റിയാദ്- ലൈസന്‍സില്ലാതെ ആരോഗ്യ സേവനങ്ങള്‍ നല്‍കുകയും നിയന്ത്രിത മരുന്നുകള്‍ അനധികൃതമായി വില്‍ക്കാന്‍ ശ്രമിക്കുകയും ചെയ്ത പ്രവാസിയെ ആരോഗ്യ മന്ത്രാലയം അധികൃതരുടെ സഹായത്തോടെ പിടികൂടി. മെഡിക്കല്‍ മേല്‍നോട്ടത്തില്‍ മാത്രം ഉപയോഗിക്കേണ്ടതും പൊതുവിപണിയില്‍ വില്‍ക്കാന്‍ അനുമതിയില്ലാത്തതുമായ ഗര്‍ഭച്ഛിദ്ര മരുന്നുകള്‍ വിതരണം ചെയ്തതിനാണ് ഇയാള്‍ പിടിയിലായത്. പ്രതിക്ക് ആറുമാസം തടവും ഒരു ലക്ഷം സൗദി റിയാല്‍ പിഴയും ശിക്ഷയായി വിധിച്ചു. നിയമലംഘനം കണ്ടെത്തിയതിനെത്തുടര്‍ന്ന് ബന്ധപ്പെട്ട വകുപ്പുകള്‍ ഇയാള്‍ക്കെതിരെ കര്‍ശന നിയമനടപടികളാണ് സ്വീകരിച്ചിരിക്കുന്നത്.
രാജ്യത്തെ ആരോഗ്യ നിയമങ്ങള്‍ പാലിക്കപ്പെടുന്നുണ്ടെന്ന് ഉറപ്പാക്കുന്നതിനും പൊതുജനാരോഗ്യം സംരക്ഷിക്കുന്നതിനുമായി മന്ത്രാലയം നടത്തുന്ന നിരന്തരമായ നിരീക്ഷണങ്ങളുടെ ഭാഗമായാണ് ഈ നടപടിയെന്ന് അധികൃതര്‍ വ്യക്തമാക്കി. ഹെല്‍ത്ത് പ്രൊഫഷന്‍സ് പ്രാക്ടീസ് നിയമവും അതിന്റെ എക്‌സിക്യൂട്ടീവ് റെഗുലേഷനുകളും ലംഘിച്ചതിനാണ് ശിക്ഷാവിധി നടപ്പാക്കിയത്. ഗുണഭോക്താക്കളുടെ സുരക്ഷയ്ക്കും ആരോഗ്യ നിയമങ്ങളുടെ സുതാര്യതയ്ക്കും മന്ത്രാലയം വലിയ പ്രാധാന്യമാണ് നല്‍കുന്നത്. നിശ്ചിത മാനദണ്ഡങ്ങള്‍ പാലിക്കാതെ പ്രവര്‍ത്തിക്കുന്ന ഇത്തരം ക്രിമിനല്‍ സംഘങ്ങളെ അടിച്ചമര്‍ത്താന്‍ ശക്തമായ പരിശോധനകള്‍ തുടരുമെന്നും മന്ത്രാലയം അറിയിച്ചു.
ആരോഗ്യമേഖലയിലെ ഇത്തരം നിയമലംഘനങ്ങള്‍ തടയാന്‍ പൊതുജനങ്ങളുടെ സഹകരണം മന്ത്രാലയം അഭ്യര്‍ത്ഥിച്ചു. എന്തെങ്കിലും തരത്തിലുള്ള നിയമലംഘനങ്ങളോ അനധികൃത ആരോഗ്യ സേവനങ്ങളോ ശ്രദ്ധയില്‍പ്പെട്ടാല്‍ യൂണിഫൈഡ് കോള്‍ സെന്റര്‍ ആയ 937 എന്ന നമ്പറില്‍ റിപ്പോര്‍ട്ട് ചെയ്യണമെന്ന് മന്ത്രാലയം ഓര്‍മ്മിപ്പിച്ചു. പൊതുജനാരോഗ്യത്തെ ബാധിക്കുന്ന പ്രവണതകള്‍ക്കെതിരെ വിട്ടുവീഴ്ചയില്ലാത്ത നിലപാടാണ് മന്ത്രാലയം സ്വീകരിക്കുന്നത്. ഇത്തരം വിവരങ്ങള്‍ കൈമാറുന്നത് ആരോഗ്യസേവനങ്ങളുടെ ഗുണനിലവാരവും സുരക്ഷിതത്വവും വര്‍ദ്ധിപ്പിക്കാന്‍ സഹായിക്കുമെന്നും അധികൃതര്‍ കൂട്ടിചേര്‍ത്തു.
Related News
