കൊച്ചി: പരിശുദ്ധ ഹജ്ജ് കര്‍മ്മം പൂര്‍ത്തിയാക്കിയതിന് പിന്നാലെ എടവനക്കാട് സ്വദേശിനി മക്കയില്‍ നിര്യാതയായി. കന്നത്തു പടിക്കല്‍ പരേതനായ അന്‍വര്‍ ഹുസൈന്റെ ഭാര്യ ഡോ. സുലേഖ (70) ആണ് പുണ്യഭൂമിയില്‍ വെച്ച് പ്രവാചകന്റെ ജീവിതവഴികളിലൂടെയുള്ള യാത്രയ്‌ക്കൊടുവില്‍ ഇഹലോകവാസം വെടിഞ്ഞത്.
മുഹമ്മദ് ഷാക്കിര്‍ (ഷാര്‍ജ), സൈറ സബാഹ് (ഷാര്‍ജ) എന്നിവര്‍ മക്കളാണ്. സബാഹ് മുഹമ്മദ്, ഷൈല ഷാക്കിര്‍ എന്നിവര്‍ മരുമക്കളാണ്. ഖബറടക്കം ഇന്ന് (ഞായര്‍) മക്കയില്‍ നടക്കും. ഡോ. സുലേഖയുടെ നിര്യാണത്തെ തുടര്‍ന്ന് ഇന്ന് അസര്‍ നമസ്‌കാരത്തിന് ശേഷം എടവനക്കാട് മഹല്ല് ജുമാ മസ്ജിദില്‍ മയ്യത്ത് നമസ്‌കാരം നടക്കും. വൈകീട്ട് 5 മണിക്ക് എടവനക്കാട് ഇല്ലത്തുപടിയിലുള്ള ഡോ. സുലേഖയുടെ വസതിയില്‍ സ്ത്രീകള്‍ക്കായും മയ്യത്ത് നമസ്‌കാരം ക്രമീകരിച്ചിട്ടുണ്ട്.
നാടിന്റെ പ്രിയപ്പെട്ട 'സുലേഖത്ത'; കണ്ണീരോടെ എടവനക്കാട്
ഹോമിയോ ചികിത്സാ രംഗത്ത് ദീര്‍ഘകാലം സേവനമനുഷ്ഠിച്ച ഡോ. സുലേഖ നാട്ടുകാര്‍ക്ക് വെറുമൊരു ഡോക്ടര്‍ മാത്രമായിരുന്നില്ല, ഏവര്‍ക്കും താങ്ങും തണലുമായിരുന്ന പ്രിയപ്പെട്ട 'സുലേഖത്ത'യായിരുന്നു. നിരാലംബരെയും നിരാശ്രയരെയും ചേര്‍ത്തുനിര്‍ത്തിയ അവര്‍ ഉദാരതയുടെയും ജീവകാരുണ്യത്തിന്റെയും വലിയൊരു മാതൃകയാണ് നാട്ടില്‍ അവശേഷിപ്പിച്ചു പോകുന്നത്. നാട്ടിലെ തണൽ വെൽഫെയർ സൊസൈറ്റി ഉള്‍പ്പെടെയുള്ള ജീവകാരുണ്യ പ്രവര്‍ത്തനങ്ങളില്‍ സജീവ സാന്നിധ്യമായിരുന്നു.
ആര്‍ക്കും എപ്പോഴും കടന്നുചെല്ലാനും എന്തും തുറന്നു പറയാനുമുള്ള ഒരിടമായിരുന്നു സുലേഖത്തയുടെ വീട്. ജാതി-മത ഭേദമന്യേ എല്ലാവരെയും ഒരു കുടുംബാംഗത്തെപ്പോലെയാണ് അവര്‍ കണ്ടിരുന്നത്. കാണുമ്പോഴൊക്കെയും സമ്പൂര്‍ണ്ണ മതസംഹിതയുടെ വിവിധ തലങ്ങളെക്കുറിച്ചും ജീവകാരുണ്യ പ്രവര്‍ത്തനങ്ങളെക്കുറിച്ചും സംസാരിക്കാന്‍ അവര്‍ക്ക് ഏറെ താല്പര്യമുണ്ടായിരുന്നു.
ഹജ്ജിനായി പുണ്യഭൂമിയിലെത്തിയ ശേഷം കഴിഞ്ഞ ദിവസങ്ങളില്‍ നാട്ടിലെ സുഹൃത്തുക്കള്‍ക്കും ബന്ധുക്കള്‍ക്കും അയച്ച വാട്സാപ്പ് സന്ദേശങ്ങളില്‍ വീണ്ടുമൊരു ഹജ്ജ് നിര്‍വ്വഹിക്കാന്‍ കഴിഞ്ഞതിന്റെ വലിയ സന്തോഷം അവര്‍ പങ്കുവെച്ചിരുന്നു. യാത്ര തിരിക്കുന്നതിന് മുന്‍പ് പ്രിയപ്പെട്ടവരെ നേരില്‍ കാണാന്‍ സാധിക്കാത്തതിന്റെ വിഷമവും അവര്‍ ശബ്ദസന്ദേശങ്ങളില്‍ പങ്കുവെച്ചിരുന്നു.
ഹജ്ജ് മാസത്തിലെ പുണ്യദിനങ്ങളില്‍, പുണ്യഭൂമിയില്‍ വെച്ച് തന്നെ അന്ത്യമുണ്ടാകണമെന്ന ആഗ്രഹ സഫലീകരണം പോലെയാണ് പ്രിയപ്പെട്ട ഡോക്ടറുടെ വിയോഗമെന്ന് ജന്മനാട് ഓര്‍ക്കുന്നു. മാതൃകകളേറെ ബാക്കിവെച്ച് വിടപറഞ്ഞ ആ സാന്ത്വനമഹതിയുടെ വിയോഗത്തില്‍ കണ്ണീരണിഞ്ഞ പ്രാര്‍ത്ഥനകളോടെ പ്രവാസി സമൂഹവും ജന്മനാടും പങ്കുചേരുന്നു.
- റസാഖ് എടവനക്കാട്
Related News
