ജിദ്ദ- സൗദി അറേബ്യയിലെ മുഴുവന്‍ പള്ളി ഖത്തീബുമാര്‍ക്കും വരാനിരിക്കുന്ന വെള്ളിയാഴ്ച പ്രസംഗത്തില്‍ സോഷ്യല്‍ മീഡിയയുടെയും ആര്‍ട്ടിഫിഷ്യല്‍ ഇന്റലിജന്‍സിന്റെയും (എഐ) ശരിയായ ഉപയോഗത്തെക്കുറിച്ച് സംസാരിക്കാന്‍ ഇസ്ലാമിക കാര്യ മന്ത്രി ഷെയ്ഖ് അബ്ദുല്‍ ലത്തീഫ് ബിന്‍ അബ്ദുല്‍ അസീസ് നിര്‍ദ്ദേശം നല്‍കി. ആധുനിക സാങ്കേതികവിദ്യകള്‍ ദൈവപ്രീതിയുള്ള കാര്യങ്ങള്‍ക്കായി മാത്രം ഉപയോഗിക്കണമെന്നും അല്ലാത്തപക്ഷം അത് ഗുരുതരമായ പ്രത്യാഘാതങ്ങള്‍ ഉണ്ടാക്കുമെന്നും അദ്ദേഹം ഓര്‍മ്മിപ്പിച്ചു. ഓരോ വ്യക്തിയും സോഷ്യല്‍ മീഡിയയില്‍ പങ്കുവെക്കുന്ന കാര്യങ്ങള്‍ക്ക് അല്ലാഹുവിനോട് മറുപടി പറയേണ്ടി വരുമെന്ന ബോധം വേണമെന്നും നിര്‍ദ്ദേശത്തില്‍ വ്യക്തമാക്കുന്നു.
എഐ സാങ്കേതികവിദ്യ ഉപയോഗിച്ച് ശബ്ദം അനുകരിക്കുന്നതും വീഡിയോകള്‍ വ്യാജമായി നിര്‍മ്മിക്കുന്നതും വ്യക്തികളെ അധിക്ഷേപിക്കുന്നതും കടുത്ത പാപമാണെന്ന് പ്രസംഗത്തില്‍ ഊന്നിപ്പറയും. കള്ളം പ്രചരിപ്പിക്കാനും വ്യാജരേഖകള്‍ ചമയ്ക്കാനും മറ്റൊരാളുടേതെന്ന പേരില്‍ തെറ്റായ കാര്യങ്ങള്‍ പ്രചരിപ്പിക്കാനും സാങ്കേതികവിദ്യ ഉപയോഗിക്കുന്നത് വഞ്ചനയും അധര്‍മ്മവുമാണ്. ഇത്തരം പ്രവൃത്തികള്‍ വ്യക്തികളുടെ സ്വകാര്യത ലംഘിക്കുന്നതിനും സമൂഹത്തില്‍ കുഴപ്പങ്ങള്‍ സൃഷ്ടിക്കുന്നതിനും കാരണമാകുമെന്ന് മന്ത്രാലയം മുന്നറിയിപ്പ് നല്‍കുന്നു.
സോഷ്യല്‍ മീഡിയയിലൂടെ ലഭിക്കുന്ന വാര്‍ത്തകളുടെയും വീഡിയോകളുടെയും സത്യാവസ്ഥ ബോധ്യപ്പെടാതെ അവ ഷെയര്‍ ചെയ്യരുതെന്ന് നിര്‍ദ്ദേശമുണ്ട്. വ്യാജവാര്‍ത്തകള്‍ പ്രചരിപ്പിക്കുന്നത് സമൂഹത്തിന്റെ സുരക്ഷയെയും സമാധാനത്തെയും തകര്‍ക്കുന്ന 'ഭൂമിയിലെ കുഴപ്പമുണ്ടാക്കല്‍' എന്ന ഗണത്തിലാണ് ഉള്‍പ്പെടുക. ജനങ്ങളെ ബോധവല്‍ക്കരിക്കുന്നതിലും നന്മയിലേക്ക് നയിക്കുന്നതിലും വെള്ളിയാഴ്ച പ്രസംഗങ്ങള്‍ക്കുള്ള വലിയ സ്വാധീനം കണക്കിലെടുത്താണ് സാങ്കേതികവിദ്യയുടെ ഗുണദോഷങ്ങളെക്കുറിച്ച് വിശദീകരിക്കാന്‍ മന്ത്രി ഉത്തരവിട്ടത്.
.jpg)
Related News
