റിയാദ്: വിശുദ്ധ റമദാന്‍ പ്രമാണിച്ച് കോട്ടക്കല്‍ മണ്ഡലത്തിലെ 10 മുതല്‍ 15 വയസ്സ് വരെയുള്ള വിദ്യാര്‍ത്ഥി-വിദ്യാര്‍ത്ഥിനികള്‍ക്കായി റിയാദ് - കോട്ടക്കല്‍ മണ്ഡലം കെ.എം.സി.സി സംഘടിപ്പിച്ച ഓണ്‍ലൈന്‍ ഖുര്‍ആന്‍ പാരായണ മത്സരം 'തംജീദ് സീസണ്‍-2' സമാപിച്ചു. കഴിഞ്ഞ ഞായറാഴ്ച നടന്ന ഫൈനല്‍ മത്സരത്തില്‍ എട്ട് ആണ്‍കുട്ടികളും എട്ട് പെണ്‍കുട്ടികളുമാണ് മാറ്റുരച്ചത്.

മത്സരത്തില്‍ ആദ്യ മൂന്ന് സ്ഥാനങ്ങള്‍ നേടുന്നവര്‍ക്ക് ആകര്‍ഷകമായ ക്യാഷ് പ്രൈസുകളാണ് പ്രഖ്യാപിച്ചിരിക്കുന്നത്:

ഒന്നാം സ്ഥാനം: 10,001 രൂപ, രണ്ടാം സ്ഥാനം: 5,001 രൂപ, മൂന്നാം സ്ഥാനം: 3,001 രൂപ. മത്സരഫലം കേരള നിയമസഭാ തിരഞ്ഞെടുപ്പിന് ശേഷം നാട്ടില്‍ വെച്ച് നടക്കുന്ന പൊതുപരിപാടിയില്‍ പ്രഖ്യാപിക്കുമെന്ന് മണ്ഡലം കെ.എം.സി.സി പ്രസിഡന്റ് ബഷീര്‍ മുല്ലപ്പള്ളി, ജനറല്‍ സെക്രട്ടറി അഷ്‌റഫ് പുറമണ്ണൂര്‍, ട്രഷറര്‍ ഗഫൂര്‍ കൊന്നക്കാട്ടില്‍ എന്നിവര്‍ അറിയിച്ചു.

ഖുര്‍ആന്‍ പാരായണ നിയമങ്ങള്‍ (തജ്വീദ്) കൃത്യമായി പഠിച്ച് ശരിയായ രീതിയില്‍ പാരായണം ചെയ്യാന്‍ കുട്ടികളെ പ്രോത്സാഹിപ്പിക്കുക എന്നതായിരുന്നു ഈ മത്സരം കൊണ്ട് ലക്ഷ്യമാക്കിയത്. മത്സരത്തില്‍ പങ്കെടുത്ത മുഴുവന്‍ വിദ്യാര്‍ത്ഥികളെയും റിയാദ് - കോട്ടക്കല്‍ മണ്ഡലം കെ.എം.സി.സി ഭാരവാഹികള്‍ അഭിനന്ദിച്ചു.