ജിദ്ദ: 2026-ലെ ഹജ്ജ് സീസണിന് മുന്നോടിയായി ബന്ധപ്പെട്ട വകുപ്പുകളുടെ സജ്ജീകരണങ്ങള് വിലയിരുത്തുന്നതിനായി ഹജ്ജ്-ഉംറ സ്ഥിരം സമിതി യോഗം ചേര്ന്നു. തീര്ത്ഥാടകര്ക്കായുള്ള പ്രവര്ത്തന പദ്ധതികള്, പ്രവേശന കവാടങ്ങളിലെ സുരക്ഷാ ക്രമീകരണങ്ങള്, മക്കയിലെയും പുണ്യസ്ഥലങ്ങളിലെയും വികസന പദ്ധതികളുടെ പുരോഗതി എന്നിവ യോഗം വിശദമായി ചര്ച്ച ചെയ്തു.
മക്ക ഗവര്ണറും സെന്ട്രല് ഹജ്ജ് കമ്മിറ്റി ചെയര്മാനുമായ ഖാലിദ് അല് ഫൈസല് രാജകുമാരന്റെ നിര്ദ്ദേശപ്രകാരം മക്ക ഡെപ്യൂട്ടി ഗവര്ണര് സൗദ് ബിന് മിഷാല് രാജകുമാരന്റെ അധ്യക്ഷതയിലായിരുന്നു യോഗം. ഹജ്ജ് ഒരുക്കങ്ങള് നേരത്തെ തന്നെ പൂര്ത്തിയാക്കണമെന്ന ഭരണകൂടത്തിന്റെ നിര്ദ്ദേശം കര്ശനമായി പാലിക്കണമെന്ന് ഡെപ്യൂട്ടി ഗവര്ണര് യോഗത്തില് ആവശ്യപ്പെട്ടു. തീര്ത്ഥാടകര്ക്ക് ഉന്നത നിലവാരത്തിലുള്ള സേവനം ഉറപ്പാക്കാന് വിവിധ വകുപ്പുകള് ഏകോപിപ്പിച്ചു പ്രവര്ത്തിക്കണമെന്നും അദ്ദേഹം പറഞ്ഞു.
ഉംറ നിര്വഹിച്ച ശേഷം തീര്ത്ഥാടകര് മടങ്ങുന്നതുമായി ബന്ധപ്പെട്ട നടപടികളും അവരുടെ സുരക്ഷയും ക്ഷേമവും ഉറപ്പാക്കാനുള്ള നടപടികളും സമിതി അവലോകനം ചെയ്തു. വരാനിരിക്കുന്ന ഹജ്ജ് സീസണില് തീര്ത്ഥാടകര്ക്ക് കര്മ്മങ്ങള് സുഗമമായും ആശ്വാസത്തോടെയും നിര്വഹിക്കാനുള്ള സാഹചര്യമൊരുക്കുകയാണ് ലക്ഷ്യമെന്ന് സമിതി വ്യക്തമാക്കി.
Related News
