ന്യൂഡല്‍ഹി: പശ്ചിമേഷ്യയിലെ നിലവിലെ അസാധാരണ സാഹചര്യത്തില്‍ ജി.സി.സി രാജ്യങ്ങളില്‍ ഭക്ഷ്യസുരക്ഷ ഉറപ്പാക്കാന്‍ ഇന്ത്യയുടെ എല്ലാവിധ പിന്തുണയും ഉണ്ടാകുമെന്ന് പ്രധാനമന്ത്രി നരേന്ദ്ര മോദി. ലുലു ഗ്രൂപ്പ് ചെയര്‍മാന്‍ എം.എ. യൂസഫലി ന്യൂഡല്‍ഹിയിലെ പ്രധാനമന്ത്രിയുടെ ഔദ്യോഗിക വസതിയില്‍ അദ്ദേഹവുമായി നടത്തിയ കൂടിക്കാഴ്ചയിലാണ് ഈ ഉറപ്പ് ലഭിച്ചത്.

ഗള്‍ഫ് രാഷ്ട്രങ്ങളില്‍ ഭക്ഷ്യലഭ്യത തടസ്സമില്ലാതെ ഉറപ്പാക്കാന്‍ ലുലു ഗ്രൂപ്പ് വിപുലമായ സജ്ജീകരണങ്ങളാണ് ഒരുക്കിയിരിക്കുന്നത്. ഇതിന്റെ ഭാഗമായി കൊച്ചി ഉള്‍പ്പെടെയുള്ള ഇന്ത്യന്‍ നഗരങ്ങളില്‍ നിന്ന് ദിവസേന പ്രത്യേക വിമാനങ്ങളിലും കപ്പലുകളിലുമായി ഭക്ഷ്യവസ്തുക്കള്‍ ഗള്‍ഫിലേക്ക് അയക്കുന്നുണ്ടെന്ന് യൂസഫലി പ്രധാനമന്ത്രിയെ അറിയിച്ചു.

ഇതുവരെ 30-ലധികം ചാര്‍ട്ടേഡ് വിമാനങ്ങളിലും കപ്പലുകളിലുമായി 15,000 ടണ്ണിലധികം ഭക്ഷ്യവസ്തുക്കള്‍ ലുലു ഗ്രൂപ്പ് ഇന്ത്യയില്‍ നിന്ന് ഗള്‍ഫിലെത്തിച്ചു. വിമാനങ്ങള്‍ക്ക് പുറമെ കപ്പല്‍ സര്‍വീസുകളും ഈ ദൗത്യത്തിനായി കാര്യക്ഷമമായി പ്രയോജനപ്പെടുത്തുന്നുണ്ട്. ഗള്‍ഫ് രാജ്യങ്ങളിലെ ഭക്ഷ്യക്ഷാമം പരിഹരിക്കുന്നതിനോടൊപ്പം തന്നെ, ഇന്ത്യയിലെ കര്‍ഷകര്‍ക്ക് തങ്ങളുടെ ഉല്‍പ്പന്നങ്ങള്‍ക്ക് മികച്ച വിപണി കണ്ടെത്താനും ഈ നീക്കം ഏറെ സഹായകമാകുന്നു.

ഗള്‍ഫ് മേഖലയിലെ പ്രതിസന്ധി ഘട്ടത്തില്‍ ഭക്ഷ്യവസ്തുക്കളുടെ വിതരണം സുഗമമായി തുടരുന്നത് പ്രവാസി സമൂഹത്തിന് വലിയ ആശ്വാസമാണ്. ഇന്ത്യയും ജി.സി.സി രാജ്യങ്ങളും തമ്മിലുള്ള ഉഭയകക്ഷി ബന്ധം ശക്തിപ്പെടുത്തുന്നതിനൊപ്പം കാര്‍ഷിക മേഖലയ്ക്കും ഈ ദൗത്യം പുത്തന്‍ ഉണര്‍വ് നല്‍കുന്നുവെന്ന് ലുലു ഗ്രൂപ്പ് വ്യക്തമാക്കി.