തെഹ്റാന്‍: തങ്ങളുടെ തുറമുഖങ്ങള്‍ക്കും കപ്പലുകള്‍ക്കും മേലുള്ള അമേരിക്കന്‍ നാവിക ഉപരോധം തുടരുകയാണെങ്കില്‍ തന്ത്രപ്രധാനമായ ഹോര്‍മുസ് കടലിടുക്ക് വീണ്ടും അടയ്ക്കുമെന്ന് ഇറാന്റെ മുന്നറിയിപ്പ്. മേഖലയിലെ സംഘര്‍ഷങ്ങളെത്തുടര്‍ന്ന് ദിവസങ്ങളോളം തടസ്സപ്പെട്ട കടലിടുക്ക് ഗതാഗതത്തിനായി തുറന്നുകൊടുത്തതായി പ്രഖ്യാപിച്ചതിന് പിന്നാലെയാണ് ഇറാന്റെ ഈ പുതിയ നിലപാട്.
അമേരിക്ക ഏര്‍പ്പെടുത്തിയിട്ടുള്ള നിയന്ത്രണങ്ങള്‍ തുടരുകയാണെങ്കില്‍ തിരിച്ചടിയെന്നോണം ഹോര്‍മുസ് കടലിടുക്ക് അടച്ചിടുമെന്ന് ഇറാന്‍ പാര്‍ലമെന്റ് സ്പീക്കര്‍ മുഹമ്മദ് ബഗര്‍ ഗാലിബാഫ് പറഞ്ഞു. കടലിടുക്കിലൂടെയുള്ള കപ്പല്‍ യാത്ര ഇറാന്റെ മുന്‍കൂര്‍ അനുമതിക്ക് വിധേയമാകുമെന്നും അദ്ദേഹം വ്യക്തമാക്കി. ലോകത്തെ ആകെ എണ്ണ വിതരണത്തിന്റെ അഞ്ചിലൊന്നും കടന്നുപോകുന്ന ഈ പാത പൂര്‍ണ്ണമായും തുറന്നതായി ഇറാന്‍ വിദേശകാര്യ മന്ത്രി അബ്ബാസ് അരാഗ്ചി വെള്ളിയാഴ്ച പ്രഖ്യാപിച്ചിരുന്നു. എന്നാല്‍ ഇറാന്റെ മേല്‍നോട്ടത്തിലുള്ള പ്രത്യേക റൂട്ടുകളിലൂടെ മാത്രമേ കപ്പലുകള്‍ക്ക് സഞ്ചരിക്കാനാകൂ എന്ന് അദ്ദേഹം സൂചിപ്പിച്ചു.
ഹോര്‍മുസ് കടലിടുക്ക് തുറന്ന നടപടിയെ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് സ്വാഗതം ചെയ്തു. എങ്കിലും ഇറാന്റെ ആണവ പദ്ധതിയടക്കമുള്ള വിഷയങ്ങളില്‍ സമഗ്രമായ ഒരു കരാറില്‍ എത്തുന്നത് വരെ ഇറാന്റെ കപ്പലുകള്‍ക്ക് മേലുള്ള നാവിക ഉപരോധം തുടരുമെന്ന് അദ്ദേഹം വ്യക്തമാക്കി. കഴിഞ്ഞ തിങ്കളാഴ്ച മുതല്‍ നിലവില്‍ വന്ന ഉപരോധത്തെത്തുടര്‍ന്ന് ഇറാനിലേക്ക് പോകാനിരുന്ന 21 കപ്പലുകള്‍ അമേരിക്കന്‍ സൈന്യത്തിന്റെ നിര്‍ദ്ദേശപ്രകാരം തിരിച്ചയച്ചതായി യുഎസ് സെന്‍ട്രല്‍ കമാന്‍ഡ് അറിയിച്ചു.
അമേരിക്കന്‍ നടപടി വെടിനിര്‍ത്തല്‍ ധാരണകളുടെ ലംഘനമാണെന്ന് ഇറാന്‍ ആരോപിച്ചു. ലെബനന്‍ സംഘര്‍ഷവുമായി ബന്ധപ്പെട്ട് ഇസ്രായേല്‍, ഇറാന്‍, ഹിസ്ബുള്ള എന്നിവര്‍ക്കിടയില്‍ ഉണ്ടായ 10 ദിവസത്തെ താല്ക്കാലിക വെടിനിര്‍ത്തലിന് പിന്നാലെയാണ് മേഖലയില്‍ സമാധാന അന്തരീക്ഷം രൂപപ്പെട്ടത്. എന്നാല്‍ അമേരിക്ക തങ്ങളുടെ വാഗ്ദാനങ്ങള്‍ ലംഘിക്കുകയാണെങ്കില്‍ കര്‍ശനമായ തിരിച്ചടി നല്‍കുമെന്ന് ഇറാന്‍ വിദേശകാര്യ വക്താവ് ഇസ്മായില്‍ ബഗായ് മുന്നറിയിപ്പ് നല്‍കി. നിലവില്‍ കടലിടുക്ക് തുറന്നെങ്കിലും ഇറാന്റെ അനുമതിയുള്ള ഇടനാഴികളിലൂടെ മാത്രമാണ് കപ്പല്‍ ഗതാഗതം നടക്കുന്നത്.
Related News
