കൊച്ചി: വിവാദ ചിത്രം 'ദി കേരള സ്റ്റോറി 2: ഗോസ് ബിയോണ്ട്' റിലീസിനെതിരെ സംസ്ഥാന വ്യാപകമായി ഡിവൈഎഫ്‌ഐയുടെ പ്രതിഷേധം. കൊച്ചിയിലും കണ്ണൂരിലും ഉള്‍പ്പെടെ വിവിധ തീയറ്ററുകളില്‍ പ്രവര്‍ത്തകര്‍ പ്രതിഷേധവുമായി എത്തിയതോടെ പലയിടങ്ങളിലും പ്രദര്‍ശനം തടസ്സപ്പെട്ടു. പ്രതിഷേധത്തിനൊപ്പം കാണികള്‍ കുറവായതും സിനിമയുടെ പ്രദര്‍ശനത്തെ ബാധിച്ചു.
എറണാകുളം ഷേണായീസ് തീയറ്ററില്‍ ഡിവൈഎഫ്‌ഐ പ്രവര്‍ത്തകര്‍ പ്രതിഷേധവുമായി എത്തിയത് അധികൃതരുമായി വാക്കേറ്റത്തിന് കാരണമായി. കേരളത്തെ ഇകഴ്ത്തിക്കാണിക്കുന്ന സിനിമയുടെ പ്രദര്‍ശനം അനുവദിക്കില്ലെന്ന നിലപാടിലായിരുന്നു പ്രവര്‍ത്തകര്‍. പ്രതിഷേധത്തെ തുടര്‍ന്ന് രാവിലെ 10.10-ന് നടത്താനിരുന്ന ഷോ മാറ്റി വെച്ചു. കണ്ണൂര്‍ ലിബര്‍ട്ടി തീയറ്ററിലും സമാനമായ രീതിയില്‍ പ്രതിഷേധം അരങ്ങേറി.
പ്രതിഷേധങ്ങള്‍ക്കിടയിലും കാണികള്‍ തീരെ കുറവായതിനെ തുടര്‍ന്ന് കൊച്ചിയിലെയും കണ്ണൂരിലെയും പ്രമുഖ തീയറ്ററുകള്‍ പ്രദര്‍ശനം റദ്ദാക്കി. എറണാകുളം ഷേണായീസ്, കൊച്ചി ഫോറം മാള്‍, കണ്ണൂരിലെ രണ്ട് തീയറ്ററുകള്‍ എന്നിവിടങ്ങളിലെ ഷോകളാണ് ഒഴിവാക്കിയത്. പലയിടങ്ങളിലും പത്തില്‍ താഴെ ആളുകള്‍ മാത്രമാണ് ടിക്കറ്റ് ബുക്ക് ചെയ്തിരുന്നത്.
സിനിമയുടെ റിലീസ് തടഞ്ഞ സിംഗിള്‍ ബെഞ്ച് ഉത്തരവ് ഹൈക്കോടതി ഡിവിഷന്‍ ബെഞ്ച് സ്റ്റേ ചെയ്തതിനെ തുടര്‍ന്നാണ് ചിത്രം തീയറ്ററുകളില്‍ എത്തിയത്. ജസ്റ്റിസ് സുശ്രുത് അരവിന്ദ് ധര്‍മ്മാധികാരി, ജസ്റ്റിസ് പി.വി. ബാലകൃഷ്ണന്‍ എന്നിവരടങ്ങിയ ബെഞ്ചാണ് റിലീസിന് അനുമതി നല്‍കിയത്.
സിനിമ പൂര്‍ണ്ണമായി കാണാതെ ഏതാനും ക്ലിപ്പിംഗുകളുടെ അടിസ്ഥാനത്തില്‍ റിലീസ് തടയാനാകില്ലെന്ന് കോടതി നിരീക്ഷിച്ചു. സെന്‍സര്‍ ബോര്‍ഡ് നിര്‍ദ്ദേശിച്ച മാറ്റങ്ങള്‍ വരുത്തിയാണ് ചിത്രം എത്തിയതെന്നും കോടതി ചൂണ്ടിക്കാട്ടി. ക്രമസമാധാന പ്രശ്‌നങ്ങള്‍ ഉണ്ടാകുമെന്ന് ഭയന്ന് സിനിമ തടയാനാകില്ലെന്നും അത്തരം സാഹചര്യങ്ങള്‍ കൈകാര്യം ചെയ്യേണ്ടത് സര്‍ക്കാരിന്റെ ഉത്തരവാദിത്തമാണെന്നും ഡിവിഷന്‍ ബെഞ്ച് വ്യക്തമാക്കി.
Related News
