റിയാദ്- നഗരത്തിലെ റിംഗ് റോഡുകളും പ്രധാന പാതകളും വികസിപ്പിക്കുന്നതിനുള്ള ബൃഹത്തായ പദ്ധതിയുടെ ഭാഗമായി, നിശ്ചിത റൂട്ടുകളില് ഉള്പ്പെടുന്ന വസ്തുവകകള് ഏറ്റെടുക്കുന്നതിനുള്ള നടപടികള് ആരംഭിച്ചതായി റോയല് കമ്മീഷന് ഫോര് റിയാദ് സിറ്റി അറിയിച്ചു. നഗരത്തിലെ അടിസ്ഥാന സൗകര്യങ്ങള് വികസിപ്പിക്കുന്നതിനും ഗതാഗത ശൃംഖല മെച്ചപ്പെടുത്തുന്നതിനുമുള്ള പദ്ധതിയുടെ ഭാഗമായാണ് ഈ നീക്കം.
പ്രിന്സ് തുര്ക്കി ബിന് അബ്ദുല് അസീസ് അല് അവ്വല് റോഡ് വികസനം, പ്രിന്സ് മിഷാല് ബിന് അബ്ദുല് അസീസ് റോഡിനെ ത്വാഇഫ് റോഡുമായി ബന്ധിപ്പിക്കല്, അല്-ഉറൂബ റോഡ് - അബ്ദുല് റഹ്മാന് അല്-ഗാഫിഖി - പ്രിന്സ് ബന്ദര് ബിന് അബ്ദുല് അസീസ് റോഡ് എന്നിവയുടെ വികസനം, നജ്മുദ്ദീന് അയ്യൂബി റോഡ് വികസനം എന്നിവയാണ് ഈ ഘട്ടത്തില് ഉള്പ്പെട്ടിരിക്കുന്ന പ്രധാന പദ്ധതികള്. ഏറ്റെടുക്കല് നടപടികളില് ഉള്പ്പെടുന്ന വസ്തുവകകളുടെ ഉടമസ്ഥര് നിശ്ചിത ഇലക്ട്രോണിക് ലിങ്ക് വഴി വിവരങ്ങള് സമര്പ്പിക്കണമെന്നും അല്ലെങ്കില് അതോറിറ്റിയുടെ റോഡ് ഇംപ്ലിമെന്റേഷന് ഓഫീസ് സന്ദര്ശിക്കണമെന്നും അധികൃതര് നിര്ദ്ദേശിച്ചു.
ആധാരത്തിന്റെ പകര്പ്പ്, ഉടമയുടെ നാഷണല് ഐഡി, പവര് ഓഫ് അറ്റോര്ണി (പ്രതിനിധി ഉണ്ടെങ്കില്), പ്രതിനിധിയുടെ ഐഡി, പ്രോപ്പര്ട്ടി സര്വേ റിപ്പോര്ട്ട്, അനന്തരാവകാശ രേഖകള് (ബാധകമെങ്കില്), കെട്ടിട നിര്മ്മാണ പെര്മിറ്റ് എന്നിവയാണ് അപേക്ഷയോടൊപ്പം സമര്പ്പിക്കേണ്ട രേഖകള്. കൂടുതല് വിവരങ്ങള്ക്കായി 19998 എന്ന ഏകീകൃത നമ്പറിലോ റിയാദിലെ കിംഗ് സല്മാന് നൈബര്ഹുഡിലുള്ള റോഡ് ഇംപ്ലിമെന്റേഷന് ഓഫീസിലോ ബന്ധപ്പെടാവുന്നതാണെന്ന് അതോറിറ്റി വ്യക്തമാക്കി.
Related News
