ജിദ്ദ: നഗരത്തിലെ പൊതുഗതാഗത ശൃംഖല വിപുലീകരിക്കുന്നതിന്റെ ഭാഗമായി ജിദ്ദ ട്രാന്‍സ്‌പോര്‍ട്ട് കമ്പനി പുതിയ രണ്ട് ബസ് റൂട്ടുകള്‍ കൂടി ആരംഭിച്ചു. താമസക്കാര്‍ക്കും സന്ദര്‍ശകര്‍ക്കും സുഗമമായ യാത്ര ഉറപ്പാക്കുന്നതിനായി റൂട്ട് 15, റൂട്ട് 16 എന്നിവയാണ് പുതുതായി സര്‍വീസ് തുടങ്ങിയത്. നഗരത്തിലെ പ്രധാന കേന്ദ്രങ്ങളെ തമ്മില്‍ ബന്ധിപ്പിക്കുന്നതിനും യാത്രക്കാര്‍ക്ക് കൂടുതല്‍ യാത്രാ ഓപ്ഷനുകള്‍ നല്‍കുന്നതിനുമാണ് പുതിയ റൂട്ടുകള്‍ ലക്ഷ്യമിടുന്നത്.

റൂട്ട് 15: പ്രിന്‍സ് സുല്‍ത്താന്‍ റോഡ് വഴിയുള്ള സര്‍വീസാണ്. റൂട്ട് 16: ജിദ്ദ കോര്‍ണിഷിനെ പ്രിന്‍സ് ഫൈസല്‍ ബിന്‍ ഫഹദ് റോഡുമായി ബന്ധിപ്പിക്കുന്നതാണ്.എല്ലാ ദിവസവും വൈകുന്നേരം 4 മണി മുതല്‍ രാത്രി 11 മണി വരെയാണ് ബസുകള്‍ സര്‍വീസ് നടത്തുക. എന്നാല്‍ തിരക്ക് പരിഗണിച്ച് വ്യാഴം, വെള്ളി ദിവസങ്ങളില്‍ പുലര്‍ച്ചെ 2 മണി വരെ സര്‍വീസ് ഉണ്ടാകും.

റൂട്ട് 16 റൂട്ടില്‍ 15 സ്റ്റോപ്പുകളുണ്ടാകും. ഓരോ 45 മിനിറ്റിലും ബസ് ലഭ്യമാകും. ദിവസം 30 ട്രിപ്പുകള്‍ വരെയാണ് ഈ റൂട്ടില്‍ വിഭാവനം ചെയ്തിരിക്കുന്നത്. റൂട്ട് 15: ഓരോ 35 മിനിറ്റിലും ബസ് സര്‍വീസ് ഉണ്ടാകും. പ്രതിദിനം 35 ട്രിപ്പുകള്‍ വരെ ഈ റൂട്ടില്‍ നടത്തും.

ജിദ്ദ നഗരത്തിന്റെ ദ്രുതഗതിയിലുള്ള വളര്‍ച്ചയ്ക്ക് അനുസൃതമായി പൊതുഗതാഗത സംവിധാനം വികസിപ്പിക്കുന്നതിന്റെ ഭാഗമാണിതെന്ന് ജിദ്ദ ട്രാന്‍സ്‌പോര്‍ട്ട് കമ്പനി സി.ഇ.ഒ യൂസഫ് അല്‍ സായിഗ് പറഞ്ഞു. സൗദി വിഷന്‍ 2030-ന്റെ ലക്ഷ്യങ്ങള്‍ക്കനുസരിച്ച് ജനങ്ങളുടെ ജീവിതനിലവാരം ഉയര്‍ത്തുന്നതിനും ആധുനികവും സുരക്ഷിതവുമായ യാത്രാസൗകര്യങ്ങള്‍ ഒരുക്കുന്നതിനും കമ്പനി പ്രതിജ്ഞാബദ്ധമാണെന്നും അദ്ദേഹം കൂട്ടിച്ചേര്‍ത്തു.

യാത്രകള്‍ പ്ലാന്‍ ചെയ്യുന്നതിനും ബസ് സമയവിവരങ്ങള്‍ തത്സമയം അറിയുന്നതിനും 'Jeddah Buses' ആപ്പ് ഡൗണ്‍ലോഡ് ചെയ്യുക.