ജിദ്ദ- സൗദി അറേബ്യയിലെ തൊഴില്‍ നിയമത്തിന് കീഴില്‍ ജോലി ചെയ്യുന്ന ജീവനക്കാര്‍ക്ക് ഹജ് കര്‍മ്മം നിര്‍വഹിക്കുന്നതിനായുള്ള അവധി സംബന്ധിച്ച നിബന്ധനകളും വ്യവസ്ഥകളും മാനവ വിഭവശേഷി, സാമൂഹിക വികസന മന്ത്രാലയം പുറപ്പെടുവിച്ചു. പുതിയ മാര്‍ഗ്ഗനിര്‍ദ്ദേശങ്ങള്‍ അനുസരിച്ച്, ഒരു തൊഴിലാളിക്ക് 10 മുതല്‍ 15 ദിവസം വരെ ശമ്പളത്തോടു കൂടിയ അവധിക്ക് അര്‍ഹതയുണ്ടാകും. ഈ അവധി ദിനങ്ങളില്‍ ബലി പെരുന്നാള്‍ (ഈദുല്‍ അദ്ഹ) അവധിയും ഉള്‍പ്പെടുമെന്ന് മന്ത്രാലയം വ്യക്തമാക്കിയിട്ടുണ്ട്.
ഹജ് അവധി ലഭിക്കുന്നതിനായി തൊഴിലാളി നിലവിലെ തൊഴിലുടമയുടെ കീഴില്‍ തുടര്‍ച്ചയായി രണ്ട് വര്‍ഷത്തെ സേവനം പൂര്‍ത്തിയാക്കിയിരിക്കണം. കൂടാതെ, തന്റെ ഔദ്യോഗിക സേവന കാലയളവില്‍ ഒരിക്കല്‍ മാത്രമാണ് ശമ്പളത്തോടു കൂടിയ ഈ അവധിക്ക് അര്‍ഹതയുണ്ടാവുക. മുന്‍പ് ഹജ് നിര്‍വഹിച്ചിട്ടില്ലാത്തവര്‍ക്ക് മാത്രമാണ് ഈ ആനുകൂല്യം ലഭിക്കുകയെന്നും മന്ത്രാലയത്തിന്റെ വിശദീകരണത്തില്‍ പറയുന്നു.
തൊഴില്‍ സാഹചര്യങ്ങള്‍ക്കും സ്ഥാപനത്തിന്റെ ആവശ്യകതകള്‍ക്കും അനുസൃതമായി, ഓരോ വര്‍ഷവും എത്ര തൊഴിലാളികള്‍ക്ക് ഇത്തരത്തില്‍ അവധി നല്‍കണമെന്ന് തീരുമാനിക്കാനുള്ള അധികാരം തൊഴിലുടമയ്ക്കായിരിക്കും. സ്ഥാപനത്തിന്റെ സുഗമമായ പ്രവര്‍ത്തനത്തെ ബാധിക്കാത്ത രീതിയില്‍ തീര്‍ത്ഥാടനത്തിന് പോകുന്നവരുടെ എണ്ണം ക്രമീകരിക്കാന്‍ കമ്പനികള്‍ക്ക് സാധിക്കും. ഗള്‍ഫ് മേഖലയിലെ പ്രവാസികള്‍ ഉള്‍പ്പെടെയുള്ള ആയിരക്കണക്കിന് തൊഴിലാളികള്‍ക്ക് വലിയ ആശ്വാസമാകുന്നതാണ് ഈ വ്യക്തത വരുത്തല്‍.
Related News
