റിയാദ്- വ്യാജവാര്‍ത്തകള്‍ പ്രചരിപ്പിക്കുന്നവര്‍ക്കും തെറ്റായ വിവരങ്ങള്‍ പടച്ചുവിടുന്നവര്‍ക്കും എതിരെ നിയമനടപടികള്‍ കര്‍ശനമാക്കുമെന്ന് സൗദി വാര്‍ത്താവിതരണ മന്ത്രി സല്‍മാന്‍ അല്‍-ദോസരി വ്യക്തമാക്കി. ഈ വര്‍ഷത്തെ സൗദി സ്ഥാപക ദിന ആഘോഷങ്ങള്‍ റമദാന്‍ മാസത്തിന്റെ പവിത്രത ഉള്‍ക്കൊള്ളുന്ന സാംസ്‌കാരികവും വിദ്യാഭ്യാസപരവുമായ പരിപാടികളോടെയാകും സംഘടിപ്പിക്കുകയെന്നും അദ്ദേഹം അറിയിച്ചു. രാജ്യത്തിന്റെ നേട്ടങ്ങള്‍ പൊതുജനങ്ങളെ അറിയിക്കുന്നതിനായി മീഡിയ മന്ത്രാലയം സംഘടിപ്പിച്ച വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.

സൗദി വിഷന്‍ 2030 പ്രഖ്യാപനത്തിന്റെ പത്താം വാര്‍ഷികം ആഘോഷിക്കുന്ന 2026 രാജ്യത്തിന്റെ ചരിത്രത്തിലെ സുപ്രധാന നാഴികക്കല്ലാണെന്ന് മന്ത്രി ചൂണ്ടിക്കാട്ടി. തീര്‍ത്ഥാടകരുടെ എണ്ണത്തില്‍ വലിയ വര്‍ധനവാണ് ഉണ്ടായിരിക്കുന്നത്. 2019-ല്‍ 85 ലക്ഷമായിരുന്ന ഉംറ തീര്‍ത്ഥാടകരുടെ എണ്ണം 2025-ഓടെ 1.8 കോടിയായി ഉയര്‍ന്നു. തീര്‍ത്ഥാടകരുടെ സംതൃപ്തി നിരക്ക് 80 ശതമാനത്തില്‍ നിന്ന് 94 ശതമാനത്തിലേക്ക് കുതിച്ചതായും ഇത് വിഷന്‍ 2030-ന്റെ ലക്ഷ്യങ്ങളെ മറികടക്കുന്ന നേട്ടമാണെന്നും അദ്ദേഹം കൂട്ടിച്ചേര്‍ത്തു.

മാധ്യമ രംഗത്തും സാമ്പത്തിക മേഖലയിലും സൗദി അറേബ്യ ലോകശ്രദ്ധ നേടുകയാണ്. അടുത്തിടെ നടന്ന സൗദി മീഡിയ ഫോറം 65,000-ത്തിലധികം സന്ദര്‍ശകരുമായി ഗിന്നസ് വേള്‍ഡ് റെക്കോര്‍ഡില്‍ ഇടംപിടിച്ചു. കൂടാതെ, പബ്ലിക് ഇന്‍വെസ്റ്റ്മെന്റ് ഫണ്ട് സംഘടിപ്പിച്ച ഫോറത്തില്‍ 6000 കോടി റിയാല്‍ മൂല്യമുള്ള 135-ലധികം ധാരണാപത്രങ്ങള്‍ ഒപ്പുവെച്ചു. രാജ്യത്തെ ഓരോ തീരുമാനങ്ങളും നിലവിലെ അവസരങ്ങള്‍ സൂക്ഷ്മമായി വിലയിരുത്തിക്കൊണ്ടും സാമ്പത്തിക നേട്ടം ലക്ഷ്യമിട്ടുമാണെന്നും മന്ത്രി വിശദീകരിച്ചു.

കഴിഞ്ഞ വാരം നടന്ന വേള്‍ഡ് ഡിഫന്‍സ് ഷോയില്‍ 3300 കോടി റിയാലിന്റെ കരാറുകളാണ് ഒപ്പുവെച്ചത്. 90 രാജ്യങ്ങളില്‍നിന്നുള്ള 1500 കമ്പനികളും 1.37 ലക്ഷം സന്ദര്‍ശകരും ഈ പ്രദര്‍ശനത്തിന്റെ ഭാഗമായി. വിവരസാങ്കേതിക മേഖലയില്‍ തൊഴിലവസരങ്ങള്‍ 2.5 ലക്ഷത്തില്‍ നിന്ന് 4.06 ലക്ഷമായി വര്‍ധിച്ചു. വിവിധ പ്രൊഫഷണല്‍ മേഖലകളില്‍ സ്വദേശിവല്‍ക്കരണം 70 ശതമാനത്തിലെത്തിയതായും മന്ത്രി അറിയിച്ചു.

ആരോഗ്യരംഗത്തും മികച്ച പുരോഗതിയാണ് രാജ്യം കൈവരിക്കുന്നത്. കഴിഞ്ഞ വര്‍ഷം അവസാനത്തോടെ രജിസ്റ്റര്‍ ചെയ്ത ആരോഗ്യ പ്രവര്‍ത്തകരുടെ എണ്ണം എട്ട് ലക്ഷം കടന്നു. സൗദി ബോര്‍ഡില്‍ നിന്ന് 5,500 ഡോക്ടര്‍മാരാണ് ഏറ്റവും വലിയ ബാച്ചായി പുറത്തിറങ്ങിയത്. അയല്‍രാജ്യമായ യമനില്‍ 28 വികസന പദ്ധതികള്‍ക്ക് സൗദി പിന്തുണ നല്‍കുന്നുണ്ടെന്നും, മാനുഷികമായ സഹായങ്ങള്‍ എന്നത് രാജ്യത്തിന്റെ ആഗോള ഭാഷയാണെന്നും അദ്ദേഹം പറഞ്ഞു.