ജിദ്ദ: ഇറാന് നടത്തിയ ആക്രമണങ്ങളില് തകരാറിലായ ഊര്ജ്ജ നിലയങ്ങള് പൂര്ണ്ണതോതില് പ്രവര്ത്തനസജ്ജമായെന്നും ആഗോള വിപണിയിലേക്കുള്ള എണ്ണ വിതരണം തടസ്സമില്ലാതെ തുടരുമെന്നും സൗദി മന്ത്രിസഭ അറിയിച്ചു. ജിദ്ദയില് കിരീടാവകാശിയും പ്രധാനമന്ത്രിയുമായ മുഹമ്മദ് ബിന് സല്മാന് രാജകുമാരന്റെ അധ്യക്ഷതയില് ചേര്ന്ന മന്ത്രിസഭാ യോഗത്തിലാണ് ഇക്കാര്യം വ്യക്തമാക്കിയത്.
ആക്രമണത്തിന് പിന്നാലെ അതിവേഗത്തില് ഉല്പ്പാദനം പുനഃസ്ഥാപിക്കാന് കഴിഞ്ഞത് സൗദിയുടെ പ്രതിസന്ധി മാനേജ്മെന്റ് ശേഷിയുടെ തെളിവാണെന്ന് മീഡിയ മന്ത്രി സല്മാന് അല് ദോസരി പറഞ്ഞു. രാജ്യത്തിന്റെ പരമാധികാരം ലംഘിക്കാനുള്ള നീക്കങ്ങളെ ശക്തമായി പ്രതിരോധിച്ച സായുധ സേനയുടെ ധീരതയെ മന്ത്രിസഭ പ്രശംസിച്ചു. ഇറാഖ് മണ്ണില് നിന്ന് ഡ്രോണുകള് ഉപയോഗിച്ച് സൗദിക്കും ഗള്ഫ് രാജ്യങ്ങള്ക്കും നേരെ നടന്ന ആക്രമണങ്ങളെ അപലപിച്ച മന്ത്രിസഭ, ഇത്തരം ഭീഷണികള് തടയാന് ഇറാഖ് സര്ക്കാര് ഉത്തരവാദിത്തം കാണിക്കണമെന്നും ആവശ്യപ്പെട്ടു.
സൗദി അറേബ്യ സ്വന്തമായി വികസിപ്പിച്ച 'ഷംസ്' ഉപഗ്രഹത്തിന്റെ വിക്ഷേപണം വിജയകരമായതില് മന്ത്രിസഭ സന്തോഷം പ്രകടിപ്പിച്ചു. പൂര്ണ്ണമായും സൗദി പൗരന്മാരുടെ നേതൃത്വത്തില് നിര്മ്മിച്ച ഈ ഉപഗ്രഹം ബഹിരാകാശ രംഗത്തെ രാജ്യത്തിന്റെ കുതിപ്പിന് കരുത്ത് പകരും. കൂടാതെ, ജനീവ അന്താരാഷ്ട്ര കണ്ടുപിടുത്ത മേളയില് വിദ്യാഭ്യാസ-ആരോഗ്യ മേഖലകളില് സൗദി കരസ്ഥമാക്കിയ പുരസ്കാരങ്ങളെയും യോഗം അഭിനന്ദിച്ചു.
സ്മാര്ട്ട് സിറ്റികള്: 2026-ലെ ആഗോള സ്മാര്ട്ട് സിറ്റി സൂചികയില് എട്ട് സൗദി നഗരങ്ങള് മികച്ച റാങ്ക് നേടിയത് വികസന വേഗതയുടെ അടയാളമായി മന്ത്രിസഭ വിലയിരുത്തി. പരിസ്ഥിതി സംരക്ഷണം: 'ഗ്രീന് സൗദി' പദ്ധതിയുടെ ഭാഗമായി 10 ലക്ഷം ഹെക്ടര് ഭൂമി വീണ്ടെടുക്കുകയും 15.9 കോടി മരങ്ങള് നട്ടുപിടിപ്പിക്കുകയും ചെയ്തു.
ഹജ്ജ് സീസണ് ഇളവുകള്: ഹജ്ജ് സീസണ് പ്രമാണിച്ച് ഇറക്കുമതി ചെയ്യുന്ന കന്നുകാലികളുടെ നികുതിയും കസ്റ്റംസ് ഡ്യൂട്ടിയും സര്ക്കാര് വഹിക്കും. ലക്സംബര്ഗ്, ചൈന (ഹോങ്കോംഗ്), താന്സാനിയ, ജോര്ദാന് തുടങ്ങിയ രാജ്യങ്ങളുമായി വിവിധ മേഖലകളില് സഹകരണത്തിന് ധാരണാപത്രം ഒപ്പിട്ടു.
ആഭ്യന്തര സുരക്ഷ ഉറപ്പാക്കുന്നതിനൊപ്പം ആഗോള സാമ്പത്തിക സ്ഥിരത നിലനിര്ത്തുന്നതില് സൗദി അറേബ്യ അചഞ്ചലമായി തുടരുമെന്നും മന്ത്രിസഭാ പ്രസ്താവനയില് വ്യക്തമാക്കി. ഡാറ്റാ - ആര്ട്ടിഫിഷ്യല് ഇന്റലിജന്സ് മേഖലകളില് യുനെസ്കോയുമായി സഹകരിക്കാനും യുഎന് ഭീകരവിരുദ്ധ കേന്ദ്രവുമായി ചേര്ന്ന് പ്രവര്ത്തിക്കാനും യോഗം തീരുമാനിച്ചു.
Related News
