മിന- തര്‍വിയാ ദിനമായ തിങ്കളാഴ്ച മിനയില്‍ 45 ഡിഗ്രി സെല്‍ഷ്യസ് താപനില രേഖപ്പെടുത്തിയതായി ദേശീയ കാലാവസ്ഥാ നിരീക്ഷണ കേന്ദ്രം (NCM) വെളിപ്പെടുത്തി. ഈ സമയത്ത് കാറ്റിന്റെ വേഗത മണിക്കൂറില്‍ 26 കിലോമീറ്ററും അന്തരീക്ഷത്തിലെ ഈര്‍പ്പത്തിന്റെ അളവ് (ഹ്യുമിഡിറ്റി) പരമാവധി 36 ശതമാനവും ആയിരുന്നു.

ഹജ്ജ് സീസണ്‍ ആരംഭിച്ചത് മുതല്‍ പുണ്യസ്ഥലങ്ങളില്‍ വെച്ച് ഏറ്റവും കൂടുതല്‍ ചൂട് അനുഭവപ്പെടുന്നത് അറഫയിലാണെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. കഴിഞ്ഞ ശനിയാഴ്ച ഇവിടെ 48 ഡിഗ്രി സെല്‍ഷ്യസ് താപനില രേഖപ്പെടുത്തിയിരുന്നു. പ്രാഥമിക വിവരങ്ങള്‍ പ്രകാരം അറഫാ ദിനമായ നാളെ (ചൊവ്വാഴ്ച) ഏറ്റവും ചൂടുകൂടിയ സമയങ്ങളില്‍ ഇവിടുത്തെ താപനില ഏകദേശം 45 ഡിഗ്രി സെല്‍ഷ്യസ് വരെ ഉയര്‍ന്നേക്കാമെന്നാണ് സൂചന.

പുണ്യസ്ഥലങ്ങളിലെ കാലാവസ്ഥാ വ്യതിയാനങ്ങള്‍ അത്യാധുനിക നിരീക്ഷണ സംവിധാനങ്ങളിലൂടെ തങ്ങള്‍ 24 മണിക്കൂറും നിരീക്ഷിച്ചുവരികയാണെന്ന് ദേശീയ കാലാവസ്ഥാ നിരീക്ഷണ കേന്ദ്രം വക്താവായ ഹുസൈന്‍ അല്‍-ഖഹ്താനി അറിയിച്ചു. സൂര്യാഘാതവും കടുത്ത ചൂട് മൂലമുള്ള അസ്വസ്ഥതകളും ഒഴിവാക്കാന്‍ തീര്‍ത്ഥാടകര്‍ മുന്‍കരുതല്‍ നിര്‍ദ്ദേശങ്ങള്‍ കര്‍ശനമായി പാലിക്കണമെന്നും, ഉച്ചസമയങ്ങളില്‍ നേരിട്ട് വെയില്‍ കൊള്ളുന്നത് ഒഴിവാക്കണമെന്നും, ധാരാളം വെള്ളം കുടിക്കണമെന്നും, കുടകള്‍ ഉപയോഗിക്കണമെന്നും അദ്ദേഹം അഭ്യര്‍ത്ഥിച്ചു.