റിയാദ്: ആഗോള ലോജിസ്റ്റിക്‌സ് ഭൂപടത്തില്‍ മുന്‍നിരയിലെത്താനുള്ള ലക്ഷ്യത്തോടെ സൗദി അറേബ്യ വന്‍ പദ്ധതികള്‍ ആവിഷ്‌കരിക്കുന്നു. 2026-ഓടെ രാജ്യത്തെ പ്രധാന വിമാനത്താവളങ്ങളിലും തുറമുഖങ്ങളിലും പുതിയ ലോജിസ്റ്റിക്‌സ് സെന്ററുകള്‍ ആരംഭിക്കുമെന്നും അടിസ്ഥാന സൗകര്യ വികസനത്തിനായി വന്‍തോതില്‍ നിക്ഷേപം നടത്തുമെന്നും ഗതാഗത മന്ത്രി സാലിഹ് അല്‍-ജാസര്‍ അറിയിച്ചു. റിയാദ് കിംഗ് ഖാലിദ് അന്താരാഷ്ട്ര വിമാനത്താവളത്തിലെ കാര്‍ഗോ വില്ലേജില്‍ പ്രമുഖ ആഗോള കൊറിയര്‍ കമ്പനിയായ യുപിഎസിന്റെ (UPS) പുതിയ ഷിപ്പിംഗ് ഓപ്പറേഷന്‍സ് സെന്റര്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

ചരക്ക് നീക്കത്തിനായി ഡ്രോണുകള്‍ ഉപയോഗിക്കുന്നതിനുള്ള പരീക്ഷണങ്ങള്‍ പുരോഗമിക്കുകയാണ്. റോഡ് പരിശോധനകള്‍ക്കും മറ്റ് അനുബന്ധ ജോലികള്‍ക്കും നിലവില്‍ ഡ്രോണുകള്‍ ഉപയോഗിക്കുന്നുണ്ടെന്നും ചരക്ക് കൈമാറ്റത്തിനായി ഇവ വൈകാതെ തന്നെ സജ്ജമാകുമെന്നും മന്ത്രി പറഞ്ഞു.

ജി.സി.സി (GCC) രാജ്യങ്ങളെ തമ്മില്‍ ബന്ധിപ്പിക്കുന്ന റെയില്‍വേ ശൃംഖലയ്ക്കായുള്ള അടിസ്ഥാന സൗകര്യ വികസന ജോലികള്‍ സൗദിയില്‍ അതിവേഗം പുരോഗമിക്കുകയാണെന്ന് അദ്ദേഹം വ്യക്തമാക്കി. കഴിഞ്ഞ വര്‍ഷം സൗദിയിലെ എയര്‍ കാര്‍ഗോ മേഖല 34 ശതമാനം വളര്‍ച്ച രേഖപ്പെടുത്തി. 1.2 ദശലക്ഷം ടണ്‍ ചരക്കാണ് ഇക്കാലയളവില്‍ കൈകാര്യം ചെയ്തത്.

റിയാദിലെ കാര്‍ഗോ വില്ലേജില്‍ 10,000 ചതുരശ്ര മീറ്റര്‍ വിസ്തൃതിയിലാണ് പുതിയ യുപിഎസ് കേന്ദ്രം ഒരുക്കിയിരിക്കുന്നത്. അത്യാധുനിക സാങ്കേതികവിദ്യയുടെ സഹായത്തോടെ മണിക്കൂറില്‍ 3,000 പാഴ്‌സലുകള്‍ വരെ ഇവിടെ കൈകാര്യം ചെയ്യാന്‍ സാധിക്കും. സൗദിയിലെ യുപിഎസ് ഏജന്റായ 'ഈരാദ്' (Eirad) ആണ് ഈ കേന്ദ്രത്തിന്റെ പ്രവര്‍ത്തനം നിയന്ത്രിക്കുന്നത്. രാജ്യത്തെ 200-ലധികം നഗരങ്ങളെ ആഗോള ശൃംഖലയുമായി ബന്ധിപ്പിക്കുന്ന തരത്തില്‍ 1,50,000 ചതുരശ്ര മീറ്റര്‍ വെയര്‍ഹൗസ് സൗകര്യവും 25 ശാഖകളും യുപിഎസ് സൗദിയില്‍ ഇതിനോടകം സജ്ജമാക്കിയിട്ടുണ്ട്.

ചരക്ക് നീക്കം വേഗത്തിലാക്കാനും കസ്റ്റംസ് ക്ലിയറന്‍സ് നടപടികള്‍ ലഘൂകരിക്കാനും പുതിയ കേന്ദ്രം സഹായിക്കുമെന്ന് യുപിഎസ് യൂറോപ്പ്-മിഡില്‍ ഈസ്റ്റ്-ആഫ്രിക്ക പ്രസിഡന്റ് ഡാനിയല്‍ കരേര പറഞ്ഞു. സാമ്പത്തിക വൈവിധ്യവല്‍ക്കരണത്തിലൂടെ രാജ്യത്തിന്റെ ഇറക്കുമതി-കയറ്റുമതി മേഖലയെ ശക്തിപ്പെടുത്തുകയാണ് ഈ പദ്ധതികളുടെ പ്രധാന ലക്ഷ്യം.