കെയ്റോ: ഇറാനെതിരെയുള്ള ഡോണള്‍ഡ് ട്രംപിന്റെ പുതിയ യുദ്ധഭീഷണിക്ക് പിന്നാലെ, ഗള്‍ഫ് മേഖലയെ ഒരു 'അഗ്‌നിഗോളമാക്കി' മാറ്റുന്നതില്‍ നിന്ന് അമേരിക്കന്‍ പ്രസിഡന്റിനെ തടയണമെന്ന് മുന്‍ യുഎന്‍ ആണവ ഏജന്‍സി മേധാവി മുഹമ്മദ് അല്‍-ബറാദി. ഗള്‍ഫ് രാജ്യങ്ങള്‍ തങ്ങളുടെ കൈവശമുള്ള എല്ലാ സ്വാധീനവും ഉപയോഗിച്ച് ട്രംപിന്റെ നീക്കങ്ങളെ പ്രതിരോധിക്കണമെന്ന് അദ്ദേഹം ആവശ്യപ്പെട്ടു.

1997 മുതല്‍ 2009 വരെ അന്താരാഷ്ട്ര ആണവോര്‍ജ്ജ ഏജന്‍സിയെ (IAEA) നയിച്ചിരുന്ന അല്‍-ബറാദി, തന്റെ എക്‌സ് പ്ലാറ്റ്ഫോമിലൂടെയാണ് ആശങ്ക പങ്കുവെച്ചത്. ഈ ഭ്രാന്തന്‍ മേഖലയെ ഒരു അഗ്‌നിഗോളമാക്കി മാറ്റുന്നതിന് മുന്‍പ് ദയവായി നിങ്ങളുടെ അധികാരത്തിലുള്ളതെല്ലാം ചെയ്യുക,' അദ്ദേഹം കുറിച്ചു.

മറ്റൊരു പോസ്റ്റില്‍ യുഎന്‍, യൂറോപ്യന്‍ യൂണിയന്‍ അക്കൗണ്ടുകളെയും ഫ്രഞ്ച് പ്രസിഡന്റ് ഇമ്മാനുവല്‍ മാക്രോണിനെയും അദ്ദേഹം ടാഗ് ചെയ്തു. ഈ 'ഭ്രാന്ത്' നിര്‍ത്താന്‍ ഒന്നും ചെയ്യാന്‍ കഴിയില്ലേ എന്ന് ചോദിച്ച അദ്ദേഹം ചൈനീസ്, റഷ്യന്‍ വിദേശകാര്യ മന്ത്രാലയങ്ങളുടെ ശ്രദ്ധയും ഈ വിഷയത്തിലേക്ക് ക്ഷണിച്ചു.

ഫെബ്രുവരി 28-ന് ആരംഭിച്ച യുഎസ്-ഇസ്രായേല്‍-ഇറാന്‍ യുദ്ധം രൂക്ഷമായി തുടരുന്നതിനിടെയാണ് ട്രംപിന്റെ പുതിയ ഭീഷണി. തന്ത്രപ്രധാനമായ ഹോര്‍മുസ് കടലിടുക്ക് തുറക്കുകയോ അല്ലെങ്കില്‍ ചര്‍ച്ചയ്ക്ക് തയ്യാറാവുകയോ ചെയ്തില്ലെങ്കില്‍ ഇറാന്‍ 'നരകം' അനുഭവിക്കേണ്ടി വരുമെന്നായിരുന്നു ട്രംപിന്റെ മുന്നറിയിപ്പ്. മാര്‍ച്ച് 26-ന് നല്‍കിയ പത്ത് ദിവസത്തെ സമയപരിധി അവസാനിക്കാന്‍ ഇനി 48 മണിക്കൂര്‍ മാത്രമാണ് ബാക്കിയുള്ളതെന്നും അദ്ദേഹം ഓര്‍മ്മിപ്പിച്ചു.

ഈജിപ്ഷ്യന്‍ മുന്‍ വൈസ് പ്രസിഡന്റ് കൂടിയായ 83-കാരനായ അല്‍-ബറാദി, ഇറാന്റെ ആണവ പദ്ധതിയുമായി ബന്ധപ്പെട്ട തര്‍ക്കങ്ങള്‍ ആഗോളതലത്തില്‍ ചര്‍ച്ചയായ കാലഘട്ടത്തിലാണ് ഐഎഇഎയെ നയിച്ചിരുന്നത്. ആണവോര്‍ജ്ജത്തിന്റെ സമാധാനപരമായ ഉപയോഗത്തിനായി നടത്തിയ പ്രവര്‍ത്തനങ്ങള്‍ പരിഗണിച്ച് 2005-ല്‍ അദ്ദേഹത്തിനും ഐഎഇഎയ്ക്കും സംയുക്തമായി സമാധാനത്തിനുള്ള നൊബേല്‍ സമ്മാനം ലഭിച്ചിട്ടുണ്ട്.