ജിദ്ദ: നഗരത്തിലെ തെരുവ് കച്ചവടക്കാരെ പിന്തുണയ്ക്കുന്നതിനും അവര്‍ക്ക് സുരക്ഷിതമായ ജോലി സാഹചര്യം ഒരുക്കുന്നതിനുമായി ജിദ്ദ മുനിസിപ്പാലിറ്റി പുതിയ സഹകരണ കരാറില്‍ ഒപ്പുവെച്ചു. മുനിസിപ്പാലിറ്റി-ഭവന മന്ത്രാലയത്തിന് കീഴിലുള്ള തെരുവ് കച്ചവട ശാക്തീകരണ വിഭാഗവുമായും, മജീദ് ബിന്‍ അബ്ദുല്‍ അസീസ് സൊസൈറ്റി ഫോര്‍ ഡെവലപ്മെന്റ് ആന്റ് സോഷ്യല്‍ സര്‍വീസസുമായും ചേര്‍ന്നാണ് ഈ പദ്ധതി നടപ്പിലാക്കുന്നത്.
ജിദ്ദ മേയര്‍ സാലിഹ് അല്‍ തുര്‍ക്കി, തെരുവ് കച്ചവട വികസന വിഭാഗം ജനറല്‍ സൂപ്പര്‍വൈസര്‍ രാജകുമാരി നജൂദ് ബിന്‍ത് ഹത്ലൂല്‍ ബിന്‍ അബ്ദുല്‍ അസീസ്, മജീദ് അസോസിയേഷന്‍ എക്‌സിക്യൂട്ടീവ് ഡയറക്ടര്‍ ബറാ അല്‍ അബ്ദി എന്നിവര്‍ പങ്കെടുത്തു.
പദ്ധതിയുടെ പ്രധാന ലക്ഷ്യങ്ങള്‍:
-തെരുവ് കച്ചവടക്കാര്‍ക്കായി ആധുനിക സൗകര്യങ്ങളോട് കൂടിയ പ്രത്യേക സ്ഥലങ്ങള്‍ അനുവദിക്കുക.
-സുരക്ഷിതവും വൃത്തിയുള്ളതുമായ അന്തരീക്ഷം ഉറപ്പാക്കുന്നതിലൂടെ ഗുണമേന്മയുള്ള സേവനം ഉപഭോക്താക്കള്‍ക്ക് ലഭ്യമാക്കുക.
-കച്ചവടക്കാര്‍ക്ക് ഭാവിയില്‍ സ്വന്തമായി വാണിജ്യ സ്ഥാപനങ്ങള്‍ തുടങ്ങാന്‍ പ്രാപ്തരാക്കുകയും പുതിയ തൊഴിലവസരങ്ങള്‍ സൃഷ്ടിക്കുകയും ചെയ്യുക.
-അനിയന്ത്രിതമായ കച്ചവടം മൂലം നഗര സൗന്ദര്യത്തിലുണ്ടാകുന്ന വീഴ്ചകള്‍ ഇല്ലാതാക്കുക.
കരാറിന്റെ ഭാഗമായി കച്ചവടക്കാര്‍ക്ക് പൊതുജനാരോഗ്യം, ഭക്ഷ്യ സുരക്ഷ, മാര്‍ക്കറ്റിംഗ് കഴിവുകള്‍ എന്നിവയില്‍ പ്രത്യേക പരിശീലന പരിപാടികളും വര്‍ക്ക്‌ഷോപ്പുകളും സംഘടിപ്പിക്കും. കൂടാതെ, സ്മാര്‍ട്ട് സിറ്റി മാനദണ്ഡങ്ങള്‍ക്കനുസൃതമായി കച്ചവടക്കാരുടെ തൊഴില്‍ സാഹചര്യം മെച്ചപ്പെടുത്തുന്നതിനുള്ള നൂതനമായ മാര്‍ഗ്ഗങ്ങളും പദ്ധതിയുടെ ഭാഗമാണ്.
ജിദ്ദയുടെ നഗരവികസനം ലക്ഷ്യമിട്ടുള്ള സുസ്ഥിര വികസന പ്രവര്‍ത്തനങ്ങളുടെ ഭാഗമായാണ് ഈ നടപടിയെന്ന് മുന്‍സിപ്പാലിറ്റി അധികൃതര്‍ വ്യക്തമാക്കി.
Related News
