റിയാദ്- സൗദി അറേബ്യയുടെ വിവിധ ഭാഗങ്ങളില്‍ തുടരുന്ന ശക്തമായ മഴയുടെ പശ്ചാത്തലത്തില്‍, ചെങ്കടലില്‍ നീര്‍ച്ചുഴികള്‍ രൂപപ്പെടാന്‍ സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം വക്താവ് ഹുസൈന്‍ അല്‍ ഖഹ്താനി അറിയിച്ചു. മഴയെത്തുടര്‍ന്നുണ്ടാകുന്ന പ്രത്യേക അന്തരീക്ഷ സാഹചര്യങ്ങള്‍ കാരണം രാജ്യത്തിന്റെ ചിലയിടങ്ങളില്‍ ഫണല്‍ മേഘങ്ങള്‍ (Funnel Clouds) പ്രത്യക്ഷപ്പെടാനുള്ള സാധ്യതയും തള്ളിക്കളയാനാവില്ലെന്ന് അദ്ദേഹം വ്യക്തമാക്കി. ഈ സാഹചര്യത്തില്‍ കടലില്‍ പോകുന്നവരും തീരപ്രദേശങ്ങളില്‍ ഉള്ളവരും അതീവ ജാഗ്രത പാലിക്കണമെന്നും അദ്ദേഹം ഓര്‍മ്മിപ്പിച്ചു.
രാജ്യത്തിന്റെ പല ഭാഗങ്ങളിലും വരും ദിവസങ്ങളിലും വ്യത്യസ്ത അളവിലുള്ള മഴ തുടരാന്‍ സാധ്യതയുള്ളതിനാല്‍ ഔദ്യോഗിക നിര്‍ദ്ദേശങ്ങള്‍ കര്‍ശനമായി പാലിക്കണമെന്ന് അല്‍ ഖഹ്താനി ആവശ്യപ്പെട്ടു. നൂതന കാലാവസ്ഥാ നിരീക്ഷണ സാങ്കേതിക വിദ്യകള്‍ പിന്തുടരുന്നതിനൊപ്പം അതോറിറ്റികള്‍ നല്‍കുന്ന സുരക്ഷാ മാനദണ്ഡങ്ങള്‍ അനുസരിക്കേണ്ടത് അനിവാര്യമാണെന്നും അദ്ദേഹം ചൂണ്ടിക്കാട്ടി. മഴയ്ക്കൊപ്പം പെട്ടെന്നുണ്ടാകുന്ന കാറ്റും താപനിലയിലെ കുറവും അപകടങ്ങള്‍ വിളിച്ചുവരുത്തിയേക്കാമെന്നും അദ്ദേഹം മുന്നറിയിപ്പ് നല്‍കി.
കനത്ത മഴക്കൊപ്പം അതിശക്തമായ കാറ്റ്, ആലിപ്പഴ വര്‍ഷം, അന്തരീക്ഷ ഊഷ്മാവിലെ പെട്ടെന്നുള്ള ഇടിവ്, മൂടല്‍മഞ്ഞ്, പൊടിക്കാറ്റ് എന്നിവക്കും സാധ്യതയുണ്ട്. വടക്കന്‍ മേഖലകളിലെ തബൂക്കിലെ പര്‍വതനിരകളിലും പ്രത്യേകിച്ച് അല്‍മണ്ട് മലനിരകളിലും മഞ്ഞുവീഴ്ചക്ക് സാധ്യതയുണ്ടെന്നും അദ്ദേഹം നിരീക്ഷിച്ചു. കടലില്‍ ഉയര്‍ന്ന തിരമാലകള്‍ക്കും സാധ്യതയുള്ളതിനാല്‍ കാലാവസ്ഥാ മാറ്റങ്ങള്‍ കൃത്യമായി നിരീക്ഷിച്ചുകൊണ്ടേയിരിക്കണമെന്ന് അധികൃതര്‍ അറിയിച്ചു.
മക്ക, മദീന, റിയാദ്, ഖാസിം, തബൂക്ക് ഉള്‍പ്പെടെയുള്ള 13 ഓളം പ്രവിശ്യകളില്‍ ഇടിമിന്നലോടു കൂടിയ ഇടത്തരം മുതല്‍ ശക്തമായ മഴ വരെ ലഭിക്കുമെന്ന് കാലാവസ്ഥാ കേന്ദ്രം പ്രവചിക്കുന്നു. ഇത് പലയിടങ്ങളിലും പെട്ടെന്നുള്ള പ്രളയത്തിന് കാരണമായേക്കാം. ശക്തമായ പൊടിക്കാറ്റ് മൂലം കാഴ്ചപരിധി തീരെ കുറയാന്‍ സാധ്യതയുള്ളതിനാല്‍ വാഹനമോടിക്കുന്നവര്‍ പ്രത്യേകം ശ്രദ്ധിക്കണം. കിഴക്കന്‍ പ്രവിശ്യ, വടക്കന്‍ അതിര്‍ത്തികള്‍, അല്‍-ജൗഫ്, ഹാഇല്‍, അല്‍-ബാഹ, അസീര്‍, ജിസാന്‍, നജ്റാന്‍ തുടങ്ങിയ മേഖലകളിലും വരും ദിവസങ്ങളില്‍ ജാഗ്രത തുടരും.
Related News
