ജിദ്ദ: 2026-ലെ കേരള നിയമസഭാ തിരഞ്ഞെടുപ്പില്‍ തിരൂര്‍ മണ്ഡലത്തിലെ യു.ഡി.എഫ് സ്ഥാനാര്‍ത്ഥി കുറുക്കോളി മൊയ്തീനും മറ്റ് യു.ഡി.എഫ് സ്ഥാനാര്‍ത്ഥികളും നേടിയ ഐതിഹാസിക വിജയത്തില്‍ ആഹ്ലാദം പ്രകടിപ്പിച്ച് ജിദ്ദ തിരൂര്‍ നിയോജക മണ്ഡലം കെ.എം.സി.സി വിജയാഘോഷം സംഘടിപ്പിച്ചു.

ജിദ്ദ മലപ്പുറം ജില്ലാ കെ.എം.സി.സി സെക്രട്ടറി മുഹമ്മദ് യാസീദ് എ.പി, മണ്ഡലം കെ.എം.സി.സി പ്രസിഡന്റ് എം.പി മുസ്തഫയ്ക്ക് 'പച്ച ലഡു' നല്‍കി ആഘോഷപരിപാടികള്‍ ഉദ്ഘാടനം ചെയ്തു. പണാധിപത്യത്തിലൂടെ തിരൂരിനെ കൈവശപ്പെടുത്താന്‍ ശ്രമിച്ചവര്‍ക്കുള്ള ശക്തമായ മറുപടിയാണ് ഈ ഭൂരിപക്ഷ വിജയമെന്ന് അദ്ദേഹം അഭിപ്രായപ്പെട്ടു. തിരൂരിന്റെ വികസന ദൗത്യത്തിന് നേതൃത്വം നല്‍കുന്ന പ്രിയ നേതാവിനെ വിശ്വാസത്തോടെ പിന്തുണച്ച വോട്ടര്‍മാര്‍ക്കും അദ്ദേഹം നന്ദി രേഖപ്പെടുത്തി. യു.ഡി.എഫിന്റെ ഈ വന്‍ വിജയം പിണറായി സര്‍ക്കാരിന്റെ അഴിമതി ഭരണത്തിനെതിരായ ജനവിധിയാണെന്നും അദ്ദേഹം കൂട്ടിച്ചേര്‍ത്തു.

ജിദ്ദയിലെ ഖാലിദ് ബിന്‍ വലീദ് സജാ പാര്‍ക്കില്‍ നടന്ന പരിപാടിയില്‍ പച്ച ലഡുവിനും പച്ച പായസത്തിനും പുറമെ മധുരപലഹാരങ്ങളും വിതരണം ചെയ്തു. മണ്ഡലം കെ.എം.സി.സി ഭാരവാഹികളായ റിയാസ് മുഹമ്മദ് കാസിം (ജനറല്‍ സെക്രട്ടറി), റിഷാദ് എം (ഓര്‍ഗനൈസിംഗ് സെക്രട്ടറി), അലി അക്ബര്‍ കെ.കെ, അന്‍വര്‍ കായല്‍മടത്തില്‍ (വൈസ് പ്രസിഡന്റുമാര്‍), ശരീഫ് പി (സെക്രട്ടറി), മുഹമ്മദ് യാസീന്‍ ഇ.പി, അബ്ദുല്‍ റഹീം കെ, ഫാസിദ് കെ.എ, ഹനീഫ എം.പി തുടങ്ങിയവര്‍ പരിപാടിക്ക് നേതൃത്വം നല്‍കി.