തിരുവനന്തപുരം: മുഖ്യമന്ത്രിയെ നിശ്ചയിക്കുന്നതിലെ അനിശ്ചിതത്വം കോണ്‍ഗ്രസ് അണികളെ അങ്ങേയറ്റം അസ്വസ്ഥരാക്കുന്നു. വി.ഡി. സതീശനെ മുഖ്യമന്ത്രിയാക്കണമെന്ന ആവശ്യവുമായി ഒരുകൂട്ടം കോണ്‍ഗ്രസ് പ്രവര്‍ത്തകര്‍ ബെന്നി ബഹനാല്‍ എം.പി.യെ തടഞ്ഞു. പെരുമ്പാവൂര്‍ മുടിക്കല്ലില്‍ ഒരു പരിപാടിക്കെത്തിയ ബെന്നി ബഹനാനെ കോണ്‍ഗ്രസ് പ്രവര്‍ത്തകര്‍ തടയുകയായിരുന്നു. വി.ഡി. സതീശനെ പിന്തുണക്കുന്ന കാര്യത്തില്‍ എം.പി.യുടെ നിലപാട് വ്യക്തമാക്കണമെന്ന് അവര്‍ ആവശ്യപ്പെട്ടു. തീരുമാനം വി.ഡി. സതീശന് എതിരാണെങ്കില്‍ സംസ്ഥാനത്ത് കൂടുതല്‍ പ്രതിഷേധങ്ങള്‍ ഉണ്ടാകുമെന്ന് പ്രവര്‍ത്തകര്‍ മുന്നറിയിപ്പ് നല്‍കി.
മുഖ്യമന്ത്രി പ്രഖ്യാപനം പത്ത് ദിവസം വൈകുന്നത് വോട്ടര്‍മാര്‍ക്കും പ്രവര്‍ത്തകര്‍ക്കും ഇടയില്‍ വലിയ പരിഹാസത്തിന് ഇടയാക്കുന്നുണ്ട്. 'നേതൃത്വമേ, ഞങ്ങള്‍ തലതാഴ്ത്തിയാണ് നടക്കുന്നത്' എന്ന തരത്തിലുള്ള പോസ്റ്റുകള്‍ സോഷ്യല്‍ മീഡിയയില്‍ പ്രവര്‍ത്തകര്‍ പങ്കുവെക്കുന്നു.
കഴിഞ്ഞ ദിവസം കോട്ടയത്ത് വി.ഡി. സതീശനെ മുഖ്യമന്ത്രിയാക്കണമെന്ന് ആവശ്യപ്പെട്ട് ഒരാള്‍ പെട്രോള്‍ ഒഴിച്ച് ആത്മഹത്യക്ക് ശ്രമിച്ച കാര്യവും പ്രവര്‍ത്തകര്‍ എം.പി.യുടെ ശ്രദ്ധയില്‍പ്പെടുത്തി. സതീശന് തന്നെ മുഖ്യമന്ത്രിയാകുമെന്ന് പോലീസ് ഉറപ്പ് നല്‍കിയാണ് ഇയാളെ പിന്തിരിപ്പിച്ചത്.
ജനവികാരം തങ്ങള്‍ക്ക് അനുകൂലമാണെന്ന ഉറച്ച വിശ്വാസത്തിലാണ് വി.ഡി. സതീശന് ക്യാമ്പ്. മുസ്ലിം ലീഗിന്റെ നിലപാടും 63 എം.എല്‍.എമാരുടെ പിന്തുണയും തങ്ങള്‍ക്കുണ്ടെന്ന് അവര്‍ അവകാശപ്പെടുന്നു. നിലവില്‍ ആലുവയിലെ വസതിയിലുള്ള വി.ഡി. സതീശന് ഉടന്‍ തന്നെ മണ്ഡലമായ പറവൂരിലേക്ക് തിരിക്കും. പ്രഖ്യാപനം വരുമ്പോള്‍ അദ്ദേഹം പറവൂരിലുണ്ടാകാനാണ് സാധ്യത. മുഖ്യമന്ത്രിയെ തീരുമാനിക്കുന്നത് സംബന്ധിച്ച് ഹൈക്കമാന്‍ഡ് ചര്‍ച്ചകള്‍ സങ്കീര്‍ണ്ണമായി തുടരുകയാണ്. ഇന്ന് നിര്‍ണ്ണായകമായ പ്രഖ്യാപനം ഉണ്ടാകുമെന്ന പ്രതീക്ഷയിലാണ് പ്രവര്‍ത്തകര്‍.
.jpg)
Related News
