കൊച്ചി: കേന്ദ്ര സര്‍ക്കാര്‍ സ്വര്‍ണത്തിന്റെ ഇറക്കുമതി തീരുവ കുത്തനെ വര്‍ധിപ്പിച്ചതിന് പിന്നാലെ സംസ്ഥാനത്ത് സ്വര്‍ണവില സര്‍വകാല റെക്കോര്‍ഡുകള്‍ ഭേദിച്ച് കുതിക്കുന്നു. ഇന്ന് പവന് ഒറ്റയടിക്ക് 10,200 രൂപ വര്‍ധിച്ച് 1,23,120 രൂപ എന്ന ചരിത്രത്തിലെ ഏറ്റവും ഉയര്‍ന്ന നിരക്കിലെത്തി. ഗ്രാമിന് 1,275 രൂപ വര്‍ധിച്ച് 15,390 രൂപയിലാണ് വ്യാപാരം നടക്കുന്നത്.

കേന്ദ്ര കസ്റ്റംസ് വകുപ്പിന്റെ പുതിയ വിജ്ഞാപന പ്രകാരം സ്വര്‍ണത്തിന്റെയും വെള്ളിയുടെയും അടിസ്ഥാന ഇറക്കുമതി തീരുവ 4.35 ശതമാനത്തില്‍ നിന്ന് 10 ശതമാനമായാണ് ഉയര്‍ത്തിയത്. ഇതിന് പുറമെ 5 ശതമാനം കാര്‍ഷിക അടിസ്ഥാന സൗകര്യ വികസന സെസ് കൂടി ചേരുന്നതോടെ ആകെ നികുതി ഭാരം 15 ശതമാനമായി വര്‍ധിച്ചു. നേരത്തെ ഇത് ആകെ 6 ശതമാനം മാത്രമായിരുന്നു. ഇന്നു മുതല്‍ പുതുക്കിയ നിരക്കുകള്‍ പ്രാബല്യത്തില്‍ വന്നു.

വിവാഹ സീസണ്‍ പടിവാതില്‍ക്കല്‍ എത്തിനില്‍ക്കെ ഉണ്ടായ ഈ വിലക്കയറ്റം സാധാരണക്കാര്‍ക്ക് വലിയ തിരിച്ചടിയാണ്. ഇന്നലെ പവന് 1,12,960 രൂപയായിരുന്ന വിലയാണ് ഒരൊറ്റ രാത്രികൊണ്ട് 1.23 ലക്ഷം പിന്നിട്ടത്. കഴിഞ്ഞ രണ്ട് ദിവസത്തിനിടെ മാത്രം വലിയ വര്‍ധനവാണ് വിപണിയില്‍ രേഖപ്പെടുത്തിയത്. ഇറക്കുമതി കുറയ്ക്കാനും രാജ്യത്തെ വ്യാപാര കമ്മി നിയന്ത്രിക്കാനുമാണ് കേന്ദ്രത്തിന്റെ ഈ അടിയന്തര നീക്കമെന്നാണ് സാമ്പത്തിക വിദഗ്ധരുടെ വിലയിരുത്തല്‍.

പശ്ചിമേഷ്യയില്‍ തുടരുന്ന യുദ്ധസമാനമായ അനിശ്ചിതത്വം നിക്ഷേപകര്‍ക്കിടയില്‍ വലിയ ആശങ്കയുണ്ടാക്കുന്നുണ്ട്. ഇതിന്റെ പ്രതിഫലനം വിപണിയില്‍ വ്യക്തമാണ്. ബ്രെന്റ് ക്രൂഡ് ഓയില്‍ വില ബാരലിന് 105 ഡോളറിന് മുകളിലെത്തി. ക്രൂഡ് ഓയില്‍ വില വര്‍ധനയെത്തുടര്‍ന്ന് ഇന്ത്യന്‍ രൂപയുടെ മൂല്യം സര്‍വകാല താഴ്ചയിലേക്ക് നിലംപതിച്ചു. സ്വര്‍ണത്തിനൊപ്പം ഇന്ധന, പാചകവാതക വിലകളും വരും ദിവസങ്ങളില്‍ വര്‍ധിക്കാന്‍ സാധ്യതയുണ്ടെന്നാണ് റിപ്പോര്‍ട്ടുകള്‍.

ആഗോള വിപണിയിലെ അസ്ഥിരതയും കേന്ദ്രത്തിന്റെ നികുതി പരിഷ്‌കാരവും ഒത്തുചേര്‍ന്നതോടെ സ്വര്‍ണം സാധാരണക്കാരന് അപ്രാപ്യമായ നിക്ഷേപമായി മാറുകയാണ്. വരും ദിവസങ്ങളിലും വിപണിയില്‍ ചാഞ്ചാട്ടം തുടരാനാണ് സാധ്യത.