അല്‍-ഖുറയ്യാത്ത്: സൈനിക സേവനത്തിനിടയില്‍ രൂപപ്പെട്ട ആത്മബന്ധത്തിന് കാലത്തിന് പോലും മങ്ങലേല്‍പ്പിക്കാനാവില്ലെന്ന് തെളിയിച്ചിരിക്കുകയാണ് ഖലീഫ് സമിഹാന്‍ അല്‍-ഹര്‍ബിയും ലാഫി ജറാദ് അല്‍-റഷൈദ അല്‍-ഷരാരിയും. മദീനയിലെ 41-ാം റെജിമെന്റിലെ സഹപ്രവര്‍ത്തകരായിരുന്ന ഇവര്‍ സൈനിക സേവനത്തില്‍ നിന്ന് വിരമിച്ച് നീണ്ട 40 വര്‍ഷങ്ങള്‍ക്ക് ശേഷമാണ് കഴിഞ്ഞ ദിവസം അല്‍-ഖുറയ്യാത്തില്‍ വെച്ച് വീണ്ടും കണ്ടുമുട്ടിയത്. വാര്‍ദ്ധക്യത്തിന്റെ അവശതകള്‍ക്കിടയിലും ഇരുവരും കെട്ടിപ്പിടിച്ചു കരഞ്ഞ രംഗം സോഷ്യല്‍ മീഡിയയില്‍ വൈറലായിരിക്കുകയാണ്.
41-ാം റെജിമെന്റിലെ ഒരു ബറ്റാലിയനില്‍ സര്‍ജന്റായിരുന്ന അല്‍-ഷരാരി തന്റെ സഹപ്രവര്‍ത്തകര്‍ക്കിടയില്‍ മാതൃകാപരമായ പെരുമാറ്റത്തിനും നല്ല പേരിനും ഉടമയായിരുന്നു. തന്റെ കീഴില്‍ ജോലി ചെയ്തിരുന്നവരോട് അദ്ദേഹം കാണിച്ചിരുന്ന സ്‌നേഹവും കരുതലുമാണ് വര്‍ഷങ്ങള്‍ക്കിപ്പുറവും ഇത്തരമൊരു ആഴത്തിലുള്ള ബന്ധം നിലനില്‍ക്കാന്‍ കാരണമെന്ന് സഹപ്രവര്‍ത്തകര്‍ സാക്ഷ്യപ്പെടുത്തുന്നു. ഔദ്യോഗിക ജീവിതത്തിനപ്പുറം ഹൃദയങ്ങള്‍ തമ്മിലുള്ള ഐക്യമാണ് ഈ ഒത്തുചേരലിലൂടെ പ്രതിഫലിച്ചത്.
ദൂരക്കൂടുതലും പ്രായവും കാരണം നേരിട്ട് കാണാന്‍ സാധിച്ചില്ലെങ്കിലും ഇത്രയും കാലം ഇവര്‍ ഫോണിലൂടെ സൗഹൃദം കാത്തുസൂക്ഷിച്ചിരുന്നു. തന്റെ മകന്റെ വിവാഹത്തിന് അല്‍-ഷരാരി ക്ഷണിച്ചതോടെയാണ് ആ കൂടിക്കാഴ്ചയ്ക്ക് അവസരമൊരുങ്ങിയത്. ഹായിലിന് തെക്ക് 240 കിലോമീറ്റര്‍ അകലെയുള്ള അല്‍-തുമൈമിയ സെന്ററില്‍ നിന്ന് ഏകദേശം 890 കിലോമീറ്ററിലധികം യാത്ര ചെയ്താണ് അല്‍-ഹര്‍ബി തന്റെ പ്രിയ സുഹൃത്തിന്റെ സന്തോഷത്തില്‍ പങ്കുചേരാന്‍ അല്‍-ഖുറയ്യാത്തില്‍ എത്തിയത്.
ടിക്‌ടോക്കില്‍ പ്രചരിച്ച ഇവരുടെ കൂടിക്കാഴ്ചയുടെ വീഡിയോ കണ്ട് ഇവരുടെ മുന്‍കാല സഹപ്രവര്‍ത്തകരുടെ മക്കളും പേരമക്കളും വികാരാധീനരായി. ഈ വീഡിയോ തങ്ങളുടെ പിതാക്കന്മാരെയും മുത്തശ്ശന്മാരെയും പഴയ കാലഘട്ടത്തിലേക്ക് കൊണ്ടുപോയെന്നും അല്‍-ഹര്‍ബിയെയും അല്‍-ഷരാരിയെയും അവര്‍ ഇപ്പോഴും നന്ദിയോടെ സ്മരിക്കുന്നുണ്ടെന്നും കുടുംബാംഗങ്ങള്‍ കമന്റുകളിലൂടെ അറിയിച്ചു. അവരുടെ പഴയകാലത്തെ നല്ല നിലപാടുകളും കഠിനാധ്വാനവും പുതുതലമുറക്ക് വലിയൊരു പാഠമാണെന്ന് പലരും കുറിച്ചു.
അകന്നുപോയ വര്‍ഷങ്ങളെ ഒരു നിമിഷം കൊണ്ട് ഇല്ലാതാക്കിയ ഈ കൂടിക്കാഴ്ച, ആത്മാര്‍ത്ഥമായ ബന്ധങ്ങള്‍ എത്ര ദൂരത്തായാലും എന്നും ശക്തമായി തുടരുമെന്ന് ലോകത്തിന് കാണിച്ചുതരുന്നു. വിരമിച്ച സൈനികരുടെ ഈ സ്‌നേഹപ്രകടനം അല്‍-ഖുറയ്യാത്ത് ഗവര്‍ണറേറ്റിലും പരിസരപ്രദേശങ്ങളിലും വലിയ ചര്‍ച്ചയായി മാറിയിരിക്കുകയാണ്. സ്‌നേഹത്തിനും കൂറിനും മുന്‍പില്‍ പ്രായവും ദൂരവും വെറും അക്കങ്ങള്‍ മാത്രമാണെന്ന് ഈ രണ്ട് സൈനികര്‍ ഒരിക്കല്‍ കൂടി തെളിയിച്ചു.
Related News
