ജിദ്ദ: ദീര്‍ഘകാലത്തെ പ്രവാസ ജീവിതം അവസാനിപ്പിച്ച് നാട്ടിലേക്ക് മടങ്ങുന്ന നസീം പോളിക്ലിനിക്ക് ഫാര്‍മസിസ്റ്റും മെക് 7 ഹെല്‍ത്ത് ക്ലബ് അംഗവുമായ അബൂബക്കര്‍ പാറമ്മലിന് യാത്രയയപ്പ് നല്‍കി. ജിദ്ദ അസീസിയയിലെ മെക് 7 ഹെല്‍ത്ത് ക്ലബ് ബ്രാഞ്ചില്‍ നടന്ന ചടങ്ങില്‍ സഹപ്രവര്‍ത്തകരും സുഹൃത്തുക്കളും ചേര്‍ന്ന് അദ്ദേഹത്തെ ആദരിച്ചു.

കഴിഞ്ഞ 26 വര്‍ഷമായി പ്രവാസ ലോകത്ത് സജീവമായ അബൂബക്കര്‍, നസീം പോളിക്ലിനിക്കിലെ ഫാര്‍മസിസ്റ്റ് എന്ന നിലയില്‍ നിരവധി പേര്‍ക്ക് സാന്ത്വനവും സഹായവുമായിരുന്നു. മെക് 7 ഹെല്‍ത്ത് ക്ലബ്ബിലെ നിത്യേനയുള്ള വ്യായാമ വേളകളില്‍ അദ്ദേഹത്തിന്റെ സാന്നിധ്യം മറ്റുള്ളവര്‍ക്ക് വലിയ ഊര്‍ജ്ജമാണ് പകര്‍ന്നു നല്‍കിയിരുന്നത്. വ്യായാമത്തിന് ശേഷം അദ്ദേഹം സ്വന്തമായി തയ്യാറാക്കി കൊണ്ടുവരാറുള്ള സ്വാദിഷ്ടമായ ചായ ഇനിയുള്ള നാളുകളില്‍ ഒരു മധുര സ്മരണയായിരിക്കുമെന്ന് സുഹൃത്തുക്കള്‍ അനുസ്മരിച്ചു.

നാട്ടിലെത്തിയാലും വ്യായാമ ശീലങ്ങളും സാമൂഹിക കൂട്ടായ്മകളും തുടരണമെന്ന് ആശംസകള്‍ നേര്‍ന്നവര്‍ അഭ്യര്‍ത്ഥിച്ചു. ആരോഗ്യമാണ് ഏറ്റവും വലിയ സമ്പത്തെന്നും ശിഷ്ടകാലം സന്തോഷത്തോടെയും ആരോഗ്യത്തോടെയും ഇരിക്കാന്‍ സര്‍വ്വശക്തന്‍ അനുഗ്രഹിക്കട്ടെയെന്നും സുഹൃത്തുക്കള്‍ ആശംസിച്ചു.

മെക് 7 അസീസിയ ബ്രാഞ്ചിന്റെ വകയായി അദ്ദേഹത്തിന് ഉപഹാരം കൈമാറി. ചടങ്ങില്‍ മുഹമ്മദലി കുന്നുമ്മല്‍, സലാഹ് കാരാടന്‍, അബ്ദുല്‍ ജബ്ബാര്‍, സുബൈര്‍ അരിബ്ര, അബ്ദുല്‍ റഷീദ്, യൂസുഫ്, ഹാരിസ് ബാബു, സാജിദ്, വീരാന്‍ കുട്ടി, സലാം, മാജിദ്, ശിഹാബ്, ഹാഷിം തുടങ്ങിയവര്‍ സംസാരിച്ചു.

തനിക്ക് ലഭിച്ച സ്‌നേഹത്തിനും കരുതലിനും അബൂബക്കര്‍ പാറമ്മല്‍ നന്ദി രേഖപ്പെടുത്തി. മെക് 7 കൂട്ടായ്മ വ്യായാമത്തിനതീതമായി ഊഷ്മളമായ ഒരു സാഹോദര്യ ബന്ധം വളര്‍ത്താന്‍ സഹായിച്ചുവെന്നും അദ്ദേഹം മറുപടി പ്രസംഗത്തില്‍ പറഞ്ഞു.