ജെറുസലേം: പശ്ചിമേഷ്യയെ പിടിച്ചുലയ്ക്കുന്ന ഇറാന്‍-ഇസ്രായേല്‍ യുദ്ധം പുതിയ തലങ്ങളിലേക്ക്. ഇറാന്‍ തൊടുത്തുവിട്ട നൂറുകണക്കിന് മിസൈലുകള്‍ക്ക് മറുപടിയായി ഇറാന്റെ തലസ്ഥാനമായ തെഹ്റാനിലെ സൈനിക കേന്ദ്രങ്ങളില്‍ ഇസ്രായേല്‍ വ്യോമസേന ശക്തമായ ആക്രമണം നടത്തി. യുഎസ്-ഇസ്രായേല്‍ സഖ്യത്തിനെതിരെ യെമനിലെ ഹൂതി വിമതരും യുദ്ധത്തില്‍ ഔദ്യോഗികമായി ചേര്‍ന്നതോടെ മേഖലയില്‍ സംഘര്‍ഷം അതിരൂക്ഷമായിരിക്കുകയാണ്.

തിങ്കളാഴ്ച പുലര്‍ച്ചെ യെമനില്‍ നിന്ന് ഇസ്രായേലിന് നേരെ വന്ന രണ്ട് ഡ്രോണുകള്‍ തകര്‍ത്തതായി ഇസ്രായേല്‍ സൈന്യം അറിയിച്ചു. ശനിയാഴ്ച മുതലാണ് ഇറാന്‍ അനുകൂല ഹൂതികള്‍ ഇസ്രായേലിനെതിരെ ആക്രമണം ആരംഭിച്ചത്.

ഇറാനിലെ പുതിയ നേതൃത്വം 'നയപരമായ' സമീപനമാണ് സ്വീകരിക്കുന്നതെന്നും വിഷയത്തില്‍ നേരിട്ടും അല്ലാതെയുമുള്ള ചര്‍ച്ചകള്‍ നടക്കുന്നുണ്ടെന്നും അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് വ്യക്തമാക്കി. എയര്‍ഫോഴ്‌സ് വണ്‍ വിമാനത്തില്‍ മാധ്യമപ്രവര്‍ത്തകരോട് സംസാരിക്കവെയാണ് ട്രംപ് ഇക്കാര്യം അറിയിച്ചത്. ഫെബ്രുവരി 28-ന് ഇസ്രായേല്‍ നടത്തിയ ആക്രമണത്തില്‍ ഇറാന്റെ പരമോന്നത നേതാവ് അയത്തുള്ള അലി ഖാംനഇ കൊല്ലപ്പെട്ടിരുന്നു. തുടര്‍ന്ന് ചുമതലയേറ്റ അദ്ദേഹത്തിന്റെ മകന്‍ മുജ്താബ ഖാംനഇയുടെ നേതൃത്വത്തിലുള്ള ഭരണകൂടം കൂടുതല്‍ വിട്ടുവീഴ്ചകള്‍ക്ക് തയ്യാറായേക്കുമെന്നാണ് അമേരിക്കയുടെ കണക്കുകൂട്ടല്‍.

എങ്കിലും, ഇറാന്റെ എണ്ണക്കയറ്റുമതി കേന്ദ്രമായ ഖാര്‍ഗ് ഐലന്‍ഡ് പിടിച്ചെടുക്കുന്നതടക്കമുള്ള സൈനിക നീക്കങ്ങള്‍ അമേരിക്കന്‍ പ്രതിരോധ മന്ത്രാലയത്തിന്റെ പരിഗണനയിലുണ്ട്. ഇതിനായി ആയിരക്കണക്കിന് അമേരിക്കന്‍ സൈനികര്‍ ഇതിനോടകം തന്നെ മേഖലയില്‍ എത്തിക്കഴിഞ്ഞു.

മാസങ്ങളായി തുടരുന്ന യുദ്ധം ആഗോള സമ്പദ്വ്യവസ്ഥയെയും ഊര്‍ജ്ജ വിതരണത്തെയും തകിടം മറിച്ചിരിക്കുകയാണ്. ലോകത്തിലെ എണ്ണ-വാതക വിതരണത്തിന്റെ 20 ശതമാനവും കടന്നുപോകുന്ന ഹോര്‍മുസ് കടലിടുക്കില്‍ ഇറാന്‍ ഏര്‍പ്പെടുത്തിയ ഉപരോധം തുടരുകയാണ്. ഇതോടെ രാജ്യാന്തര വിപണിയില്‍ എണ്ണവില കുതിച്ചുയര്‍ന്നു. ബ്രെന്റ് ക്രൂഡ് ഓയില്‍ വില ബാരലിന് 115 ഡോളറിലെത്തി.

യുദ്ധത്തെത്തുടര്‍ന്ന് ഏഷ്യന്‍ ഓഹരി വിപണികളില്‍ വന്‍ ഇടിവ് രേഖപ്പെടുത്തി. ജപ്പാനിലെ നിക്കി സൂചിക 3 ശതമാനത്തിലധികം താഴ്ന്നു. വിമാന ഇന്ധന വില വര്‍ദ്ധിച്ചതോടെ ആഗോള വിമാനക്കമ്പനികള്‍ സര്‍വീസ് വെട്ടിക്കുറയ്ക്കുകയും ടിക്കറ്റ് നിരക്ക് വര്‍ദ്ധിപ്പിക്കുകയും ചെയ്തിട്ടുണ്ട്.

കഴിഞ്ഞ 24 മണിക്കൂറിനുള്ളില്‍ തെഹ്റാന്‍ ഉള്‍പ്പെടെയുള്ള ഇറാനിലെ മിസൈല്‍ ലോഞ്ചിംഗ് കേന്ദ്രങ്ങളില്‍ 140-ലധികം വ്യോമാക്രമണങ്ങള്‍ ഇസ്രായേല്‍ നടത്തി. ഇറാനും അമേരിക്കയ്ക്കും ഇടയില്‍ മധ്യസ്ഥത വഹിക്കുന്ന പാകിസ്ഥാന്‍, വരും ദിവസങ്ങളില്‍ സമാധാന ചര്‍ച്ചകള്‍ക്ക് ആതിഥേയത്വം വഹിക്കുമെന്ന് അറിയിച്ചു. എന്നാല്‍ കീഴടങ്ങാന്‍ തങ്ങള്‍ തയ്യാറല്ലെന്നും അപമാനം സഹിച്ചുള്ള ചര്‍ച്ചകള്‍ക്കില്ലെന്നും ഇറാന്റെ പാര്‍ലമെന്റ് സ്പീക്കര്‍ മുഹമ്മദ് ബാഖര്‍ ഖാലിബാഫ് വ്യക്തമാക്കി.

തെക്കന്‍ ലെബനനില്‍ ഹിസ്ബുള്ളയ്‌ക്കെതിരെ സൈനിക നടപടി വ്യാപിപ്പിക്കാന്‍ പ്രധാനമന്ത്രി ബെഞ്ചമിന്‍ നെതന്യാഹു ഉത്തരവിട്ടു. ഇവിടെ ഒരു 'ബഫര്‍ സോണ്‍' രൂപീകരിക്കാനാണ് ഇസ്രായേലിന്റെ നീക്കം.