ദുബായ്: ഇറാനെതിരെയുള്ള സൈനിക നീക്കങ്ങള്‍ ശക്തമായതോടെ ആഗോള വിപണിയില്‍ എണ്ണവില കുതിച്ചുയരുന്നു. ഇത് യുഎഇ അടക്കമുള്ള രാജ്യങ്ങളിലെ പലിശനിരക്കുകളെ ബാധിക്കുമെന്ന ആശങ്ക ശക്തമായി. യുഎഇയിലെയും അമേരിക്കയിലെയും സാധാരണക്കാരായ ഉപഭോക്താക്കളെയും നിക്ഷേപകരെയും ഒരുപോലെ ബാധിക്കുന്ന അനിശ്ചിതാവസ്ഥയാണ് നിലവില്‍ സംജാതമായിരിക്കുന്നത്.

ഒറ്റ സെഷനില്‍ തന്നെ ബ്രെന്റ് ക്രൂഡ് ഓയില്‍ വിലയില്‍ 9 ശതമാനത്തിലധികം വര്‍ധനവാണ് രേഖപ്പെടുത്തിയത്. ഇറാനു നേരെ അമേരിക്കയും ഇസ്രായേലും നടത്തിയ ആക്രമണങ്ങളും ഇതിനെതിരെയുള്ള ഇറാന്റെ തിരിച്ചടിയുമാണ് വിലക്കയറ്റത്തിന് കാരണമായത്. ലോകത്തിലെ ക്രൂഡ് ഓയില്‍ വിതരണത്തിന്റെ 20 ശതമാനവും കടന്നുപോകുന്ന ഹോര്‍മുസ് കടലിടുക്കിലെ കപ്പല്‍ ഗതാഗതത്തിന് ഭീഷണി നേരിടുന്നുവെന്ന റിപ്പോര്‍ട്ടുകള്‍ വിപണിയെ കൂടുതല്‍ ഉത്കണ്ഠയിലാഴ്ത്തുന്നു.

എണ്ണവിലയിലെ പെട്ടെന്നുള്ള വര്‍ധനവ് ആഗോള ഓഹരി വിപണികളെ പിടിച്ചുലച്ചിട്ടുണ്ട്. പണപ്പെരുപ്പം നിയന്ത്രിക്കുന്നതിന്റെ ഭാഗമായി ഈ വര്‍ഷം പലിശനിരക്കുകള്‍ കുറയുമെന്ന് പ്രതീക്ഷിച്ചിരുന്ന യുഎഇയിലെ വായ്പക്കാര്‍ക്കും ബിസിനസ് സ്ഥാപനങ്ങള്‍ക്കും പുതിയ സാഹചര്യം തിരിച്ചടിയായേക്കാം.

ദുബായ് ആസ്ഥാനമായുള്ള ഡെവെറെ ഗ്രൂപ്പിന്റെ ചീഫ് എക്‌സിക്യൂട്ടീവ് നൈജല്‍ ഗ്രീന്‍ പറയുന്നതനുസരിച്ച്, എണ്ണവിലയിലെ ഈ കുതിച്ചുചാട്ടം പണപ്പെരുപ്പ നിരക്കിനെ വീണ്ടും ഉയര്‍ത്താന്‍ സാധ്യതയുണ്ട്.

'ബ്രെന്റ് ക്രൂഡ് വില 90 ഡോളറിലേക്ക് നീങ്ങുന്നത് പണപ്പെരുപ്പ സാഹചര്യങ്ങളെ മാറ്റുകയും പലിശനിരക്ക് കുറയ്ക്കാനുള്ള നീക്കങ്ങളെ തടയുകയും ചെയ്യും. 2026 വരെ ഉയര്‍ന്ന പലിശനിരക്ക് തുടരാനുള്ള സാധ്യത നിക്ഷേപകര്‍ കണക്കിലെടുക്കണം,' അദ്ദേഹം മുന്നറിയിപ്പ് നല്‍കി.

മാര്‍ച്ച് 17-18 തീയതികളില്‍ ചേരുന്ന യുഎസ് ഫെഡറല്‍ ഓപ്പണ്‍ മാര്‍ക്കറ്റ് കമ്മിറ്റി പലിശനിരക്കില്‍ മാറ്റം വരുത്താന്‍ സാധ്യതയില്ലെന്നാണ് സാമ്പത്തിക വിദഗ്ധരുടെ വിലയിരുത്തല്‍. നിലവില്‍ 3.5% മുതല്‍ 3.75% വരെയുള്ള നിരക്കില്‍ തന്നെ ഇത് തുടര്‍ന്നേക്കും.

ഹോര്‍മുസ് കടലിടുക്കിലെ ഗതാഗതം ദീര്‍ഘകാലത്തേക്ക് തടസ്സപ്പെട്ടില്ലെങ്കില്‍ പണപ്പെരുപ്പത്തില്‍ വലിയ ആഘാതം ഉണ്ടാകില്ലെന്ന് വെല്‍സ് ഫാര്‍ഗോ ചീഫ് ഇക്കണോമിസ്റ്റ് ടോം പോര്‍സെല്ലി അഭിപ്രായപ്പെട്ടു. എങ്കിലും സ്ഥിതിഗതികള്‍ അതിവേഗം മാറിക്കൊണ്ടിരിക്കുകയാണെന്ന് അദ്ദേഹം ഓര്‍മ്മിപ്പിച്ചു.

യുഎഇ ദിര്‍ഹം യുഎസ് ഡോളറുമായി ബന്ധിപ്പിച്ചിരിക്കുന്നതിനാല്‍, അമേരിക്കന്‍ ഫെഡറല്‍ റിസര്‍വ് എടുക്കുന്ന പലിശനിരക്ക് തീരുമാനങ്ങള്‍ യുഎഇ സെന്‍ട്രല്‍ ബാങ്കും നേരിട്ട് പിന്തുടരുകയാണ് പതിവ്. അതിനാല്‍, അമേരിക്കയില്‍ പലിശനിരക്ക് ഉയര്‍ന്ന നിലയില്‍ തുടരുന്നത് യുഎഇയിലെ ഭവന വായ്പകള്‍ ഉള്‍പ്പെടെയുള്ള ബാധ്യതകളുടെ ഭാരം കുറയാന്‍ വൈകാനിടയാക്കും.