റിയാദ്: ശസ്ത്രക്രിയക്കിടെ ഉപയോഗിക്കുന്ന സൂചികള്‍ സുരക്ഷിതമായി കൈകാര്യം ചെയ്യാന്‍ സഹായിക്കുന്ന 'സൂച്ചര്‍ നീഡില്‍ റീറ്റൈനിംഗ് സ്ട്രാപ്പ്' എന്ന നൂതന ഉപകരണത്തിന് അന്താരാഷ്ട്ര തലത്തില്‍ വന്‍ അംഗീകാരം. കിംഗ് സൗദ് സര്‍വകലാശാലയിലെ പീരിയോഡോന്റോളജി വിഭാഗം കണ്‍സള്‍ട്ടന്റ് ഡോ. ഹമദ് അല്‍-സൗമാന്‍ വികസിപ്പിച്ചെടുത്ത ഈ ഉപകരണത്തിന് സൗദി അറേബ്യയുടെയും അമേരിക്കയുടെയും പേറ്റന്റുകള്‍ ലഭിച്ചു. ഓപ്പറേറ്റിംഗ് റൂമുകളില്‍ ശസ്ത്രക്രിയ നടത്തുന്ന ഡോക്ടര്‍മാര്‍ക്കും നഴ്സുമാര്‍ക്കും സൂചി തറച്ചുണ്ടാകുന്ന പരിക്കുകള്‍ ഒഴിവാക്കാന്‍ ഈ ഉപകരണം വലിയ രീതിയില്‍ സഹായിക്കും.
കിംഗ് സൗദ് സര്‍വകലാശാല സംഘടിപ്പിച്ച 2026-ലെ ലോക സര്‍ഗ്ഗാത്മകത-നവീകരണ ദിന പ്രദര്‍ശനത്തിലാണ് ഈ കണ്ടുപിടുത്തം അവതരിപ്പിച്ചത്. ശസ്ത്രക്രിയക്കിടെ തുന്നലുകള്‍ ഇടുമ്പോള്‍ സൂചി കൈകളില്‍ തറയ്ക്കാനുള്ള സാധ്യത കൂടുതലാണ്. ഇത് പരിഹരിക്കാനായി ഡോക്ടറുടെ കൈയ്യില്‍ ധരിക്കാവുന്ന ഒരു കാന്തിക കണ്ടെയ്‌നറാണ് ഡോ. ഹമദ് വികസിപ്പിച്ചത്. ശസ്ത്രക്രിയയുടെ വിവിധ ഘട്ടങ്ങളില്‍ സൂചി ഇതില്‍ സുരക്ഷിതമായി ഉറപ്പിച്ചു നിര്‍ത്താന്‍ സാധിക്കും. ഇത് മെഡിക്കല്‍ ടീമിന് കൂടുതല്‍ ആത്മവിശ്വാസത്തോടെയും വേഗത്തിലും ജോലി ചെയ്യാന്‍ സൗകര്യമൊരുക്കുന്നു.
സൗദി ഫുഡ് ആന്‍ഡ് ഡ്രഗ് അതോറിറ്റിയുടെ അംഗീകാരം ലഭിക്കുന്ന ദന്തചികിത്സാ രംഗത്തെ ആദ്യത്തെ സൗദി മെഡിക്കല്‍ ഉപകരണമാണിത്. കേവലം പ്രാദേശിക അംഗീകാരങ്ങളില്‍ ഒതുങ്ങാതെ, 2024-ലെ ജനീവ ഇന്റര്‍നാഷണല്‍ ഇന്‍വെന്‍ഷന്‍ എക്‌സിബിഷനിലും സിംഗപ്പൂര്‍ വേള്‍ഡ് ഇന്‍വെന്റ് എക്‌സിബിഷനിലും ഈ കണ്ടുപിടുത്തം സ്വര്‍ണ്ണ മെഡലുകള്‍ കരസ്ഥമാക്കി. കൂടാതെ, ഈ വര്‍ഷത്തെ മികച്ച സംരംഭകത്വ പ്രോജക്റ്റിനുള്ള പുരസ്‌കാരവും ഡോ. ഹമദിന്റെ ഈ കണ്ടുപിടുത്തം സ്വന്തമാക്കിയിട്ടുണ്ട്.
ദന്തചികിത്സക്ക് പുറമെ ജനറല്‍ സര്‍ജറി, പ്ലാസ്റ്റിക് സര്‍ജറി, ഓര്‍ത്തോപീഡിക്‌സ്, എമര്‍ജന്‍സി മെഡിസിന്‍, വെറ്ററിനറി സയന്‍സ് തുടങ്ങി എല്ലാ ശസ്ത്രക്രിയ വിഭാഗങ്ങളിലും ഈ ഉപകരണം ഒരേപോലെ ഉപയോഗപ്രദമാണ്. സൗദി വിഷന്‍ 2030-ന്റെ ഭാഗമായി വിജ്ഞാന അധിഷ്ഠിത സമ്പദ്വ്യവസ്ഥ കെട്ടിപ്പടുക്കുന്നതില്‍ സര്‍വകലാശാലകള്‍ വഹിക്കുന്ന പങ്കിന്റെ മികച്ച ഉദാഹരണമായി ഈ നേട്ടം വിലയിരുത്തപ്പെടുന്നു.
.jpg)
Related News
