ജിദ്ദ: ജിദ്ദയിലെ പ്രമുഖ വനിതാ സംഘടനയായ Empowering Women's Alliance (EWA) അംഗങ്ങള്‍ക്കായി ഇഫ്താര്‍ വിരുന്നൊരുക്കി. വനിതകളുടെ ഉന്നമനത്തിനും ശാക്തീകരണത്തിനുമായി രൂപീകരിച്ച EWA, ശ്രദ്ധേയമായ സാംസ്‌കാരിക പ്രവര്‍ത്തനങ്ങളാണ് നടത്തുന്നത്. വിവിധ മേഖലകളില്‍ കഴിവ് തെളിയിച്ച കുടുംബിനികളെയും ഉദ്യോഗസ്ഥരെയും കോര്‍ത്തിണക്കി പ്രശസ്ത ഗായികയും സാമൂഹിക പ്രവര്‍ത്തകയുമായ സോഫിയ സുനിലിന്റെ നേതൃത്വത്തില്‍ രണ്ട് വര്‍ഷം മുമ്പാണ് സംഘടന രൂപീകൃതമായത്.
ജിദ്ദ റിഹാബിലെ പാര്‍ക്കില്‍ നടന്ന ഇഫ്താര്‍ സംഗമത്തിന് അഡ്മിനും ഫൗണ്ടറുമായ സോഫിയ സുനിലിനോടൊപ്പം കോര്‍ഡിനേറ്റര്‍മാരായ സബീന റാഫി, ജ്യോതി ബാബുകുമാര്‍, സാബിറ മജീദ് എന്നിവര്‍ നേതൃത്വം നല്‍കി. എക്‌സിക്യൂട്ടീവ് അംഗങ്ങളടക്കമുള്ളവര്‍ വീടുകളില്‍ നിന്ന് തയ്യാറാക്കി കൊണ്ടുവന്ന രുചികരമായ വിഭവങ്ങള്‍ വിരുന്നിന് മാറ്റ് കൂട്ടി.
ഭക്ഷണം പങ്കുവെക്കുന്നതിലുപരി പരസ്പര സഹകരണവും ഒത്തൊരുമയും ഐക്യവുമാണ് ഇത്തരം സംഗമങ്ങളിലൂടെ ലക്ഷ്യമിടുന്നതെന്നും, റമദാനിലെ പുണ്യദിനങ്ങളില്‍ പ്രാര്‍ത്ഥനകള്‍ക്കായി വിശ്വാസികള്‍ കൂടുതല്‍ സമയം മാറ്റിവെക്കണമെന്നും സോഫിയ സുനില്‍ തന്റെ പ്രസംഗത്തില്‍ ഓര്‍മ്മിപ്പിച്ചു. ചടങ്ങില്‍ മറിയം റോസ് ടീച്ചര്‍ റമദാന്‍ സന്ദേശം നല്‍കി. അംഗങ്ങളുടെ കുടുംബാംഗങ്ങളുടെയും ഭര്‍ത്താക്കന്മാരുടെയും സജീവ സഹകരണം പരിപാടിയുടെ വിജയത്തിന് കരുത്തേകി.
