റിയാദ്- നാളെ (ചൊവ്വാഴ്ച) ഭൂമി അപൂര്‍വ്വമായ ഒരു 'അഗ്‌നിവലയ' സൂര്യഗ്രഹണത്തിന് സാക്ഷ്യം വഹിക്കും. ചന്ദ്രന്‍ ഭൂമിയില്‍ നിന്ന് അതിന്റെ ഭ്രമണപഥത്തില്‍ ഏറ്റവും അകലെയായിരിക്കുന്ന സമയത്ത് സൂര്യനും ഭൂമിക്കും ഇടയിലൂടെ കടന്നുപോകുമ്പോഴാണ് ഈ പ്രതിഭാസം സംഭവിക്കുന്നത്. ഈ സമയത്ത് ചന്ദ്രന് സൂര്യനെ പൂര്‍ണ്ണമായി മറയ്ക്കാന്‍ കഴിയാത്തതിനാല്‍, സൂര്യന്റെ മധ്യഭാഗം ഇരുണ്ടും വശങ്ങള്‍ തിളക്കമുള്ള ഒരു സ്വര്‍ണ്ണവളയം പോലെയും ദൃശ്യമാകും. ജ്യോതിശാസ്ത്രപരമായി റമദാന്‍ മാസപ്പിറവി ദൃശ്യമാകാന്‍ സാധ്യതയുള്ള ദിവസവുമായാണ് ഈ ഗ്രഹണം ഒത്തു വരുന്നത്. എന്നാല്‍ മാസാരംഭം സംബന്ധിച്ച ഔദ്യോഗിക തീരുമാനം സൗദി സുപ്രീം കോടതിയുടെ പ്രഖ്യാപനത്തിന് വിധേയമായിരിക്കും.

ഈ ഗ്രഹണം സൗദി അറേബ്യയിലോ മറ്റ് അറബ് രാജ്യങ്ങളിലോ നേരിട്ട് ദൃശ്യമാകില്ല. അന്റാര്‍ട്ടിക്കയിലെ വിജനമായ മേഖലകളിലും പരിസര പ്രദേശങ്ങളിലുമാണ് പ്രധാനമായും 'അഗ്‌നിവലയം' ദൃശ്യമാകുക. ഭൂഖണ്ഡത്തിന്റെ ഉള്‍ഭാഗത്തുള്ള കോണ്‍കോര്‍ഡിയ സ്റ്റേഷന്‍, തീരദേശത്തെ മിര്‍ണി സ്റ്റേഷന്‍ എന്നിവിടങ്ങളിലെ ശാസ്ത്രജ്ഞര്‍ക്ക് മാത്രമായിരിക്കും ഈ കാഴ്ച നേരിട്ട് കാണാന്‍ സാധിക്കുക. തെക്കേ അമേരിക്കയുടെ തെക്കന്‍ ഭാഗങ്ങളിലും തെക്കുകിഴക്കന്‍ ആഫ്രിക്കയിലും ഭാഗിക ഗ്രഹണം ദൃശ്യമാകും. അറബ് രാജ്യങ്ങളിലുള്ളവര്‍ക്ക് തത്സമയ സംപ്രേക്ഷണത്തിലൂടെയും ശാസ്ത്ര ചാനലുകളിലൂടെയും ഈ പ്രതിഭാസം വീക്ഷിക്കാവുന്നതാണ്.

ജ്യോതിശാസ്ത്ര കണക്കുകള്‍ പ്രകാരം ഗ്രഹണം അതിന്റെ പൂര്‍ണ്ണതയില്‍ എത്തുമ്പോള്‍ സൂര്യന്റെ 96 ശതമാനത്തോളം ഭാഗം ചന്ദ്രനാല്‍ മറയ്ക്കപ്പെടും. അഗ്‌നിവലയ പാതക്ക് ഏകദേശം 616 കിലോമീറ്റര്‍ വീതിയുണ്ടാകും. ഏറ്റവും വ്യക്തമായി കാണപ്പെടുന്ന സ്ഥലങ്ങളില്‍പോലും ഈ 'മോതിരക്കാഴ്ച' 2 മിനിറ്റ് 20 സെക്കന്‍ഡ് മാത്രമേ നീണ്ടുനില്‍ക്കൂ. ഗ്രഹണത്തിന്റെ തുടക്കം മുതല്‍ ഒടുക്കം വരെയുള്ള മുഴുവന്‍ പ്രക്രിയയും ഏകദേശം 4 മണിക്കൂര്‍ 31 മിനിറ്റോളം നീണ്ടുനില്‍ക്കുമെന്നാണ് ഗവേഷകര്‍ കണക്കാക്കുന്നത്.

സൗദി അറേബ്യയിലെ പ്രാദേശിക സമയം അനുസരിച്ച് ഉച്ചക്ക് 12:56-ന് ഭാഗിക ഗ്രഹണം ആരംഭിക്കും. ഉച്ചകഴിഞ്ഞ് 2:42-ഓടെ അഗ്‌നിവലയ ഘട്ടം തുടങ്ങുകയും 3:12-ന് ഗ്രഹണം അതിന്റെ പൂര്‍ണ്ണാവസ്ഥയില്‍ എത്തുകയും ചെയ്യും. തുടര്‍ന്ന് 3:41-ന് അഗ്‌നിവലയ ഘട്ടം അവസാനിക്കുകയും വൈകുന്നേരം 5:27-ഓടെ ഗ്രഹണം പൂര്‍ണ്ണമായും വിട്ടുമാറുകയും ചെയ്യും. സാധാരണയായി കാണപ്പെടുന്ന സൂര്യഗ്രഹണങ്ങളേക്കാള്‍ ദൃശ്യഭംഗിയുള്ള ഈ പ്രതിഭാസത്തെ ലോകമെമ്പാടുമുള്ള ജ്യോതിശാസ്ത്ര പ്രേമികള്‍ ഏറെ ആകാംക്ഷയോടെയാണ് കാത്തിരിക്കുന്നത്.