വാഷിംഗ്ടണ്‍/ടെഹ്റാന്‍: ഇറാനിലെ യുഎസ് സൈനിക നടപടികള്‍ ആഴ്ചകള്‍ക്കുള്ളില്‍ അവസാനിക്കുമെന്ന് യുഎസ് പ്രസിഡന്റ് ഡൊണാള്‍ഡ് ട്രംപ്. യുഎസ് സേന ഉടന്‍ മടങ്ങുമെന്ന് വ്യക്തമാക്കിയ ട്രംപ്, നിലവില്‍ ദൗത്യം പൂര്‍ത്തിയാക്കി വരികയാണെന്നും കൂട്ടിച്ചേര്‍ത്തു. ഫെബ്രുവരി 28-ന് ആരംഭിച്ച യുദ്ധത്തെത്തുടര്‍ന്ന് ഇന്ധനവില വര്‍ധിച്ചത് സംബന്ധിച്ച ചോദ്യങ്ങള്‍ക്ക് മറുപടി പറയുകയായിരുന്നു ട്രംപ്. 'രണ്ടാഴ്ചയോ അതില്‍ അല്പം കൂടുതല്‍ ദിവസമോ കൊണ്ട് ദൗത്യം പൂര്‍ത്തിയാക്കി യുഎസ് സേന മടങ്ങും. അതോടെ ഇന്ധനവില കുത്തനെ കുറയും,' വൈറ്റ് ഹൗസില്‍ നടന്ന ചടങ്ങില്‍ അദ്ദേഹം പറഞ്ഞു. ഇറാന്‍ ഭരണകൂടവുമായി ചര്‍ച്ചകള്‍ പുരോഗമിക്കുമ്പോഴും വ്യോമാക്രമണം തുടരുമെന്ന സൂചനയാണ് ട്രംപ് നല്‍കുന്നത്.
അതേസമയം, പശ്ചിമേഷ്യയില്‍ സുരക്ഷാ സാഹചര്യം അതീവ ഗുരുതരമായി തുടരുകയാണ്. ബുധനാഴ്ച പുലര്‍ച്ചെ ദോഹ തീരത്ത് ചരക്ക് കപ്പലിന് നേരെ ആക്രമണമുണ്ടായി. കുവൈറ്റ് വിമാനത്താവളത്തിലും ബഹ്റൈനിലെ വ്യവസായ കേന്ദ്രങ്ങളിലും ഇറാന്‍ നടത്തിയ ഡ്രോണ്‍ ആക്രമണങ്ങളില്‍ വന്‍ നാശനഷ്ടങ്ങള്‍ റിപ്പോര്‍ട്ട് ചെയ്തിട്ടുണ്ട്.
ഇറാന്‍ തലസ്ഥാനമായ ടെഹ്റാനിലെ വിവിധയിടങ്ങളില്‍ ബുധനാഴ്ച പുലര്‍ച്ചെ ശക്തമായ സ്‌ഫോടനങ്ങളുണ്ടായതായി ഇറാന്റെ ഔദ്യോഗിക വാര്‍ത്താ ഏജന്‍സിയായ ഐ.ആര്‍.ഐ.ബി (IRIB) റിപ്പോര്‍ട്ട് ചെയ്തു. വടക്കന്‍, കിഴക്കന്‍, മധ്യ ടെഹ്റാനുകളില്‍ ആക്രമണമുണ്ടായതായാണ് വിവരം. സ്‌ഫോടനങ്ങളെക്കുറിച്ചുള്ള കൂടുതല്‍ വിവരങ്ങള്‍ ലഭ്യമായിട്ടില്ല.
കുവൈറ്റ് അന്താരാഷ്ട്ര വിമാനത്താവളത്തിലെ ഇന്ധന സംഭരണികള്‍ക്ക് നേരെ ഇറാന്‍ അനുകൂല സായുധ സംഘങ്ങള്‍ ഡ്രോണ്‍ ആക്രമണം നടത്തി. ആക്രമണത്തെ തുടര്‍ന്ന് വന്‍ തീപിടുത്തമുണ്ടായെങ്കിലും ആര്‍ക്കും പരിക്കേറ്റതായി റിപ്പോര്‍ട്ടില്ല. ഇതൊരു നഗ്‌നമായ കടന്നുകയറ്റമാണെന്ന് കുവൈറ്റ് സിവില്‍ ഏവിയേഷന്‍ വക്താവ് അബ്ദുള്ള അല്‍ രാജ്ഹി പ്രതികരിച്ചു.
ബഹ്റൈനിലെ ഒരു പ്രമുഖ വ്യവസായ കേന്ദ്രത്തിന് നേരെ ഇറാന്‍ മിസൈല്‍-ഡ്രോണ്‍ ആക്രമണം നടത്തി. ആക്രമണത്തെ തുടര്‍ന്നുണ്ടായ തീ നിയന്ത്രിക്കാന്‍ സിവില്‍ ഡിഫന്‍സ് വിഭാഗം രംഗത്തുണ്ട്.
സൗദി അറേബ്യയുടെ ആകാശപരിധിയില്‍ പ്രവേശിച്ച രണ്ട് ഡ്രോണുകള്‍ പ്രതിരോധ സേന വെടിവെച്ചിട്ടതായി പ്രതിരോധ മന്ത്രാലയ വക്താവ് മേജര്‍ ജനറല്‍ തുര്‍ക്കി അല്‍ മാലിക്കി അറിയിച്ചു.
ദോഹ തീരത്ത് നിന്നും 17 നോട്ടിക്കല്‍ മൈല്‍ അകലെ വെച്ച് ഒരു ചരക്ക് കപ്പലിന് നേരെ അജ്ഞാത വസ്തു ഉപയോഗിച്ച് ആക്രമണമുണ്ടായി. കപ്പലിന്റെ ഹള്ളില്‍ കേടുപാടുകള്‍ സംഭവിച്ചെങ്കിലും ജീവനക്കാര്‍ സുരക്ഷിതരാണെന്ന് ബ്രിട്ടീഷ് മാരിടൈം ഏജന്‍സി വ്യക്തമാക്കി.
ഇസ്രായേലിന് നേരെ യെമനില്‍ നിന്ന് മിസൈല്‍
യെമനിലെ ഹൂതി വിമതര്‍ ഇസ്രായേലിന് നേരെ മിസൈല്‍ വിക്ഷേപിച്ചു. ഇസ്രായേല്‍ പ്രതിരോധ സേന മിസൈല്‍ വിജയകരമായി തടഞ്ഞതായാണ് റിപ്പോര്‍ട്ട്. ആക്രമണ ഭീഷണിയെത്തുടര്‍ന്ന് ജനങ്ങളോട് സുരക്ഷിത സ്ഥാനങ്ങളിലേക്ക് മാറാന്‍ അധികൃതര്‍ നിര്‍ദ്ദേശിച്ചു.
.jpg)
Related News
