റിയാദ്: സൗദി കേരള ഫാര്‍മസിസ്റ്റ്‌സ് ഫോറത്തിന്റെ നേതൃത്വത്തില്‍ ലോക ഹീമോഫീലിയ ദിനാചരണത്തോടനുബന്ധിച്ച് വെബിനാര്‍ സംഘടിപ്പിച്ചു. 'Diagnosis-First Step to Care' എന്ന പ്രമേയത്തെ ആസ്പദമാക്കി ഗൂഗിള്‍ മീറ്റ് പ്ലാറ്റ്ഫോം വഴി നടന്ന പരിപാടിയില്‍ ഒമാന്‍ നാഷണല്‍ യൂണിവേഴ്‌സിറ്റിയിലെ സീനിയര്‍ ലെക്ചറര്‍ ഡോ. ജാവേദ് അഹ്‌മദ് മുഖ്യപ്രഭാഷണം നടത്തി.
ഹീമോഫീലിയയുടെ പ്രാരംഭ രോഗനിര്‍ണയത്തിന്റെ പ്രാധാന്യം, ആധുനിക ചികിത്സാരീതികള്‍, രോഗികള്‍ നേരിടുന്ന വെല്ലുവിളികള്‍ തുടങ്ങിയ വിഷയങ്ങളെക്കുറിച്ച് അദ്ദേഹം വിശദീകരിച്ചു. ഫാര്‍മസിസ്റ്റുകള്‍ക്കും മറ്റ് ആരോഗ്യപ്രവര്‍ത്തകര്‍ക്കും പുറമെ പൊതുജനങ്ങളും പങ്കെടുത്ത പരിപാടിയില്‍, വിഷയവുമായി ബന്ധപ്പെട്ട ശ്രോതാക്കളുടെ സംശയങ്ങള്‍ക്ക് ഡോ. ജാവേദ് മറുപടി നല്‍കി. ഹീമോഫീലിയ ബാധിതനായ ഒരു ശ്രോതാവ് തന്റെയും കുടുംബാംഗങ്ങളുടെയും രോഗാനുഭവങ്ങള്‍ പങ്കുവെച്ചത് ഈ രോഗാവസ്ഥയുടെ ഗൗരവം മനസ്സിലാക്കാന്‍ മറ്റുള്ളവര്‍ക്ക് സഹായകമായി.
ജിസാന്‍ കോഡിനേറ്റര്‍ മുഹമ്മദ് ത്വയ്യിബിന്റെ ഖുര്‍ആന്‍ പാരായണത്തോടെ പരിപാടി ആരംഭിച്ചു. എസ്.കെ.പി.എഫ് പ്രസിഡന്റ് ഡോ. സുഹാജ് അബ്ദുല്‍സലിം അധ്യക്ഷത വഹിച്ചു. ജനറല്‍ സെക്രട്ടറി അബിദ് പാറക്കല്‍ പരിപാടിയുടെ അവതാരകനായിരുന്നു. ശബീര്‍ അലി തോരക്കാട്ടില്‍ അതിഥിയെ പരിചയപ്പെടുത്തി.
യഹിയ കെ.കെ ഡോ. ജാവേദ് അഹ്‌മദിന് ഉപഹാരം സമര്‍പ്പിച്ചു. ഹനീഫ പാറക്കല്ലില്‍, യൂനുസ് മണ്ണിശ്ശേരി, റിഫാദ് കെ. സൈദു എന്നിവര്‍ സംസാരിച്ചു. മഹേഷ് പള്ളിയാല്‍ത്തൊടി സ്വാഗതവും യാസിര്‍ കെ. പാരി നന്ദിയും പറഞ്ഞു.
ഫോട്ടോ: മുഖ്യ പ്രഭാഷകന്‍ : ഡോ. ജാവേദ് അഹ്‌മദ്.
Related News
