ജിദ്ദ- ഈ വര്‍ഷത്തെ വിശുദ്ധ ഹജ്ജ് കര്‍മ്മങ്ങള്‍ക്ക് നാളെ (തിങ്കളാഴ്ച) തുടക്കമാവുകയാണ്. ലോകത്തിന്റെ വിവിധ ഭാഗങ്ങളില്‍ നിന്നുള്ള ലക്ഷക്കണക്കിന് തീര്‍ത്ഥാടകര്‍ ഇതിനോടകം തന്നെ മക്കയില്‍ എത്തിച്ചേര്‍ന്നിട്ടുണ്ട്. കഴിഞ്ഞ ദിവസം വരെയുള്ള കണക്കനുസരിച്ച് ഏകദേശം 16 ലക്ഷത്തോളം വിദേശ തീര്‍ത്ഥാടകര്‍ മക്കയില്‍ എത്തിയിട്ടുണ്ട്. പുറമെ രണ്ടര മുതല്‍ മൂന്ന് ലക്ഷത്തോളം ആഭ്യന്തര തീര്‍ത്ഥാടകരും ഇത്തവണ ഹജ്ജ് നിര്‍വഹിക്കുമെന്നാണ് പ്രതീക്ഷിക്കുന്നത്.

ഇന്ത്യയില്‍ നിന്നും ആകെ ഒരു ലക്ഷത്തി എഴുപത്തയ്യായിരത്തോളം തീര്‍ത്ഥാടകരാണ് എത്തിയത്. ഇതില്‍ 1,22,500 ഓളം പേര്‍ ഇന്ത്യന്‍ ഹജ്ജ് കമ്മിറ്റി വഴിയും, 52,500 ഓളം പേര്‍ സ്വകാര്യ ഗ്രൂപ്പുകള്‍ വഴിയുമാണ്.

ഇന്ത്യന്‍ തീര്‍ത്ഥാടകരില്‍ ഭൂരിഭാഗവും താമസിക്കുന്ന അസീസിയ ഉള്‍പ്പെടെയുള്ള പ്രദേശങ്ങളില്‍ നിന്ന് ഇന്ന് രാത്രി എട്ട് മണിയോടെ തന്നെ തീര്‍ത്ഥാടകര്‍ 'തമ്പുകളുടെ നഗരം' എന്നറിയപ്പെടുന്ന മിനായിലേക്ക് നീങ്ങി തുടങ്ങും. നാളെ രാവിലെയാകുമ്പോഴേക്കും എല്ലാ തീര്‍ത്ഥാടകരും മിനായില്‍ എത്തിച്ചേരും.

നാളെ മിനായില്‍ പ്രത്യേക കര്‍മ്മങ്ങള്‍ ഒന്നും തന്നെയില്ല. മറ്റന്നാള്‍ നടക്കുന്ന ഹജ്ജിന്റെ ഏറ്റവും പ്രധാന ചടങ്ങായ അറഫാ സംഗമത്തിന് മുന്നോടിയായുള്ള തയ്യാറെടുപ്പായാണ് മിനായിലെ നാളത്തെ താമസം.

കനത്ത ചൂടിലാണ് ഇത്തവണയും ഹജ്ജ് കര്‍മ്മങ്ങള്‍ നടക്കുന്നത്. വരും ദിവസങ്ങളില്‍ മക്കയില്‍ 47 ഡിഗ്രി സെല്‍ഷ്യസ് വരെ ചൂട് അനുഭവപ്പെടാന്‍ സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കിയിട്ടുണ്ട്. തീര്‍ത്ഥാടകര്‍ക്കായി മികച്ച സൗകര്യങ്ങളാണ് ഇത്തവണ മിനായില്‍ അധികൃതര്‍ ഒരുക്കിയിട്ടുള്ളത്.