ദുബായ്- ആഗോള ആരോഗ്യരംഗത്തെ നൂതന മാറ്റങ്ങള്‍ക്ക് വേദിയൊരുക്കി ലോകത്തിലെ ഏറ്റവും വലിയ മെഡിക്കല്‍ എക്സിബിഷനായ വേള്‍ഡ് ഹെല്‍ത്ത് എക്സ്പോയ്ക്ക് ദുബായില്‍ ഉജ്ജ്വല തുടക്കം. യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിന്‍ റാഷിദ് അല്‍ മക്തൂം ദുബായ് എക്സിബിഷന്‍ സെന്ററില്‍ മേളയുടെ ഔദ്യോഗിക ഉദ്ഘാടനം നിര്‍വഹിച്ചു. 'ആരോഗ്യ സംരക്ഷണ ലോകം ഒത്തുചേരുന്നിടം' എന്ന പ്രമേയത്തില്‍ അരങ്ങേറുന്ന ഈ സംഗമം, അന്താരാഷ്ട്ര ആരോഗ്യ ഭൂപടത്തില്‍ ദുബായിയുടെ മേധാവിത്വം ഒരിക്കല്‍കൂടി ഉറപ്പിക്കുന്നതാണ്.

180-ലധികം രാജ്യങ്ങളില്‍ നിന്നായി 2,35,000-ത്തിലധികം ആരോഗ്യ വിദഗ്ധരും 4,300-ഓളം പ്രദര്‍ശകരും പങ്കെടുക്കുന്ന എക്സ്പോ അതിന്റെ ചരിത്രത്തിലെ ഏറ്റവും വലിയ പതിപ്പാണ്. അഞ്ച് പതിറ്റാണ്ടിന്റെ പാരമ്പര്യമുള്ള അറബ് ഹെല്‍ത്ത് പ്ലാറ്റ്ഫോമിനെ പരിഷ്‌കരിച്ച് വേള്‍ഡ് ഹെല്‍ത്ത് എക്സ്പോ എന്ന പുതിയ ബ്രാന്‍ഡിലേക്ക് മാറ്റിയ ശേഷമുള്ള ആദ്യ പ്രദര്‍ശനമാണിതെന്ന പ്രത്യേകതയുമുണ്ട്. മെഡിക്കല്‍ ഉപകരണങ്ങള്‍ മുതല്‍ ആധുനിക ബയോടെക്‌നോളജി വരെയുള്ള മേഖലകളിലെ അത്യാധുനിക കണ്ടുപിടുത്തങ്ങളാണ് പ്രദര്‍ശനത്തില്‍ മുഖ്യ ആകര്‍ഷണം.

ആഗോള വിപണികളെയും വൈദഗ്ധ്യത്തെയും പരസ്പരം ബന്ധിപ്പിക്കാന്‍ ദുബായ് നല്‍കുന്ന മികച്ച സൗകര്യങ്ങളെ ഇന്‍ഫോര്‍മ മാര്‍ക്കറ്റ്സ് മിഡില്‍ ഈസ്റ്റ് പ്രസിഡന്റ് പീറ്റര്‍ ഹാള്‍ പ്രശംസിച്ചു. ആരോഗ്യമേഖലയില്‍ വലിയ തോതിലുള്ള നിക്ഷേപങ്ങള്‍ക്കും ക്ലിനിക്കല്‍ വിദ്യാഭ്യാസത്തിനും പുതിയ നയരൂപീകരണത്തിനും ഈ മേള വലിയ പിന്തുണ നല്‍കുമെന്ന് അദ്ദേഹം വ്യക്തമാക്കി. രോഗീപരിചരണം കൂടുതല്‍ കാര്യക്ഷമമാക്കുന്നതിനും പുതിയ സാങ്കേതികവിദ്യകള്‍ വേഗത്തില്‍ നടപ്പിലാക്കുന്നതിനും ആഗോളതലത്തിലുള്ള ഇത്തരം സഹകരണങ്ങള്‍ അനിവാര്യമാണെന്നും അദ്ദേഹം ഓര്‍മ്മിപ്പിച്ചു.

വിദഗ്ധര്‍ക്കായി സംഘടിപ്പിക്കുന്ന ആറ് പ്രത്യേക ക്ലിനിക്കല്‍ കോണ്‍ഫറന്‍സുകള്‍ക്ക് പുറമെ, സാങ്കേതിക വിദ്യയിലെ വിപ്ലവകരമായ മാറ്റങ്ങള്‍ ചര്‍ച്ച ചെയ്യാന്‍ ഫ്യൂച്ചര്‍ എക്സ്, ഫ്രോണ്ടിയേഴ്‌സ്, വിഷനറി എന്നീ പുതിയ വേദികളും ഇത്തവണയുണ്ട്. ശസ്ത്രക്രിയയിലെ ആര്‍ട്ടിഫിഷ്യല്‍ ഇന്റലിജന്‍സ്, ജീവന്‍രക്ഷാ മരുന്നുകളിലെ പുതിയ മുന്നേറ്റങ്ങള്‍, ആരോഗ്യരംഗത്തെ സുസ്ഥിര നിക്ഷേപങ്ങള്‍ എന്നിവയില്‍ ലോകപ്രശസ്തരായ 300-ഓളം വിദഗ്ധര്‍ ക്ലാസുകള്‍ നയിക്കുന്നുണ്ട്. ആധുനിക ശാസ്ത്രം രോഗീപരിചരണത്തില്‍ വരുത്തുന്ന വലിയ മാറ്റങ്ങള്‍ ഈ സെഷനുകളില്‍ ചര്‍ച്ച ചെയ്യപ്പെടുന്നു.

യുഎഇ ആരോഗ്യ-പ്രതിരോധ മന്ത്രാലയത്തിന്റെ സഹകരണത്തോടെ നടക്കുന്ന ഈ മേള രാജ്യത്തിന്റെ ആരോഗ്യപരമായ കാഴ്ചപ്പാടുകളെ പ്രതിഫലിപ്പിക്കുന്നതാണ്. ഉദ്ഘാടനത്തിന് മുന്നോടിയായി നടന്ന ലീഡേഴ്സ് സമ്മേളനത്തില്‍ ഹെല്‍ത്ത് റെഗുലേഷന്‍ സെക്ടര്‍ അസിസ്റ്റന്റ് അണ്ടര്‍സെക്രട്ടറി ഡോ. അമീന്‍ ഹുസൈന്‍ അല്‍ അമീരി രാജ്യത്തിന്റെ ഭാവിപദ്ധതികള്‍ വിശദീകരിച്ചു. ദുബായ് വേള്‍ഡ് ട്രേഡ് സെന്ററില്‍ നടക്കുന്ന WHX ലാബ്‌സുമായി ചേര്‍ന്ന്, ആഗോളതലത്തില്‍ തന്നെ സമാനതകളില്ലാത്ത ആരോഗ്യ വിരുന്നാണ് ഫെബ്രുവരി 12 വരെ ദുബായില്‍ നടക്കുന്നത്.