റിയാദ്- സൗദി അറേബ്യയിലെ ഇന്റര്നെറ്റ്, വാര്ത്താവിനിമയ സേവനങ്ങളുടെ ഗുണനിലവാരം വര്ധിപ്പിക്കാനും നിരക്കുകള് നിയന്ത്രിക്കാനും കമ്മ്യൂണിക്കേഷന്സ് ആന്ഡ് ഇന്ഫര്മേഷന് ടെക്നോളജി മന്ത്രാലയത്തോട് ശൂറ കൗണ്സില് ആവശ്യപ്പെട്ടു. രാജ്യത്തിന്റെ എല്ലാ ഭാഗങ്ങളിലും മികച്ച സേവനം ഉറപ്പാക്കണമെന്നും ഉപഭോക്താക്കളുടെ സംതൃപ്തി വിലയിരുത്തുന്ന സൂചകങ്ങളുമായി ഈ സേവനങ്ങളെ ബന്ധിപ്പിക്കണമെന്നും കൗണ്സില് നിര്ദ്ദേശിച്ചു. ശൂറ കൗണ്സില് വൈസ് പ്രസിഡന്റ് ഡോ. മിഷാല് അല്-സുലമിയുടെ അധ്യക്ഷതയില് വീഡിയോ കോണ്ഫറന്സ് വഴി ചേര്ന്ന ഒന്പതാം ടേമിലെ രണ്ടാം വര്ഷത്തെ 26-ാമത് പതിവ് സമ്മേളനത്തിലാണ് ഈ സുപ്രധാന നിര്ദേശം.
രാജ്യത്തെ പ്രധാന നഗരങ്ങള്ക്ക് പുറമെ മറ്റ് മേഖലകളിലേക്കും ഡാറ്റാ, ആര്ട്ടിഫിഷ്യല് ഇന്റലിജന്സ് സെന്ററുകള് വ്യാപിപ്പിക്കണമെന്ന് കൗണ്സില് അംഗം ഡോ. തുര്ക്കി അല്-അന്സി ആവശ്യപ്പെട്ടു. ചെറുകിട-ഇടത്തരം സംരംഭങ്ങളെ ആഗോള വിപണിയില് എത്തിക്കുന്നതിനായി സാമ്പത്തികവും വിപണനപരവുമായ സഹായങ്ങള് ഉള്ക്കൊള്ളുന്ന ദേശീയ പദ്ധതി ആവിഷ്കരിക്കണമെന്നും യോഗം നിര്ദ്ദേശിച്ചു. റിയല് എസ്റ്റേറ്റ് ഉടമസ്ഥാവകാശ തര്ക്കങ്ങള് പരിഹരിക്കുന്നതിനും ഉപഭോക്താക്കള്ക്ക് കാര്യക്ഷമമായ സേവനം ഉറപ്പാക്കുന്നതിനും ആവശ്യമായ നടപടികള് സ്വീകരിക്കാന് സപ്പോര്ട്ട് ആന്ഡ് ലിക്വിഡേഷന് സെന്ററിനോടും ശൂറ കൗണ്സില് ആവശ്യപ്പെട്ടു. വിവിധ മേഖലകളിലെ വികസനം ലക്ഷ്യമിട്ടുള്ള നിരവധി കരാറുകള്ക്കും ധാരണാപത്രങ്ങള്ക്കും യോഗം അംഗീകാരം നല്കി.
Related News
