ജിദ്ദ- സൗദി അറേബ്യന്‍ നഗരങ്ങളുടെ ഭംഗി വര്‍ദ്ധിപ്പിക്കുന്നതിനും കാഴ്ചാ മലിനീകരണം കുറയ്ക്കുന്നതിനുമായി ഒഴിഞ്ഞുകിടക്കുന്ന ഭൂമിയുടെ ഉടമസ്ഥര്‍ തങ്ങളുടെ സ്ഥലം വൃത്തിയായി സൂക്ഷിക്കണമെന്ന് നഗരസഭ-ഭവന മന്ത്രാലയം ആവശ്യപ്പെട്ടു. മുനിസിപ്പല്‍ നിയമങ്ങളും ചട്ടങ്ങളും കര്‍ശനമായി പാലിക്കാന്‍ ഉടമസ്ഥര്‍ ബാധ്യസ്ഥരാണെന്ന് മന്ത്രാലയം ഓര്‍മ്മിപ്പിച്ചു. ഹിജ്‌റ 1448 റബീഉല്‍ ആഖിര്‍ 15-ന് അവസാനിക്കുന്ന സമയപരിധിക്ക് മുന്നോടിയായി, ഉടമസ്ഥര്‍ക്കിടയില്‍ അവബോധം വളര്‍ത്തുന്നതിനുള്ള വിപുലമായ പ്രചാരണ പ്രവര്‍ത്തനങ്ങള്‍ വിവിധ നഗരങ്ങളില്‍ ആരംഭിച്ചതായും മന്ത്രാലയം വ്യക്തമാക്കി.
ഒഴിഞ്ഞ ഭൂമികള്‍ നിയമവിരുദ്ധമായ ആവശ്യങ്ങള്‍ക്കായി ഉപയോഗിക്കുന്നത് തടയാനാണ് ഈ നീക്കം. അനുമതിയില്ലാത്ത വാണിജ്യ ആവശ്യങ്ങള്‍ക്കായി സ്ഥലം ഉപയോഗിക്കുക, നിര്‍മ്മാണ അവശിഷ്ടങ്ങളും മണ്ണും തള്ളുന്ന ഇടമാക്കി മാറ്റുക, നിയമവിരുദ്ധമായി വാഹനങ്ങളും യന്ത്രസാമഗ്രികളും പാര്‍ക്ക് ചെയ്യുക തുടങ്ങിയ പ്രവണതകള്‍ അവസാനിപ്പിക്കാന്‍ മന്ത്രാലയം ലക്ഷ്യമിടുന്നു. നഗരങ്ങളിലെ പൊതുജനാരോഗ്യത്തെയും സൗന്ദര്യത്തെയും ബാധിക്കുന്ന ഇത്തരം നിയമലംഘനങ്ങള്‍ക്കെതിരെ കര്‍ശനമായ നിരീക്ഷണം ഏര്‍പ്പെടുത്തുമെന്ന് അധികൃതര്‍ അറിയിച്ചു.
അവബോധ പരിപാടിയുടെ കാലാവധി അവസാനിക്കുന്നതോടെ നഗരസഭകളും മുനിസിപ്പാലിറ്റികളും ഫീല്‍ഡ് പരിശോധനകള്‍ ശക്തമാക്കും. നിയമം ലംഘിക്കുന്നവര്‍ക്കെതിരെ കര്‍ശന നടപടി സ്വീകരിക്കാനാണ് തീരുമാനം. നഗര പരിസ്ഥിതിയുടെ ഗുണനിലവാരം മെച്ചപ്പെടുത്തുന്നതിനും നഗരങ്ങളെ കൂടുതല്‍ ആകര്‍ഷകമാക്കുന്നതിനും ഈ നടപടികള്‍ വലിയ പങ്കുവഹിക്കുമെന്ന് മന്ത്രാലയം ഉറപ്പുനല്‍കി. രാജ്യത്തെ നഗരങ്ങളെ ആഗോള നിലവാരത്തിലേക്ക് ഉയര്‍ത്താനുള്ള വികസന പദ്ധതികളുടെ ഭാഗമായാണ് ഈ പ്രവര്‍ത്തനങ്ങള്‍ നടപ്പിലാക്കുന്നത്.
.jpg)
Related News
