ജിദ്ദ: ഈ വര്‍ഷത്തെ ഹജ്ജ് സേവന പ്രവര്‍ത്തനങ്ങള്‍ക്കായി രജിസ്റ്റര്‍ ചെയ്ത വളണ്ടിയര്‍മാരുടെ സംഗമം ഷറഫിയ്യയില്‍ നടന്നു. ഔദ്യോഗിക അംഗീകാരത്തോടെയുള്ള വളണ്ടിയര്‍ കോറിന് ആവശ്യമായ നിര്‍ദ്ദേശങ്ങളും പരിശീലനവും സംഗമത്തില്‍ നല്‍കി.
അറഫ, മുസ്ദലിഫ, മിന എന്നിവിടങ്ങളിലെയും മശാഇര്‍ റെയില്‍വേയിലെയും സേവന പ്രവര്‍ത്തനങ്ങള്‍ക്കായി ജിദ്ദയില്‍ നിന്നുള്ള വളണ്ടിയര്‍മാരെ വിന്യസിക്കും. തീര്‍ത്ഥാടകര്‍ക്കായി വിതരണം ചെയ്യുന്നതിനുള്ള കഞ്ഞിക്കായുള്ള ഒരുക്കങ്ങള്‍ പൂര്‍ത്തിയായതായും, അതിനായി പ്രത്യേക വിങ്ങിനെ ചുമതലപ്പെടുത്തിയതായും ഭാരവാഹികള്‍ അറിയിച്ചു. വനിതകള്‍ അടക്കമുള്ള വളണ്ടിയര്‍മാര്‍ വാക്‌സിനേഷന്‍ ഉള്‍പ്പെടെയുള്ള എല്ലാ മുന്നൊരുക്കങ്ങളും പൂര്‍ത്തിയാക്കിയാണ് സജ്ജമായിരിക്കുന്നത്.
നേരത്തെ ജിദ്ദ കിംഗ് അബ്ദുല്‍ അസീസ് അന്താരാഷ്ട്ര വിമാനത്താവളത്തിലെത്തിയ എണ്‍പതിനായിരത്തിലധികം ഇന്ത്യന്‍ തീര്‍ത്ഥാടകരെ സ്വീകരിച്ച് ആവശ്യമായ സഹായങ്ങളും ലഘുഭക്ഷണ വിതരണവും നടത്തി ജിദ്ദ കെഎംസിസി എയര്‍പോര്‍ട്ട് വിങ് സജീവ സാന്നിധ്യമായിരുന്നു. വനിതാ വളണ്ടിയര്‍മാര്‍ ഉള്‍പ്പെടെ നിരവധി പ്രവര്‍ത്തകരുടെ മുഴുവന്‍ സമയ സേവന പ്രവര്‍ത്തനങ്ങളാണ് കഴിഞ്ഞ ഒരു മാസമായി വിമാനത്താവളത്തില്‍ നടന്നുവരുന്നത്.
ഹജ്ജ് വളണ്ടിയര്‍ സംഗമം വി.പി. അബ്ദുറഹിമാന്‍ ഉദ്ഘാടനം ചെയ്തു. സി.കെ. റസാഖ് മാസ്റ്റര്‍ ചടങ്ങില്‍ അധ്യക്ഷത വഹിച്ചു. ശിഹാബ് താമരക്കുളം, സിറാജ് കണ്ണവം എന്നിവര്‍ പരിശീലനത്തിന് നേതൃത്വം നല്‍കി. ഹസ്സന്‍ ബത്തേരി, ലത്തീഫ് കാളരാന്തിരി, ഷബീര്‍ അലി എന്നിവര്‍ സംസാരിച്ചു. ഇസ്ഹാഖ് പൂണ്ടോളി സ്വാഗതവും സാബില്‍ മമ്പാട് നന്ദിയും പറഞ്ഞു.
Related News
