തിരുവനന്തപുരം: കേരള നിയമസഭാ തിരഞ്ഞെടുപ്പില്‍ യു.ഡി.എഫിന് ലഭിച്ച ചരിത്ര വിജയത്തിന് പിന്നാലെ, മുഖ്യമന്ത്രി സ്ഥാനത്തെച്ചൊല്ലി കോണ്‍ഗ്രസിനുള്ളില്‍ ഉടലെടുത്ത ഗ്രൂപ്പ് പോര് രൂക്ഷമാകുന്നു. പ്രതിപക്ഷ നേതാവ് വി.ഡി. സതീശനെ അനുകൂലിക്കുന്ന അണികളുടെ ശക്തമായ പ്രതിഷേധം കെ.സി. വേണുഗോപാലിനെ പിന്തുണയ്ക്കുന്ന എം.എല്‍.എമാരെ വെട്ടിലാക്കിയിരിക്കുകയാണ്. പല മണ്ഡലങ്ങളിലും പ്രവര്‍ത്തകരുടെ രോഷം ഭയന്ന് എം.എല്‍.എമാര്‍ക്ക് പൊതുവേദികളില്‍ പ്രത്യക്ഷപ്പെടാന്‍ കഴിയാത്ത സാഹചര്യമാണെന്ന് റിപ്പോര്‍ട്ടുകള്‍ സൂചിപ്പിക്കുന്നു.

യു.ഡി.എഫിനെ വിജയത്തിലേക്ക് നയിച്ച വി.ഡി. സതീശന്‍ തന്നെ മുഖ്യമന്ത്രിയാകണമെന്നാണ് താഴെത്തട്ടിലുള്ള പ്രവര്‍ത്തകരുടെയും സഖ്യകക്ഷികളുടെയും നിലപാട്. എന്നാല്‍, എ.ഐ.സി.സി നിരീക്ഷകര്‍ക്ക് മുന്നില്‍ ഭൂരിഭാഗം കോണ്‍ഗ്രസ് എം.എ.ല്‍എമാരും കെ.സി. വേണുഗോപാലിന്റെ പേര് നിര്‍ദ്ദേശിച്ചതാണ് അണികളെ പ്രകോപിപ്പിച്ചത്.

തൃക്കരിപ്പൂര്‍ എം.എല്‍.എ സന്ദീപ് വാര്യര്‍ ഉള്‍പ്പെടെയുള്ളവര്‍ കെ.സി. വേണുഗോപാലിനെ പിന്തുണയ്ക്കുന്ന വിവരങ്ങള്‍ പുറത്തുവന്നതോടെ സോഷ്യല്‍ മീഡിയയിലും മണ്ഡലങ്ങളിലും പ്രതിഷേധം ഇരമ്പുകയാണ്. 'വിജയിപ്പിച്ചത് വോട്ടര്‍മാരാണ്, അല്ലാതെ ഗ്രൂപ്പ് കളിച്ച് മുഖ്യമന്ത്രിയെ തീരുമാനിക്കാനല്ല' എന്ന വികാരമാണ് പ്രവര്‍ത്തകര്‍ പങ്കുവെക്കുന്നത്.

പ്രതിസന്ധി ഘട്ടത്തില്‍ പാര്‍ട്ടിയെ നയിച്ച സതീശനെ തഴഞ്ഞ്, ഡല്‍ഹിയില്‍ നിന്ന് കെട്ടിയിറക്കുന്ന നേതാവിനെ അംഗീകരിക്കില്ലെന്ന നിലപാടിലാണ് ഒരു വിഭാഗം കോണ്‍ഗ്രസ് പ്രവര്‍ത്തകര്‍. സന്ദീപ് വാര്യര്‍ അടക്കമുള്ള നേതാക്കള്‍ക്കെതിരെ തൃക്കരിപ്പൂരിലെ വാട്സ്ആപ്പ് ഗ്രൂപ്പുകളില്‍ ഉയര്‍ന്ന പ്രതിഷേധം ഇതിന്റെ ഉദാഹരണമാണ്. പ്രതിഷേധം നിയന്ത്രിക്കാനാവാതെ ഗ്രൂപ്പുകള്‍ പിരിച്ചുവിടേണ്ടി വരുന്നത് പാര്‍ട്ടിയിലെ ആഭ്യന്തര ശൈഥില്യം വെളിവാക്കുന്നു.

പലയിടങ്ങളിലും എം.എല്‍.എമാര്‍ക്കെതിരെ പോസ്റ്റര്‍ പ്രചാരണവും പ്രതിഷേധ പ്രകടനങ്ങളും നടക്കുന്നുണ്ട്. കെ.സി. വേണുഗോപാല്‍ മുഖ്യമന്ത്രിയായാല്‍ അത് ജനവിധിക്ക് വിരുദ്ധമാകുമെന്നാണ് പ്രതിഷേധക്കാരുടെ വാദം.

എം.എല്‍.എമാരുടെ ഭൂരിപക്ഷം കെ.സി. വേണുഗോപാലിനുണ്ടെന്ന് വാദിക്കുമ്പോഴും, താഴെത്തട്ടിലെ പ്രവര്‍ത്തകരെ പിണക്കി മുന്നോട്ട് പോകുന്നത് തിരിച്ചടിയാകുമെന്ന് ഹൈക്കമാന്‍ഡ് ഭയപ്പെടുന്നു. ഇതിനിടെ ഐ ഗ്രൂപ്പ് നേതാവ് രമേശ് ചെന്നിത്തലയും മത്സരരംഗത്തുള്ളത് ചര്‍ച്ചകളെ സങ്കീര്‍ണ്ണമാക്കി മുഖ്യമന്ത്രി തെരഞ്ഞെടുപ്പ് നീളുകയാണ്.

പൊതുജനവികാരം തങ്ങള്‍ക്കെതിരാണെന്ന് തിരിച്ചറിഞ്ഞ ചില എം.എല്‍.എമാര്‍ തങ്ങളുടെ മുന്‍നിലപാടില്‍ മാറ്റം വരുത്താന്‍ തയ്യാറാണെന്ന സൂചനകളും പുറത്തുവരുന്നുണ്ട്. അല്ലാത്തപക്ഷം, വരും ദിവസങ്ങളില്‍ മണ്ഡലങ്ങളില്‍ ജനരോഷം നേരിടേണ്ടി വരുമെന്ന ഭയം പലരിലും പ്രകടമാണ്.