റിയാദ്: കോഴിക്കോട് നിവാസികളുടെ കൂട്ടായ്മയായ 'കോഴിക്കോടന്‍സ്' ഇഫ്താര്‍ സംഗമം സംഘടിപ്പിച്ചു. മലാസ് കാന്റീന്‍ ലോഞ്ച് ലുലു റൂഫ്‌ടോപ് അരീനയില്‍ നടന്ന സംഗമം റിയാദ് മീഡിയ ഫോറം ജനറല്‍ സെക്രട്ടറി ജയന്‍ കൊടുങ്ങല്ലൂര്‍ ഉദ്ഘാടനം ചെയ്തു. റമദാനിലെ ഇഫ്താര്‍ സംഗമങ്ങള്‍ കേവലം വ്രതം അവസാനിപ്പിക്കുന്ന ചടങ്ങുകള്‍ മാത്രമല്ല; സൗഹൃദത്തിന്റെയും സഹിഷ്ണുതയുടെയും മതസൗഹാര്‍ദത്തിന്റെയും മഹത്തായ സന്ദേശം ലോകത്തിന് നല്‍കുന്ന സംഗമങ്ങളുമാണെന്ന് അദ്ദേഹം അഭിപ്രായപ്പെട്ടു.
അബ്ദുല്‍ ലത്തീഫ് ഓമശ്ശേരി റമദാന്‍ സന്ദേശം കൈമാറി. ആത്മീയ കരുത്ത് നേടുന്നതിനോടൊപ്പം ആത്മപരിശോധന നടത്തേണ്ട മാസമാണ് റമദാനെന്നും, തനിക്കുചുറ്റുമുള്ളവരോടുള്ള ബാധ്യതകളെക്കുറിച്ചുള്ള സ്വയം തിരിച്ചറിവ് ഈ മാസത്തില്‍ നേടണമെന്നും അദ്ദേഹം ഉത്ബോധിപ്പിച്ചു. ചീഫ് ഓര്‍ഗനൈസര്‍ കെ. സി. ഷാജു അധ്യക്ഷനായിരുന്നു.
കോഴിക്കോടന്‍സ് ആറാം സീസണ്‍ ലോഞ്ചിംഗ് ചടങ്ങിനോടനുബന്ധിച്ച് നടത്തിയ ഷോര്‍ട്ട് വീഡിയോ മത്സരത്തില്‍ ഒന്നാം സ്ഥാനം നേടിയ ഫിജിന കബീറിന് മാധ്യമപ്രവര്‍ത്തകന്‍ ഷംനാദ് കരുനാഗപ്പള്ളി സര്‍ട്ടിഫിക്കറ്റും സമ്മാനവും വിതരണം ചെയ്തു. രണ്ടാം സ്ഥാനം നേടിയ ശബ്നം ഷംസുദ്ധീനിന് ലത്തീഫ് തെച്ചിയും മൂന്നാം സ്ഥാനം നേടിയ അനീഷ റഹീസിന് മുനീബ് പാഴൂരും സമ്മാനങ്ങള്‍ നല്‍കി. മത്സരത്തില്‍ മികച്ച പ്രകടനം കാഴ്ചവെച്ച വി. കെ. കെ. അബ്ബാസിന് ബഷീര്‍ പാരഗണ്‍, ഷാലിമ റാഫിക്ക്, ഇബ്റാഹിം സുബ്ഹാന്‍ എന്നിവര്‍ സര്‍ട്ടിഫിക്കറ്റുകള്‍ കൈമാറി.
ചടങ്ങില്‍ മുന്‍ ചീഫ് ഓര്‍ഗനൈസര്‍ ഹര്‍ഷദ് ഫറോക്ക്, അനില്‍ മാവൂര്‍, മുഹമ്മദ് ഷാഹിന്‍ എന്നിവര്‍ സംസാരിച്ചു. റയീസ് കെ. പി., അബ്ദുള്‍റഷീദ് പൂനൂര്‍, നിസാം ചെറുവാടി, അന്‍സാര്‍ കൊടുവള്ളി, സി. ടി. സഫറുള്ള എന്നിവര്‍ പരിപാടികള്‍ നിയന്ത്രിച്ചു. നിഹാദ് കല്ലായി സ്വാഗതവും ആസിഫ് കൊയിലാണ്ടി നന്ദിയും പറഞ്ഞു.
ഫോട്ടോ: ഇഫ്താര്‍ സംഗമം റിയാദ് മീഡിയ ഫോറം ജനറല്‍ സെക്രട്ടറി ജയന്‍ കൊടുങ്ങല്ലൂര്‍ ഉദ്ഘാടനം ചെയ്യുന്നു, ഷോര്‍ട്ട് വീഡിയോ മത്സരത്തിലെ വിജയിക്ക് ഷംനാദ് കരുനാഗപ്പള്ളി സമ്മാനം നല്‍കുന്നു.
