹത്തിന്റെ പേരില് 18 വര്ഷത്തെ സൗഹൃദത്തെയാണ് മോഹിത് ഇല്ലാതാക്കിയതെന്നും ഇനി തങ്ങള്ക്ക് ആരെയാണ് വിശ്വസിക്കാന് കഴിയുകയെന്നും പ്രകാശിന്റെ കുടുംബം കണ്ണീരോടെ ചോദിക്കുന്നു.
Related News
