ജിദ്ദ: വിശുദ്ധ റമദാനിലെ ഇഫ്താറിന് ശേഷം ജിദ്ദ നഗരം ഒരു വലിയ ആഘോഷവേദിയായി മാറുന്നു. ആത്മീയതയും പൈതൃകവും ഒത്തുചേരുന്ന ജിദ്ദയിലെ വിപണികള്‍, രാത്രികാലങ്ങളില്‍ സജീവമായ ഷോപ്പിംഗ്-വിനോദ കേന്ദ്രങ്ങളായി പരിണമിച്ചിരിക്കുകയാണ്. നഗരത്തിന്റെ വിവിധ ഭാഗങ്ങളില്‍ പടര്‍ന്നുകിടക്കുന്ന സീസണല്‍ ബസാറുകള്‍ പ്രാദേശിക സംരംഭകര്‍ക്കും ഉല്‍പ്പാദനക്ഷമമായ കുടുംബങ്ങള്‍ക്കും വലിയ പിന്തുണയാണ് നല്‍കുന്നത്.
ജിദ്ദയിലെ റമദാന്‍ ആഘോഷങ്ങളുടെ കേന്ദ്രബിന്ദു ചരിത്രപ്രസിദ്ധമായ അല്‍-ബലദ് പ്രദേശം തന്നെയാണ്. പുരാതന കെട്ടിടങ്ങളും റമദാന്‍ അലങ്കാരവിളക്കുകളും കൊണ്ട് മനോഹരമായ ഇവിടം സന്ദര്‍ശകരെ പഴയകാലത്തേക്ക് കൂട്ടിക്കൊണ്ടുപോകുന്നു.
പരമ്പരാഗത രീതിയില്‍ നിര്‍മ്മിച്ച വൈവിധ്യമാര്‍ന്ന കരകൗശല ഉല്‍പ്പന്നങ്ങളും സൗദിയുടെ തനിമ വിളിച്ചോതുന്ന വസ്ത്രശേഖരവും തനതായ അറബിക് ഭക്ഷണങ്ങളും മധുരപലഹാരങ്ങളും വിപണികളെ സമ്പന്നമാക്കുന്നു.
കച്ചവടത്തിനപ്പുറം, കുടുംബങ്ങള്‍ക്കും സുഹൃത്തുക്കള്‍ക്കും ഒത്തുചേരാനുള്ള സജീവമായ സാമൂഹിക ഇടങ്ങളായി ഈ വിപണികള്‍ മാറിയിരിക്കുന്നു. റമദാന്‍ മാസത്തിന്റെ വിശുദ്ധിയും സാഹോദര്യവും പ്രതിഫലിപ്പിക്കുന്ന അന്തരീക്ഷം സമൂഹത്തിലെ ഐക്യം വര്‍ദ്ധിപ്പിക്കുന്നു. സീസണല്‍ ബസാറുകള്‍ വഴി ചെറുകിട സംരംഭകര്‍ക്ക് തങ്ങളുടെ ഉല്‍പ്പന്നങ്ങള്‍ പ്രദര്‍ശിപ്പിക്കാനും വിപണനം ചെയ്യാനും മികച്ച അവസരമാണ് ലഭിക്കുന്നത്.
ഷോപ്പിംഗ് അനുഭവം കൂടുതല്‍ ആസ്വാദ്യകരമാക്കാന്‍ വിപുലമായ വിനോദ പരിപാടികളാണ് അധികൃതര്‍ ഒരുക്കിയിരിക്കുന്നത്. കുട്ടികള്‍ക്കും മുതിര്‍ന്നവര്‍ക്കുമായി തത്സമയ പ്രദര്‍ശനങ്ങള്‍, വിവിധ മത്സരങ്ങളും സമ്മാനങ്ങളും, സാംസ്‌കാരിക പ്രകടനങ്ങള്‍ എന്നിവ ബലദിലെ ആഘോഷത്തിന് മാറ്റുകൂട്ടുന്നു. ഇത് സ്വദേശികളെ മാത്രമല്ല, വിദേശ വിനോദ സഞ്ചാരികളെയും വലിയതോതില്‍ ആകര്‍ഷിക്കുന്നു.
ഉല്‍പ്പന്നങ്ങളുടെ ഗുണനിലവാരം ഉറപ്പുവരുത്തുന്നതിനും തിരക്കേറിയ വിപണികളില്‍ ഗതാഗതം സുഗമമാക്കുന്നതിനും അധികൃതര്‍ കര്‍ശനമായ നിരീക്ഷണമാണ് ഏര്‍പ്പെടുത്തിയിരിക്കുന്നത്. ജിദ്ദയിലെ സാമ്പത്തിക മേഖല ഏറ്റവും കൂടുതല്‍ ചലനാത്മകമാകുന്ന സമയമാണിത്.
