തബൂക്ക്: കേരളത്തില്‍ എല്‍.ഡി.എഫ് സര്‍ക്കാരിന്റെ തുടര്‍ഭരണത്തിനായി 'മാസ്സ് തബൂക്കിന്റെ' നേതൃത്വത്തില്‍ തെരഞ്ഞെടുപ്പ് കണ്‍വെന്‍ഷന്‍ സംഘടിപ്പിച്ചു. പ്രവാസ ലോകത്തിന്റെ വിവിധ ഭാഗങ്ങളില്‍ നിന്നെത്തിയ നിരവധി പ്രവര്‍ത്തകര്‍ പരിപാടിയില്‍ പങ്കെടുത്തു.
കഴിഞ്ഞ പത്ത് വര്‍ഷമായി സംസ്ഥാനത്തെ എല്ലാ മേഖലകളെയും സ്പര്‍ശിക്കുന്ന സദ്ഭരണമാണ് ഇടതുപക്ഷ സര്‍ക്കാര്‍ കാഴ്ചവെച്ചതെന്ന് യോഗം വിലയിരുത്തി. വിദ്യാഭ്യാസ, ആരോഗ്യ, വ്യാവസായിക മേഖലകളില്‍ വിപ്ലവകരമായ മാറ്റങ്ങള്‍ക്കാണ് നാം സാക്ഷ്യം വഹിച്ചത്. പ്രവാസികളെ നെഞ്ചോട് ചേര്‍ത്തുപിടിച്ച പിണറായി സര്‍ക്കാര്‍, 500 രൂപയായിരുന്ന പ്രവാസി ക്ഷേമ പെന്‍ഷന്‍ 3,500 രൂപയാക്കി ഉയര്‍ത്തി. പ്രവാസി കുടുംബങ്ങളെക്കൂടി ഉള്‍പ്പെടുത്തിക്കൊണ്ടുള്ള 'നോര്‍ക്ക കെയര്‍' ഇന്‍ഷുറന്‍സ് പദ്ധതി വലിയൊരു ആശ്വാസമാണ്. കൂടാതെ, മടങ്ങിയെത്തുന്ന പ്രവാസികള്‍ക്ക് സ്വയം സംരംഭങ്ങള്‍ തുടങ്ങാന്‍ നോര്‍ക്ക റൂട്ട്‌സ് വഴി സബ്‌സിഡിയോടു കൂടിയ വായ്പയും പുനരധിവാസ പാക്കേജുകളും നടപ്പിലാക്കിവരുന്നു.
പവര്‍കട്ടോ ലോഡ്‌ഷെഡിങ്ങോ ഇല്ലാത്ത, വര്‍ഗീയ കലാപങ്ങളോ മതസ്പര്‍ദ്ധയോ ഇല്ലാത്ത പത്ത് വര്‍ഷങ്ങളാണ് കടന്നുപോയത്. ഈ ഭരണം തുടരേണ്ടത് കാലഘട്ടത്തിന്റെ അനിവാര്യതയാണ്. സര്‍ക്കാര്‍ തുടങ്ങിവെച്ച വികസന പ്രവര്‍ത്തനങ്ങളും ക്ഷേമ പദ്ധതികളും വയനാട് ടൗണ്‍ഷിപ്പ് ഉള്‍പ്പെടെയുള്ള പുനരധിവാസ പ്രവര്‍ത്തനങ്ങളും സമയബന്ധിതമായി പൂര്‍ത്തിയാക്കാന്‍ എല്‍.ഡി.എഫ് സര്‍ക്കാരിന്റെ തുടര്‍ഭരണത്തിനായി ഓരോ പ്രവാസിയും മുന്നിട്ടിറങ്ങണമെന്ന് കണ്‍വെന്‍ഷന്‍ ആഹ്വാനം ചെയ്തു. ഇതിന്റെ ഭാഗമായി പ്രധാന കേന്ദ്രങ്ങളിലും ലേബര്‍ ക്യാമ്പുകളിലും പ്രവാസി കുടുംബങ്ങള്‍ക്കിടയിലും സ്‌ക്വാഡ് പ്രവര്‍ത്തനങ്ങള്‍ നടത്താനും യോഗം തീരുമാനിച്ചു.
മുസ്തഫ തെക്കന്റെ അധ്യക്ഷതയില്‍ ചേര്‍ന്ന യോഗം മാസ് രക്ഷാധികാരി സമിതിയംഗം മാത്യു തോമസ് നെല്ലുവേലില്‍ ഉദ്ഘാടനം ചെയ്തു. രക്ഷാധികാരി സമിതിയംഗങ്ങളായ ഉബൈസ് മുസ്തഫ, റഹീം ഭരതന്നൂര്‍, കേളി അംഗം സജിത്ത് കെ.പി, വിശ്വന്‍, ഷമീര്‍, മാത്യു തോമസ്, സെന്‍സണ്‍, അനീഷ് തേള്‍പാറ, ബാദുഷ തുടങ്ങിയവര്‍ സംസാരിച്ചു. പ്രവീണ്‍ പുതിയണ്ടി സ്വാഗതവും യൂസഫ് നന്ദിയും രേഖപ്പെടുത്തി.
Related News
